|
Editoriale
Pace… Pace… Pace…
El mondo ga assolutamente bisogno de pace. Senza la pace l’omo so sta Tera el ga i giorni contà, anzi, la Tera stessa ga i giorni contà! La guera la xe na sconfita par l’umanità, parché la porta solo violenza e morte. La pace no se otiene con la guera, ma… con la pace!
 | | Na sèna de guera in Siria (foto da Giornale Siracusa). |
Questo xe propio el momento de augurarse de vero cuore: “La pace sia con te”; semo drio ’traversare on tenpo tuto in salita e se sa che vegnere zo, ogni santo iuta, ma nare sù la ghe vol tuta! Purtropo, on fasolo, par quanto che ’l boja, no ’l deventarà mai on ovo; la pace par quanto la invochemo, no la sarà mai tale se no canbiemo el conceto che ghemo de la pace.
Ne la pi parte de i casi, se pensa che la pace sia soltanto el contrario de guera, quela fata co le armi, par intèndarse. L’idea in parte la sarìa anca giusta, ma la xe inconpleta. E inconpleti xe i “comitati per la pace”, i “istituti di ricerca e studio per la pace”, le marce, le dimostrazion con mega-raduni, i girotondi, le bandiere a le finestre, le scrite su i muri…
Tuto belo, tuto juta a far nàssare o a far créssare la cultura de la pace e de la non guera. Ma xe ’ncora poco. Bisogna partire da la scola, educando i putèi a la convivenza e al nare d’acordo co l’ùltimo rivà in classe, che ga i oci a màndola o el colore de la pèle come el cul de la ramina. E xe ’ncora poco, parché a scola ghe vien parlà de pace e dopo, có i varda la television, da i cartoni animati in su, la xe guera, omicidi e copamenti.
A scola a i putèi ghe vien insegnà el rispeto, la non-violenza, e dopo, a casa, ghe toca assìstare a discussion pesanti, se no la va a finire in pezo, tra mama e popà. In cesa, a dotrina (s’i ghe va!), in patronato vien parlà de fare i boni, de volerse ben, de conportarse senpre in modo serio e dignitoso, secondo i princìpi cristiani, po’ i va casa… nissun che va Messa, biasteme, musi duri e bareta fracà, mai na parola che riguarda l’ànima, la fede, i valori, la memoria, i diriti e i doveri verso i altri, el vero significato de la libertà, che no vole dire fare tuto quelo che se vole…
La fameja, la socetà, la parochia, la strada, la tivù… le ga da deventare strumenti de pace, istituzion de pace individuale e coletiva ma a tenpo pieno, senò xe inùtile (o quasi inùtile) parlare de educare a la pace fin da i primi ani de vita. La pace bisogna vardarla con oci fissi… no con un ocio che varda le verze e st’altro i bròcoli!
“Una catena di impegno per la pace unisca tutti gli uomini e le donne di buona volontà” xe stà el messagio de Papa Francesco, lancià in ocasion de la giornata de preghiera e digiuno per la pace, alzando la voce parché se possa fermare el “rumore delle armi”. No xe l’ataco militare che ofre prospetive de speranza par risòlvare i problemi de sti giorni in Siria, ma l’incontro e el dialogo.
Vardemo a l’ondata de terore che se ga scadenà inte ’l mondo in sti ùltimi tenpi. La strategìa de i atentati la xe quela de inpedire che el mondo islàmico moderato, quelo che zerca de métare da parte l’integralismo religioso, el vègna a pati co l’Ocidente. Do Stati, do pòpoli che va d’acordo fra de lori, el ghe dà fastidio a on terzo, violento e fora de testa, che el fa de tuto parché no possa èssarghe né acordo, né pace. Purtropo, la zizania de la paràbola evangèlica la infesta oncora el fromento e la fa de tuto par sofegarlo.
Convinti, dunque, che el pericolo de guera el xe senpre drio l’angolo: metémose de inpegno tuti nel deventare protagonisti del necessario processo de educazion a la pace, magari diséndose: “mi posso èssare la pace”, “anca mi posso far scopiare la pace”.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Pace… Pace… Pace…
El mondo ga assolutamente bisogno de pace. Senza la pace l’omo so sta Tera el ga i giorni contà, anzi, la Tera stessa ga i giorni contà! La guera la xe na sconfita par l’umanità, parché la porta solo violenza e morte. La pace no se otiene con la guera, ma… con la pace!
de Mario Klein
Da Verona
Guai a parlar el dialeto
de Giacinta Dall’Ora
|
