Da Lendinara (RO)

La prima lezion de geografia

La cesa de San Biagio a Lendinara.

Che el mondo el canbia a ogni pissà de can el xe un fato incontestabile, anca parlando de scuola. Tanto par scuminziare, la roba ca salta più a l’ocio la xe senz’altro la data de l’inizio de l’ano scolastico che na volta la cascava el 1° Otobre, par tuti, nissuno escluso. No’ contava che uno el stesse in Veneto o in Calabria, el giorno de San Remigio, senza né are né stare, a se partiva, “busta” o cartela in man, (zaino par i manco veci) o sinò co’ qualche libro e quaderno inzengià da le fasse de goma o de altri materiali, a seconda de la scuola ca se faseva.
Fin al ’77 xe stà cussì, dopo pare che i vari ministri i gabia fato a gara su chi ca brincava la data più favorevole a le esigenze... no’ se ga gnancora capìo de chi. No’ entremo intel merito de le riforme parchè no’ la xe materia par mi o mèjo, anca se qualche idea a la gavarìa, preferisso ’assar pèrdare, che tanto l’è fià butà via. I ani de le elementari i xe ’na fonte senpre viva de ricordi, soratuto par via de le maestre, tute suore, essendo l’Istituto Santa Caterina de Lendinara na scuola religiosa fondà inte ’l 1892, inte la parochia de San Biagio, da le suore de l’Ordine Missionario de la Nigrizia. L’Istituto el ga funzionà par più de zento ani, ’desso a ghe xe restà solo la scuola de l’infanzia e le suore le xe tute sparìe.

Suor Mariarosa, ’na vera artista, co i so scolari.

Ste maestre religiose, mi ghe n’ò ’vù tre: una par la prima classe, una par seconda, terza e quarta e n’altra par la quinta; le gaveva ’na forte personalità e le saveva come farse scoltare. Le jera tute gran brave, siben ogni una co’ la so materia preferìa. Suor Pedrina la jera specializà in aritmetica e suor Maria Rosa in italian e in disegno (la jera ’na artista, a go 'ncora in mente i so disegni co’ i gesseti su la lavagna). Solo una, che par fortuna la xe stà mandà via, la gaveva “metodi de corezion”, ciamémoli cussì, da farghe un bafo a zerti sergenti ca adestrava i soldà e el bruto jera che la passava tra i banchi e dove che la decideva, senza particolari rason, la ’ndava zo de bruto. Pare che la fusse esaurìa parchè obligà a farse suora, anca s’a xe difìzile crédare che qualcuno riussisse a piegare el caraterin che la gaveva. A parte questa che la xe stà ’na ecezion e che, comunque, la gavéa na preparazion universitaria e ’na cultura de tuto rispeto, noaltri scolari a se sentìvino senpre soto scóa ma anca cosiderà, uno par uno.
La suora de le prime classi, suor Liliana, la jera stà sielta aposta par la so dolceza in modo che i putini, ’ncora tenarini ca vigneva da l’asilo, i fusse “svezà” in maniera più materna. Me ricordo la abondanza del materiale “didattico”, che de sti tempi el scominzia a diradarse par la mancanza de fondi e che tanto el dipende da l’iniziativa e la fantasia de i insegnanti che, tra riunion, atività conplementari, canbi de classi, corsi e agionamenti, a ghe resta poco tenpo par far scuola e chel poco i ga da stare ’tenti a no’ fare qualcossa de sbalià, tipo un’ocià storta, un cònpito in più par casa, un voto ca no’ piase e via de sto passo. De tuta sta specializazion però no’ se vede gnancora i fruti: chi lo sa un doman, a se vedarà. Suor Liliana la jera zóvane e bela assè, in più la gaveva un modo de fare che parfìn me papà, che in chel periodo el me ’conpagnava spesso a scuola, el se jera ricredù su la ruspiosità de le suore. No ghe credarì, ma mi me ricordo ’ncora la prima lezion de geografia. La xe partìa disendo che in Italia ghe xe tante region, co’ i so usi e costumi e dove ca se produse specialità difarenti. E che prima de la lezion a ghe jera ’na sorpresa: dovevimo solo sarare i oci fin quando che la ne lo diseva ela. Quando ca i gavemo verti, a ghemo visto venti banboline in piè dentro inte na scàtola de carton che la suora la tigneva in man a mo’ de teatrin. Xe stà emozionante anca poderle tocare una a una prima da scoltare, da le parole che la suora la ghe inprestava, la descrizión generale del Paese, da la testa a i piè. A la fine la ne ga ricordà quanto ca semo fortunà a stare in Italia a difarenza de i “negreti de l’Africa” che i moriva de fame. Su questo, speremo che se possa darghe rason, anca in futuro, anzi speremo ca no’ ghe sia più nessuno su la facia de la Tera a morire de fame!

[torna sopra]