Da Isola Vicentina (VI)

Assisi, on mondo de fede

La Basilica de Assisi, capolavoro de arte e fede (1228-1230).

A pare inpossìbie, ma la càpita senpre cossita ogni volta che vao da calche parte: la note, invesse de star chieto, me par de èssare tacasù a mèsa aria fra ’l vodo de ’a càmara e le cuerte del leto, insieme a sento pensieri che i sèita tormentarme. E pensare che la matina drìo a le sìe, sarìa partìo insieme a quarantaoto persone in pelegrinajo par Assisi, el posto pi santo del mondo, regno de amore e de orassion de San Francesco. Nonostante el travajo de ’a note, a le sìe in punto la coriera co tuta ’a so còngrega xe partìa par la so destinassion.
Speta, quasi a me desmentegavo che so sti tri dì che gavarìssimo vivesto a Assisi, el pàroco de Isola Vicentina, don Flavio, ne gavarìa fato da guida spirituàe e, come pa’ rincoràrne, so na streta de man e on largo soriso, el ne ga augurà bon viajo.
’Pena passà l’Emilia Romagna, invesse de nar in autostrada, l’autista xe ’ndà rento na superstrada fra ’l verde slusente de i Apenini, che ne ga fato tocar co man la beessa de ’a natura de na primavera in fiore. Quanto jera fantàstico sto paesajo co ’e so verdi montagne... Dopo ’ver passà la Toscana e rivà in Umbria, la nostra guida evangelica ga saesto catar ’e paròe juste pa’ nar rento on camin de fede so ’e òpare de ’a vita de San Francesco. Rivà a destinassion, par prima roba semo ’ndà visitare el Convento de Rivotorto, cossì ciamà par chel rìvolo de aqua che a zighe-zaghe ghe gira ’torno t’on modo storto.
Sto gran Convento, che ancora ’desso xe ben mantegnù, el ga ciapà rento la vecia capana che San Francesco e i so conpagni ghéa costruìo, doprando ’n vecio rùdere de casa, come xe stà fato a Santa Maria de i Angeli co la Porziuncola.

San Francesco e Santa Chiara, do eterne testimonianze che ga canbià la storia del mondo cristian. (foto dal libro Assisi: arte e storia nei secoli, ediz. plurigraf)

La comossion xe stà granda ’tel scoprir che ognun, in te sto tugurio, se ghéa costruìo la so grota de sassi, bastansa destacà una da l’altra par no disturbarse ’l pregare. Lì, San Francesco ga istituìo le prime règoe del vìvare da francescan. ’Lora, sensa acòrzarse, a man zonte Don Flavio ne ga fato pregare so ’e Laudi de San Francesco:
“Ti ringraziamo, Padre Santo, perché nel Tuo amore hai creato il mondo. Tutto Ti rende grazie: il cielo e la terra, la luce di questo giorno, la nostra gioia di vivere, dono meraviglioso venuto dalle Tue mani. Grazie, Signore, le mani, gli occhi, il volto, il cuore e la mente: tutto ci rende capaci di parlare e di incontrare gli altri, per divenire un segno di comunione e di amicizia. Siamo dono divino di vita e di amore. Grazie, Signore...”
I xe stà mominti forti, difarènti dal vìvare de ogni dì e, dolse e sereno, go sentìo ’n arfio rento de mi, so ’l visitar de sti posti che ga donà emossion so ’n girotondo de Fede, de Arte e de Cristianità: a Santa Maria de i Angeli co la so sacra Porziuncola, so l’imensa basìlica de San Francesco, sensa lassar indrìo chel fior profumà de Santo Spirito che xe San Damiano, la cesa e la casa de Santa Chiara. Invesse, insima l’èremo me so’ sentìo ciapar par man, infra chée stretoje scalinà de prìa che me ga conpagnà fin a la grande Crose in meso al bosco indove, in ricordo de ’n dì lontan, go dimandà a San Francesco de deventar pi bon. Mominti forti, ricordi distanti, che no se pol scancelar.
Có xe rivà l’ultimo dì, i oci de l’ànema jera colmi de grassia e de la storia de sto gran santo, ’lora, có se ghemo destacà da Assisi e da tuto sto ben de Dio, on po’ de maìnconia ratristava ’l nostro core, ma no tuto gera conpìo de sto pelegrinajo: l’ùltimo saludo a San Francesco lo gavarìssimo dà, visitando ’l monte de la “Verna” (ciamà anca co ’l nome de “Inverno”).
Sto Santuario, situà a 1170 metri in meso al bosco, el xe sircondà da ’n mistero de misticismo. Difati, dopo du ani de ’n pregare co tanta devossion, el Signore ga premià el Santo, donàndoghe le sacre Stìmate, segno ’nconfondìbie so man e pìe de i segni de i ciodi de la Crose.
“’Desso – go pensà – el camin jera conpìo.”

[torna sopra]