|
Da San Bonifacio (VR)
La me vita co Quatro Ciàcoe
 | | La rivista del 1992 indò è vegnù fora el me primo articolo. |
Go incontrà Quatro Ciàcoe nel 1992 e se semo subito inamorà: l’è stà un colpo de fulmine da ’na parte e da st’altra.
Me ricordo che ’l me amigo de cana da pesca, Rino Carletto, l’era abonà e da tenpo el seitava a dirme: “Parché no te te aboni anca ti? Te podaressi anca scrìvare calcossa!”
Forza de dài, me son abonà e pin pianin go scominçià a conóssar i personagi che ancora ancò i provede, sepur co senpre pi grande fadiga, a mantegner in vita sto araldo de la tradizion.
El primo articolo me ricordo de avérghelo consegnà, a metà autostrada tra San Bonifacio e Padova, a Francesco Dalla Pietra, cugnà de Mario Klein. Se semo incontrà a un casèlo del Visentin e par mi sta tapa l’è stà inportante quanto e anca piassè de chela de Teano tra Garibaldi e Vittorio Emanuele II. El nùmaro de Quatro Ciàcoe, indò è vegnù fora el me primo articolo, lo go qua su la me scrivanìa e l’è el n° 11 de novenbre 1992. Se trata de la me prima létera de la serie, letera che gavéa scrito nel 1983 par ’na rivista musicale indò recitava l’atore veronese Tiziano Battistoni. Da alora no go pi petà lì de scrìvar articoli, tanto che ghin’ò contà 215 co chel de Nadal de sto ano.
In te la me cantineta – indò vin e leteratura i fa l’amore – i 215 nùmari de Quatro Ciàcoe i è ben sistemài in scatoloni e me li tegno cari cofà l’oracolo.
Quando Dino Coltro el ga presentà, nel 1994 al chiosco de Coalonga, el me primo libro de le “Lettere”, da Padova è vegnù zo Francesco Dalla Pietra a farme el servizio fotografico. Luigi Perini lo go ’vù viçin, inveçe, a la presentazion de “Longo el me sentier”, ’n’antologia de scriti e de poesie in dialéto e in talian. Insoma, Quatro Ciàcoe el m’è stà senpre viçin come mi lo son stà con lu!
De sti 20 ani de scriti, go de i ricordi assè particolari. Intanto son partìo che gavea 54 ani e ’na cavejara da farghe concorenza a Elvis Presley; ’desso, inveçe a ghe somejo senpre pi a Yul Brynner, se non a la Piaza Costituzion del me paese.
Go senpre te ’l core l’amigo Dino Durante, col so dialéto s-ceto e un fià “osé”, ma senpre fresco e alegro. Mario Klein el çercava de tegnèrlo par le brie, ma Dino l’era un caval assè difìçile da domar. Con lu mi go ’vù ’n’amicizia par létera e soratuto soto Nadal par i auguri… I mei i era un fià massa seriosi; Dino el me mandava inveçe el so bilieto personalizà, disegnà da lu, co angeleti un fià stranbi che volava par volta insieme a osei… pi stranbi ancora de lori. Lu l’era senpre te un canton, adobà cofà ’n àlbaro de Nadal, co le so candelete inpizzà e i bafi longhi fin quasi par tera.
I so bilieti li go tuti mucià te ’l me racolitor indò tegno le relichie pi care.
