Da Maran Lagunare (UD)

Istria Romantica

I istriani i scanpeva duti qua de nantre…

Go inamente che in tel ’53, co ’l governo provisorio Scelba, no se saveva ancora a chì ghe fussi tocada Trieste… che, i istriani i scanpeva duti qua de nantre parché i veva paura de Tito, del comunismo; mi li vardevo co i oci par tresso. Gero rabioso parché ’pena che i riveva, luri i godeva un saco de privilegi: pachi de magnà, case con l’aqua de beve drento e sussidi, intanto che nantre stévomo drento case ingiassàe e piene de pelagra, oltra che patìvomo la fame. Eco, vedendo ste robe, contrariò, disevo: “No xe giusto che luri i gabia tanto e nantre gnente… i podeva sta a casa sua e no vignì a scrocà in Italia.”
Co’ podevo savè, povro fiol, mi che vevo fato ’pena la quinta elementare e no vevo leto nissun libro de storia. Ne xe passài sessanta, e sol ’desso che go ciapò in man “Istria Romantica” de Elsa Bragato (Edizioni “Italo Svevo”, Trieste, 1977, pag. 198), me rendo conto de le rasòn che veva i istriani, del parché che ’l nostro governo li juteva, capì parché co i gereva rivài a Maran i parleva squasi come nantre. Figurémose! dopo duti quìi sèculi che i xe stai soto la Repùblica de Venessia: par forsa i veva de parlà come nantre!
Ma a colpime de più, lesendo el libro Istria Romantica, xe stò el fato che tanti sèculi prima gera stai paruni i romani, de l’Istria Dalmata, e se parla ancora del 178 a.C., un giosso dopo che i veva montò Aquileia. Lese che i romani xe stai paruni ancora oto sèculi dopo nato G. Cristo, la xe stada na granda sorpresa. Almoto, de quel che xe scrito, la zente istriana e dalmata la steva sai ben con luri; oltra a custruì palassi e munuminti, li ga fati gode benèssere e un saco de altre robe. Sol dopo, colpa i Longobardi, gereva rivài sèculi de miseria: l’Istria la xe tornada a esse na tera incivile, anca parché gera tornàe le piraterìe. Sta roba la ga durò fin che pian pianin i istriani ghe xe capitò de cognosse la zóvene Repùblica de Venessia. Par dì el vero, i primi contati con Ela no i gera stai buni, sol dopo i veva tacò ciapà pianta e, conpagno che gereva capitò sèculi prima co i romani, na volta che i veva tacò fidasse de la Repùblica de Venessia, i istriani i ga scuminsiò a sta ben.

Libro verto, verso sèculi con la scrita Pax tibi Marce evangelista meus.

Soto la protessiòn del Leon de S. Marco xe tornài a fiorì i comerci verso el mar e con l’aiuto del sal xe scopiada la richessa; aspeti architetonici, gniova aministrassiòn e niovo modo de fa cultura, diventando in poco tenpo na perla de la stessa colana. Purtropo, dopo tanto ben e vive in santa pase, xe rivò Napoleon, a ribaltà la milenaria Repùblica Venessiana e cussì, dopo esse stai par sèculi ben con Venessia, oltra spànde làgreme, a i istriani-dalmati no ghe xe restò altro che sercà de tignì conto i Leuni che, deventài nigri dal tenpo i continua fa la guardia sora le antiche porte col libro verto verso sèculi con la scrita PAX TIBI MARCE EVANGELISTA MEUS che ne piase interpretà… “troverai la pace nella verità”.
Eco, co veva governò i romani e i venessiani, la zente de l’Istria-Dalmazia la ga vivesto come siora. De na roba semo sicuri e lo disi la storia: intanto che le altre nassiòn le xe ndàe pa ’l mondo sol par robà, sfrutà la zente del giogo, portà via le òpere de valor, nantre taliani, lassò in banda un serto periodo pitosto negro del secolo passò… tacando da i romani semo ndài senpre in ziro par custruì; ’mo portò pa ’l mondo cultura e bele òpere e sta roba no la xe de poco conto. E par mi el pensier de fa parte de sta granda nassiòn “Italia”, xe na roba che la me inpignissi de orgolio.

[torna sopra]