|
Editoriale
Ano novo, vita vecia?
Sarà ben métarselo in testa da sùbito: l’ano ’pena rivà el sarà novo solo par modo de dire. Dovaremo pensare a “riciclare” tante usanze e sistemi de vita desmessi, fin ’desso tegnù in mente propio da chi, come noantri, se òcupa de tradizion e memoria
“Véito s’a xe vegnù bone tante robe ch’i voléa butare via” me par de sentirme supiare te le rece da na vozina sgaja e celestiale che go sentìo oncora intorno a mi… spece có jero tosato e piravo a muciare ratatuje che le savéa da mufa, che le òcupa spazio e le te fa inganbarare có te vè in zerca de calcossa.
Ma qua pi che de “robe” de na volta (la stagnà, la ramina, el trepiè, la méscola, el masenin, el passin, el canfin, la moscarola, la scoazara, la cógoma, el brusin, el scaldaleto, la fogara, la mùnega, la giazara, la mulinela, el naspo, el canòlo e i feri da calze, le papete de lin…) se intende el modo de vìvare, de magnare, de vestire, de pensare, de conportarse, de passare el tenpo, de pregare…
A dire el vèro, a jerà on tocheto che ’l tanbarava… Vuto propio che ’l faza sul serio? E dài oncò e dài doman, e vèrzi la botilia oncò e vèrzela doman, el vin s’à butà in aséo. Cussì xe ’ndà le robe. “On disastro!” ga dito la zente. “Na pena a la volta i ga pelà l’oca!”
’Desso podemo anca lamentarse, parché l’òbligo de “fare i buoni” xe stà par Nadale e, se anca ghemo sarà ben el saco co drento l’ano vecio, se ga l’inpression che dovaremo tirare… speremo de no la cinghia, ma de sicuro tirare la careta.
Ghemo dito la careta, parché no sarà pi el tenpo de la cariola o del cariolon, ma gnanca quela del birozin o de la timonela. Manco palanche in scarsela, manco lussi, manco màchina, piassè rinunce, piassè strada a piè o in bicicleta e qualche volta… polenta e fighi sentà so ’l casson. In conpenso, manco pression alta, manco colesterolo a le stele, piassè vita a l’aria aperta a gòdare che ’l poco che ancora no ga on prezo: l’aria, el sole, la piova, el vento, el colore de i fiori, el profumo de on soriso, el calore del saludo, l’amicizia. Tute robe che ghemo on poco trascurà, ciàpa come che semo par no trovarse indrìo, quando el resto del mondo el xe senpre pi ’vanti.
La màchina del canbiamento, cussì sguelto e conplicà, la xe in moto e la funziona a pieno ritmo; tuti vole savere parcossa, parcome e fin quando; dopo i mogugni se move la protesta; la paura de catarse in braghe de tela la xe tanta. Forse xe la prima volta che l’odore de brusà viene da on fogo vero e no da le candele stuà a fine messa.
Xe pur vèro che col mare calmo tuti xe marinài, ma quando pianze le scarsele, purtropo “ride” le scarpe… e la strada da fare par catarghe l’ere la sarà longa. Però, no giova de sicuro sbàtare la testa contro el muro. Sicome ogni male ga la so rizeta, scominziemo a domandarse dove podemo ’vere sbalià, no stemo agitarse (ne l’ultima crisi mondiale ghe xe stà 40.000 morti par infarto da stress!), pensemo che la crisi la xe una de le tante dificoltà che senpre ga la vita, e consolémose col fato che “quelo che xe stà el torna senpre”: podarà on giorno tornare el benèssare, ma pa’ intanto, acetemo el ritorno de na vita pi poareta!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Ano novo, vita vecia?
Sarà ben métarselo in testa da sùbito: l’ano ’pena rivà el sarà novo solo par modo de dire. Dovaremo pensare a “riciclare” tante usanze e sistemi de vita desmessi, fin ’desso tegnù in mente propio da chi, come noantri, se òcupa de tradizion e memoria
de Mario Klein
Da Vicenza
Maestra e scolari
insieme dopo pi de trent’ani
de Pasqualina Galvanin
|