St’altro personagio che ricordo co afeto l’è la Irmeta, al secolo Irma Dalle Molle Reagan. Fin a calche tempo fà, la Irmeta la mandava i so articoleti che i era assè originài, anca se un fià difiçili da capir, parché la doparava un dialéto visentin vecioto, incalmà col merican: el “slang”. Te sentéi che la ghe metéa l’ànima te ’l scrìvar, ma a un çerto ponto l’era come se ’na rosta la se metesse davanti al so dialéto e alora ela la se rangiava nando ’vanti co la lengoa de so marì: Reagan (no Ronald, ex presidente de i Stati Uniti, ma Wendell). Mi me piaséa da mati la so maniera de scrìvar, cossì go mandà a Q.C. ’na létera-articolo da publicar che se intitolava “Cara Irmeta”. In sta létera mi me dichiarava so amirator e, cossì par scherzo, ghe diséa che se no la fusse za stà inpegnà co Wendell, gavarìa fato un colpo de testa. Dopo, la Irmeta la me ga risposto e semo nà ’vanti un tocheto. Par esenpio da Jonesboro (Arkansas, Stati Uniti) la me scrivéa, senpre in maniera scherzosa: “Enzo, puoi admirarmi liberament perché, desso che me marito Wendell l’è ’n po’ più vecio, el ga smesso totalmente de copare i miei numerosissimi admiratori col so s-ciopeton longo. Infatti, desso el se limita a sbararghe ai zenoci e basta. Sinceramente yours, la Irmeta Dalle Molle Reagan.”
A la fine de le letere la scrivéa: “Saluti cari da me marito Wendell, chel ga ben capio il tuo spirito de amicizia simpatic. Saluti anche a to mojere, che son sicura, altrettanto la ga aprezzà il tuo senso de amicizia verso la Irma Dalle Molle Reagan.” Te ’na so létera-fiume, la Irmeta la me scrivéa riguardo a Q.C.: “La roba che più me dispiase? Che fin dal Genaro 1999, non son bona de ricevere Q.C. come prima. De rife or de rafe. Il che significa, per me, non ricevere ’n tocheto de Italia, mancanza de amici che lezevo avidament and completament ogni mese… ’n tocheto del mio cuore è ferito inexorably, priva de la compagnia de ‘Quatro Ciàcoe’. Sì, continuerò a scrivere e mandare le mie storietes, sì, continuerò a sognare de fioriti e spumeje, de bambolete de mud e cagniti mori e bianki e cieli blue e lispo verde and brown earth beneath my bare feet… Sì, caro Enzo. Grassie, thank you very much, Enzo Coltro. Thank you per le beautuful parole che te si stà cossì gracious de scrivere e che me ga portà ’na fià de air freska da la me Italia beloved and missed… Grassie, Enzo. I LOVE YOU, ITALIA.” La go senpre te ’l cor la Irmeta, anca se dovéa spesso torme in man el vocabolario par capir chel che la voléa dirme. E forsi ghe voi ben propio par sto motivo e soratuto par el so sforzo de restar a tuti i costi tacà a le so raíse, par el so orgolio de èssar Italiana.
Giovedì 8 dicenbre passà go fato el possìbile par èssare a Padova, ma pare che ’l destin, sti ultimi tenpi, el se daga massa da far par mandare a ramengo i me apuntamenti pi sentìi. Prima un disturbo fastidioso che no ’l vol lassarme e dopo se ga messo de mezo anca i treni. El trato San Bonifacio-Padova pare che ultimamente no l’esista: prima el siòparo, dopo la bonba catà a Brescia, insoma, roba da mati! Cossì no go podù èssar presente a la consegna de la targa che Q.C. me ga assegnà. La ga ritirà l’amigo Toni Corain, che sèito a domandarme come el sia riussìo a rivar giòvedi fin a Padova, visto che s’èrimo lassà a la stazion par tornar a casa senza speranze de catar un treno. Me son comosso quando la go ’vù tra le man, la targa, e par questo ringrazio i amiçi de Q.C. che ga vossù ricordar i me vinti ani de fedeltà a la rivista. Bela, tre olte bela sta targa, che tegnarò come uno de i riconossimenti pi anbìi che gabia ricevù.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Ano novo, vita vecia?
Sarà ben métarselo in testa da sùbito: l’ano ’pena rivà el sarà novo solo par modo de dire. Dovaremo pensare a “riciclare” tante usanze e sistemi de vita desmessi, fin ’desso tegnù in mente propio da chi, come noantri, se òcupa de tradizion e memoria
de Mario Klein
Da Vicenza
Maestra e scolari
insieme dopo pi de trent’ani
de Pasqualina Galvanin
|
