|
Da Adria (RO)
Canarèo
 | | Da la banda del canale scuminsiemo co na serie de casete tute colorà cofà quele de Muran… |
Na volta jera più fàssile distinguere i borghi e i quartieri inte la mi cità, ma al giorno d’anquò co i novi svilupi, la case, le vile, le strade i à portà tanti canbiamenti che le robe de na volta no le riconosse più. Ciapemo per esenpio Canarèo. Soto sto nome passava un bel tòco de cità in meso a do rami del canale, chi ’ndava a riunirse in Punta Canarèo e la via d’i carabinieri faseva da terso limite del triangolo. Naturalmente jera conprese parece vie, vicoli, slarghi, piassete, corti, riviere che, magari, ormai i à canbià nome e forma. Defati el Canalin l’è stà stropà e al so posto ghè Corso Garibaldi. Ma se dal Corso se butemo un fià in dentro catemo, a pètene, Vicolo Santo Stefano, Corte Cerchi, Via Macello Vecchio, Vicolo Canareggio, Via Sette Camini, che va tute dentro el borgo e da ultimo Vicolo del Passatore, che porta fora su Via Leonardo da Vinci, na strada che porta fora Adria e che na volta n’esisteva. Lassémola in parte par girare su via Canareggio, via Squero e riviera S. Andrea, dove catemo vicolo Lucchiari e dopo, girando ancora a sinistra se femo Via Terranova, che a metà incrocia via Corridoni, la spina dorsale del borgo, par catarse da novo in vicolo S. Stefano.
No se cunta le corti e i vicoleti, squasi tuti sensa nome, che parte dal Corso e more raquanti metri verso l’interno. Se se resta par fora sensa inoltrarse in vicoli e vicoleti, come Borgo Forzato, no se ga la sensassion de quelo che jera el Borgo na volta. La stragrande magioransa jera casete a un piano. Al so posto anquò se cata squasi tute costrussion a do piani, sensa cuntare chela feta de polenta de sinque piani dove, al piantereno se catà un supermarcà, che l’è stà el primo in Adria, anca se ’l gheva alora altro nome e altri paroni. Da la banda del canale el canbiamento l’è ancora più grande: scuminsiemo co na serie de casete tute colorà cofà quele de Muran par continuare co altre ch’à perso la fisonomia de quelo che le jera na volta e catare a l’altessa de via Squero nantra fetina de polenta che, essendo pitosto streta, la dà l’inpression de far fadiga a star in piè. Pi avanti ghè na serie de condominî che, forse, à fato più belo el borgo, ma no i lassa pensare a la mura e l’oficina del “Caterpillar service” ch’a gh’jera subito dopo la guera quando ch’à scuminsià a girare i Dodge e le Jeep lassà da i americani. Jera i tenpi che i canaroi andava ancora a caresina, a careto, a cana co le so barchete a dopia prua. E co no gh’iera erba int’i fossi, in vale, inte le maresane i canaroi i s’inzegnava a pescare tenche, rinati, bisati e caifa co i tramaci e co i balansini.
Quìi ch’a restava in tera i faseva balsi e inpajava careghe. La paja jera in efeti la caresina messa a secare: i faseva d’i manèi, verzéndoli a ventajo destirà in tuti posti pussìbili: davanti a casa, int’i slarghi, inte le piassole, insuma indove ch’a gh’jera un fià de posto, tanto è vero che caminare pa ’l borgo la jera n’inpresa. Co le cane i faseva le grisole e gh’jera apunto na fàbrica propio inte ’l posto dove anquò se vede le casete colorà ch’ò dito prima. Co i penaci se faseva le scoe, quele più lesiere, o i scoeti da spolverare. Co le erbe più grosse e consistenti se preparava le stuore, che le serviva p’r un fraco de robe: in casa, de fora e parfin in barca. Insuma, anca se i schei i jera senpre pochi, el lavoro no ’l mancava.
E po’ gh’jera anca zente ch’a se rangiava, andando a tòrsene dove ch’a gh’in gera: legna in canpagna, galine int’i ponari, ua, pumi e piri diretamente dal produtore, sensa domandarghe el permesso. Ogni tanto qualchedun de sti soci feniva al fresco, ma dopo la rinfrescà i tacava da novo. L’è restà famoso un personagio che avendo fregà na cavra l’è stà portà davanti al pretore. A la domanda: “Voi avete rubato la capra?” el ga risposto: “Mi no, sior. Ò solo catà un tòco de corda, a l’ò sunà sù par ligarme le braghe e solo có so’ rivà a casa me so’ incorto ch’a gh’jera na cavra ch’a me tegneva drio.” Naturalmente tuti i è s-ciopà da rìdere, pretore, avocati e pùblico, tanto che ’l pretore l’è stà costreto a darghe na multa da poco, parchè na bòta de genio come quela no la meritava de fenire in galera.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Pace… Pace… Pace…
El mondo ga assolutamente bisogno de pace. Senza la pace l’omo so sta Tera el ga i giorni contà, anzi, la Tera stessa ga i giorni contà! La guera la xe na sconfita par l’umanità, parché la porta solo violenza e morte. La pace no se otiene con la guera, ma… con la pace!
de Mario Klein
Da Verona
Guai a parlar el dialeto
de Giacinta Dall’Ora
|
