Da Vicenza

Maestra e scolari
insieme dopo pi de trent’ani

Prima: la maestra Pasqualina Galvanin e la so classe.

Na volta tornà da la montagna, a la fine de agosto de l’ano passà, ’te la posta go trovà on bel fojo de carta rodolà, co ’l me nome scrito insima. No ve digo la me maraveja quando che lo go verto e lo go leto. Gera i scolari de on grupo de le elementari, nati ’tel 1967, che se stava organisando par catarse fra de lori e co la maestra.
El me core ga fato on salto de gioia!
Sùbito go scominsià a pensare a chei toseti e tosete co i quali gavevo vissudo quatro ani de la me vita de maestra a Villaganzerla.
Qualche giorno dopo xe capità a casa mia la Chiara, na bea siora, mora, gentile, soridente, za mama de na tosa de 24 ani. Così ga vudo prinsìpio la me granda aventura.
Sti toseti de na volta i xe riussìi a métarse tuti d’acordo par trovarse la sera del 21 otobre 2011 a la tratorìa Alla Grotta de Nanto.
In do i xe vegnù a torme a casa mia. Lorenzo lo go riconossudo de paca, ma la Patrizia nò e la go scanbià par so mojere. E questo, dopo, ga fato rìdare tuti.
Có semo rivà al ristorante ghe gera za on muceto de “done” e de “òmeni” che, co splendidi sorisi, i me ga acolto, scanbiàndose basi e struconi.

Al centro de la foto (vestìa de nero), la maestra e i scolari: adesso…

Cari i me toseti de alora, i xe deventà “signore” e “signori” de 44 ani. Qualchedun go capìo suìto chi che ’l gera; a qualche altro go dovudo domandarghe: “Ma ti, chi sito?”, dispiaséndome tanto de no fàrghea a indovinare. Ma la xe cussì, co i ani lori i xe canbià. Mi invesse i me ga suìto riconossuda e i continuava a dirme che jero senpre quela. “E le rughe?” ghe domandavo mi.
On po’ a la volta i xe rivà quasi tuti: Massimo, Lorenzo, Marina, Tiziano, Diego, Eriberto, Davide, Stefania, Chiara, Ernesto, Luigi, Simone, Gabriele, Patrizia, Nicoletta, Loretta, Sandra, Milena, Marco. Mancava Mauro e Paolo, ma i gera giustificà. E xe stà na continua cascata de saludi, de conplimenti, de basi. El beo xe stà che gnanca lori no i se riconosseva pi, specialmente co la Marina: có la xe rivà, tuti xe restà inbanbolà a vardarla, sensa capire chi che la jera, tanto che la ga dovudo dire: “Son la Marina!”
Xe stà proprio come on uragan de alegrìa, de emossion, de gioia par èssarse catà de novo.
Che belo védare tuti sti me bei scolari sentà a tola che ciacolava fra de lori, che i se la contava de la so vita, de i so fioli, del so lavoro. Tuto questo alternà a i “Te ricòrdito?”, al domandarme “Che scolaro gero mi, maestra?”…
E dopo xe vegnù le diapositive che ga fato vegnere inamente tanti momenti e tenpi de i quatro ani vissudi insieme. Eco la stanpa del giornaleto co “matrici, stilo, telaio, rullo”, le “uscite” par conóssare e esplorare el teritorio, le gite (Assisi, su la neve…), la musica sonà co ’l flauto e la canta Pucipo, che gera deventà quasi el nostro ino. Ghe gera anca on albo de fotografie de i quatro ani, che ricordava ’ncora altri momenti de la vita a scola. Gera emossionante védare come che i se ’a godeva a tornare a la so vita de putèi, ricordando i mominti toghi ma anca quéi seri, le amicissie, le logiche barufete, le conquiste, i lavori fati insieme…
E la maestra? Mi gero tanto emossionà, ma me sentivo dentro tanta gioia, tanta serenità parché me pareva de ’ver la conferma che el me lavoro de maestra, fato co tanto amore, gavéa dà i so fruti e gavéo jutà chei putèi a donarse a la vita co prinsipi ciari e sani. Da i discorsi che i faseva, go capìo che jera vero. E de questo go ringrassià tanto lori e ancor de pi el Signore.

[torna sopra]