|
Robe de Ciósa
Un ziogo che no tramonta: el loto
 |
| Moderna “ricevitoria” pa ’l ziogo del loto… |
Scomissiémo da le origini. Nel sedicesimo secolo a Firense la Signoria aveva deciso ’na sorta de tassa straordinaria da afibiare ai sitadini, obrigàndoli a comprare un serto nùmaro de bilieti numerà, in proporsion a la consistenza de i propri beni in cambio de beni che se tirava a sorte; i gèra beni per la massima parte confiscà ai vinti, a aversari politici o a ribeli. ’Sta tassa gèra ciamà “loto”, cossì come quelo che gèra in voga al tempo de la Republica de Genova, nel 1634, colegà a le scomesse per la nomina ogni sie mesi de i membri de i “Serenissimi Collegi” opure, secondo ’n’altra version, a ’na gara de scomesse che se fèva per l’elession al senato e a le altre magistrature sitadine. El vocabolo a ze de origine francese (da “lot” = parte de un tuto che tóca in sorte, derivà dal gotico “hlauts = sorte, porsion assegnà: difati se dize anca ancùo un “loto de teren”).
’Sto ziogo de scomesse pi tardi a ze stà introdoto in Italia e gestìo diretamente da lo Stato. A consisteva in prinsipio (e a ze andà avanti cossì fin al 1997) ne l’estrassion setimanale de sinque nùmari su novanta per ogni una de le dièze “ruote”: queste corispondeva a nomi de sità-capoliòghi de provinsia (Bari, Cagliari, Firenze, Genova, Milano, Napoli, Palermo, Roma, Torino e Venezia). ’Sti novanta nùmari i gera messi drénto a un’urna. Vegniva assegnà un premio in schèi a chi indovinava le estrassion o sèrte combinassion (da dó a sinque, ciamàe rispetivamente ambo, terno, quaterna e sinquina). La vinsita gera de 10,5 volte la ziogà per l’estrassion semplice, fin a un milion de volte per la sinquina. Dal loto ze derivà i proverbi: “Vìnsare un terno al loto” (= avere ’na fortuna granda e inaspetà) e “Dare i nùmari” (= sproloquiare, strolegare). Esisteva ’na apòsita “ricevitorìa” deta “boteghin o banco del loto” co un “ricevitore” incaricà de trascrìvare a pena i nùmari, che i ziogadori voleva ziogare (spesso trasmessi in sònio, così i dizeva, da qualche parente morto), su ’na apòsita cartèla (la “cartèla del loto”). Se podèva ziogare co un bilieto su ’na ròda o su tute le ròde e se podèva anca divìdare la posta fra le varie combinassion.
Raconrta un cronista ciosoto, Felice Nordio, che esisteva, per esempio, un tale a Ciósa, ne l’Otosènto, ciamà Papalan, ’na figura ridìcola co in testa un beréto turchin col fioco, un fanulon, che a fèva come mistièro quelo de véndare firme del loto, cioè i boletini del loto, e per questo a girèva in lòngo e in largo la sità, e a se segnava i nùmari de l’estrassion del loto col gesso atorno de la beréta…
El tradissionale loto nel corso de i ani ze stà afiancà da altri zioghi più o meno simili come l’Enalotto, sostituìo nel 1997 dal Superenalotto, dove che se pòle fare de le vìnsite milionarie. L’estrassion (anche tre volte la setimana) adesso la vien fata co sistemi eletronici e i nùmari estrati vien trasmessi in direta da la television.
Andando indrìo col tempo, se trova che a Venessia, per esempio, el governo de la Republica aveva autorisà publicamente el ziogo del loto fin dal 1521. Prima a se ziogava privatamente co la licensa del Governo veneto. La Cèsa alora lo bolava come un “vissio pecaminoso”, anche se l’estrassion se fèva, co gran dispiassère de i frati, presso el convento de i Santi Giovanni e Paolo… (San Zanipòlo). I premi assegnà gera ne i primi tempi (1521) roba da casa, tapèi e altre robe de poco valore, messe in palio da un sèrto Gerolamo Franco, déto Bambarana. Ben presto però (1523) un tale Giovani Manenti, dopo aver avùo la licensa, l’à messo come posta in ziogo ben dièse ducati per el boletin vinsente e l’à avùo anca nel 1525 el permesso e l’incarico de métare al loto la cosidéta “Ca’ del Duca”, un palasso che gèra finìo alora de proprietà de la Signoria. De ’sto palasso ze deventà paron el venessian Alvise Dolce co el biliéto primo estrato nùmaro 5420, ma a l’à rivendùo subito. Un altro concessionario ze stà G. Batista Molin, déto Mamèra, pievan de la parochia de San Simon e Giuda, che nel 1720 l’à otegnùo la concession de 14 “grassie” o estrassion publiche.
Nel fratempo, nel 1515, el ziogo gera stà dà in apalto a un sèrto Lodovico Corner, parente del Doge de chel tempo, concession dopo ritirà dal Governo, che à scomissià a gestirlo diretamente. La prima estrassion pùblica ze avegnùa el 5 de aprile del 1734 e i primi nùmari estrati ze stai, per la storia: 44, 30, 77, 66, 18. El ziògo deventarà poco dopo ’na fonte de schèi consistente per la Republica Veneta. Le estrassion gera 9 a l’ano, passàe dopo a 12 co un ricavato totale de 30 mila ducati a l’ano, che i vegniva spesi per gestire e anca fare pi bela l’iluminassion pùblica.
“Ziogare al loto” gera deventà ’na sorta de vissio a Venessia come a Ciósa (come dapertuto: no ghe ne parlemo adesso… co le varie loterìe). Se ziogava in ’sto modo: i partessipanti comprava de le cédole contrassegnà co un nome o co un nùmaro, le “matrici” gera messe drénto un primo sachetin; un balotin tirava a sorte da questo la “matrice” vinsente. Ma no finiva cossì: da un secondo sachetin se tirava fòra ancora, a sorte, ’na baleta contrassegnà co le parole “prècio” o “paciencia”: co la prima se assegnèva la sóma in palio, co la seconda… passiensa!…, sarà per ’n’altra volta… (cfr. G. Siega, “Dizionario del lessico veneto”, vol. II, Venezia, 2009).
Resta da dire la diferensa fra loto e loterìa. La seconda ze un ziogo de sorte dove vinse un premio in schèi o un sèrto ogeto chi à un biliéto contrassegnà da un nùmaro uguale a quelo che ze stà estrato a sorte da un’urna, o anche colegà a un concorente o a un coridore o a un cavalo o altro animale in gara e vinsente (adesso anche al primo classificà in un concorso-spetacolo televisivo).
Seremo ’sto “excursus” sul loto co un proverbio ciosòto tramandà dal poeta Ricardo Nàcari: “voler da lòto socórso / no vale del càurlo el tórso” (= ’spetarse agiuto dal ziogo del loto ze pèso de pensare de sfamarse col tórsolo de un càvolo). Sagessa de i nostri veci…
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Fin dove xela mia de mi la me vita?
Davanti a la tragica fine, disperatamente coerente, del grande regista Mario Monicelli, nessun giudizio, tanto rispeto e silenzio, ma…
de Mario Klein
Da Lendinara (RO)
Arie bone a Lendinara
Piaze, strade, monumenti: pìcole notizie zitadine
de Renato Scarpi
Da Verona
Gioventù stranba
de Giacinta Dall'Ora
|
