Notissie padovane

L’I.R.A. canbia nome

El tavolo de le autorità intervegnù al convegno.

11 novenbre 2011, festa de San Martin. A la Casa de Riposo I.R.A. (Istituto Riposo Anziani) de Padova, na gran festa pa i 190 ani de servissio nel curare e sostegnere i ansiani de la nostra sità. Un convegno verto a tuti: “Dalla Carità all’assistenza qualificata: i 190 anni dell’I.R.A. per Padova”. 190 ani passài da quando nel 1821, nel vecio Convento de Sant’Ana, Casa de Ricovero e de l’industria, se curava e se assisteva i puareti de la nostra sità.
In te sti ultimi ani, go vudo modo de ’ndare e vegnere dentro sta Casa de Riposo parché ghevo na zia ospite, morta in agosto de l’ano passà, curà e assistìa co amore e rispeto, e xe proprio quelo che xe saltà fora ne i vari discorsi de le autorità che ga parlà. Sta casa no xe là solo par tignere drento ste persone, par spetare che le passa a milior vita, ma par seguirle e curarle co amore, faséndole sentire inportanti anca se magari calcheduna no xe presente co la testa, rispetà e vussùe ben da tuti. Lavorare là drento, la xe na vera mission, bisogna avere un core grando e sta casa la xe uno de i ricoveri pi grandi de la nostra sità.
Al convegno par primo ga parlà l’assessore Di Masi: el ga portà el saludo del Sindaco e de l’Aministrassion Comunale, disendo che l’IRA in te sti 190 ani ga savudo tigner conto, ne l’ospitare i nostri ansiani, del canbiamento de i tenpi, caminando insieme a i ospiti. Cussì se ga adeguà nel védare la zente vìvare piassè, ’ndando incontro a le nove necessità e esigense, canbiando el tipo de assistenza perché la zente la xe pi in ganba e creativa: no solo bisognosa de assistenza, ma anca bona ancora de dare calcossa a la socetà. El ga ringrassià a nome de tuta la sità el personale infermieristico e gestionale de l’istituto.
Xe vignù dopo el turno del Responsabile de i Servissi Sociali de l’ULSS 16, el dotor Francesco Costantin, che ’l ga ricordà la colaborassion che l’Istituto ga vudo e continua a ’vere co l’Ente Ospedaliero, e come, insieme, i serca de ’ndare incontro a le necessità de i ospiti pi bisognosi de cure. Ga vudo po’ la parola el Sen. Tino Bedin, Presidente de l’IRA, che ’l ga ricordà come, fin dal primo Regolamento del 1821 al pi recente Statuto, no ghe xe solo el canbiamento de la socetà co i relativi bisogni de le persone, in meso ghe xe la Costitussion de la nostra Republica (che festeja i 150 ani de l’Unità d’Italia). Infati, l’IRA el xe un servissio previsto e vussudo da lo Stato, un servissio quidi “republicano”. El Presidente el ga finìo cussì el so intervento, disendo che na volta par l’IRA i veci jera inportanti, ma incò i ansiani i xe bisognosi de atension particolari e no solo de cure parché “no xe inportante slongare la vita, ma dare vita ai ani!”

El Beato Pellegrino.

El prof. Francesco Bianchi, de l’Università de Padova, el ga presentà la figura del Beato Pellegrino a Padova, personajo che darà el novo nome a l’IRA: sto Istituto se ciamarà “Centro Servizi Beato Pellegrino” (proprio le costrussion che ga sede in te sta via, dove na volta ghe jera le Picole Suore dei Poveri). La xe na storia interessante quela de sto Beato parché go savùo robe nove su na figura padovana na s-cianta trascurà e poco conossùa. Mi, ne la me ignoransa, pensavo come tanti, che Pellegrino fusse el nome de sto Beato, invesse sto omo el se ciamava Antonio Manzi o Manzoni, de na fameja siorota de Padova, vissùo al tenpo de Ezelino da Romano. Se dise che fin da putèo, za a diese ani, el ghesse lassà la fameja par vìvare ne la povertà, par seguire e jutare i puareti, spartindo co lori le elemosine che ’l tirava sù nel so peregrinare. ’N altro pìcolo San Francesco, anca se no ’l jera un frate reigioso. Par tre ani el se gheva fermà a Bologna da un vecio prete dove che ’l ga inparà a vìvare secondo el vangelo. El ga girà fin a Roma par visitare i posti del cristianesimo, digiunando e pregando, el xe rivà fin a Compostela e po’ fin a Colonia. Dopo sique ani vissùi come “Pelegrin”, vivendo de carità, el torna a Padova dove i so parenti no i lo ga pi volesto co lori. Abandonà da tuti el xe morto pressapoco a 28 ani e sepelìo nel monastero de S. Maria de Porciglia. Par el gran ben che ’l gheva fato, la zente lo considerava un santo, tanto xe vero che nel giro de poco tenpo el gheva fato na straje de miracoli.
Davanti a sti fati miracolosi la popolassion ga dimandà de farlo santo subito, ma sicome no ’l jera un religioso, el Papa del tenpo ga tajà curto, disendo che Padova gheva za un Sant’Antonio e che do i garìa fato confusion: par nialtri Padovani el xe comunque restà el Beato Pellegrino.
Senpre de l’Università Patavina ga parlà el prof. Giovanni Silvano sul tema “L’Istituto dentro la città: assistenza e società civile negli ultimi due secoli”. El ga dito che ne i secoli passà jera solo la Cesa a pensare a i emarginati co le Opere Pie; col tenpo, però, la socetà civile se xe resa conto che jera proprio el Stato che gaveva da torse sto carico. E cussì xe stà, sia pa’ i Ospedali, pa’ la scola, pa i orfanotrofi e, in gènere, par l’assistensa a le persone in dificoltà. Poco spassio ghe xe stà par la Segretaria Generale, Sandra Nicoletto, par tirare le conclusion: la se ga limità a ringrassiare i presenti e in particolare na sbrancà de tosate de l’Istituto Professionale “Leonardo da Vinci”. La ga dito che i zóveni se ga da rèndare conto de la fadiga, de i sacrifici e del lavoro che l’IRA ga fato in te sti 190 ani e come dovarà èssare le nove generassion a continuare sto servissio par la dignità de le persone.
Par l’ocasion, le Poste ga autorizà un anulo particolare e a i presenti xe stà oferta na cartolina co tanto de francobolo e anulo speciale.
Par conpletare sta ricorensa, el 25 novenbre xe stà ricordà el sentenario de la Sede Aministrativa de l’IRA, el pensionato Piaggi de piassa Mazzini, vussudo e realizà nel 1911, pa i 50 ani de l’Unità d’Italia, da la Cassa de Risparmio de Padova e Rovigo.

[torna sopra]