Dal Basso Piave (VE)

Loris Francesco Capovilla
finalmente Cardinal!

Mons. Loris Francesco Capovilla, ’desso “finalmente Cardinal!”.

Mons. Loris Capovilla riceve la “berretta cardinalizia” (foto Yuri Colleoni).

Trovo sensà riportar de i risvolti biografici del straordinario personaggio come Loris Francesco Capovilla che, a la bea età de 98 ani, à ragiunto el culmine de riconossimenti vaticani par ’e so doti de profonda umanità e operosità pastoral, otegnendo dal bon Papa Francesco ’a nòmina a cardinal.
Chi sta avanti de età, pol ricordar Don Loris, come vien el ciamà confidenzialmente da i venessiani in quanto più a streto e afetuoso contato, dato el so vissùo lagunar: dal comento del Vangeo da i microfoni de “Radio Venezia” dal ’45 al ’53; ativo anca come diretor de “La Voce di San Marco” e redator de “L’Avvenire d’Italia”. Altro çèebre praticante de ’a storica “Olivetti lettera 22”. Fra questi, anca mi: sensa çeebrità…
Ne a me prima intervista al Monsignor, presso ’a sede de l’Ordine dei Giornalisti, el frenava, discreto e riservato, ’a me curiosità. El spazio me inpedisse de elencar anca diversi altri inportanti incarichi assolti.
Ricordo na sinpàtica espression de ’a me Elda quando me ripeteva: “Don Loris, el nostro capo de l’Associazione Cattolica”, in quanto veneziana, conpresa del ruolo de associata come diligente colaboratrice del Pàroco de S. Pantalon.
Un percorso pastoral, el Suo, traverso un sècoeo, come vègne a registrar.
Nato a Pontelongo (Padova); studi in seminario patriarcal a Venezia dove vien ordinà sacerdote el 23 Magio 1940. Capelan militar destinà a l’ARMIR (el corpo de spedission in Russia), ma giudicà non idoneo “per salute cagionevole” (za riconossùa a Venezia). Ma el Signor ga visto ben, dato che ’l sta scalando quota 99. El vien, quindi, dirotà presso l’aeroporto de Parma par l’assistensa religiosa pa’ i uficiài e avieri, distinguéndose par evitar, (co gran ris-cio) l’internamento de i avieri da parte de i tedeschi.
A sto punto me permeto de inestar na sinpàtica létera de Loris Francesco Capovilla, datada Febraro 2008, a comento del me libro Voglia di volare: “Caro pilota giornalista, siamo imparentati: Io sono stato Cappellano Militare dell’Aviazione (1942-1943).” La formula che ’l usa, indirizàndome ’a corispondenza: Giornalista pilota Guido De Nobili.
Dal 1953, L.F.C. vien nominà segretario particoear del Patriarca de Venezia, card. Angelo Giuseppe Roncalli, eleto nel 1958 Papa Giovanni XXIII, seguéndolo fin a la so morte, el 3 Giugno 1963.
Altre autorévoi nomine: Arcivescovo de Mesembria (Bulgaria) in onor a Papa Giovanni che à rivestì quel titolo dal 1934 al 1953; Arcivescovo de Chieti e de Vasto; e dopo, Delegato Pontificio a Loreto. Vedi el caso che concorda co “la Madonna degli Aviatori”.
Capovilla resta senpre el punto de riferimento par quanti vol conóssar a fondo ’a figura de Papa Giovanni. Senpre façendo el possìbie pa’ tegner in secondo piano l’atension pa’ la so ùmie persona.
L.F.C., apena terminà el servizio come Delegato Pontificio a Loreto, l’à selto de abitar a Ca’ Maitino, che porta el sufisso “Sotto il Monte Giovanni XXIII”, in provincia de Bergamo.
Ricorde che durante un sinpàtico intratenimento presso la casa (che ospita na racolta museale custodìa da ’e Suore delle Poverelle). Stàvimo, fra familiari, dentro a na saleta de ricevimento, aredada modestamente co na tòea e poche careghe. La so prima espression (seca, corispondente al so tenparamento deciso) la è stada: “Parlemo in venessian!”
Come decoro, su ’a tòea, na scàtoea par racòliar oferte per un monumento da espor in paese. Come in seguito ò savù, i ga robà i schei. Al me disapunto el m’à dit: “Vol dir che ’l ’vea bisogno.”
La nostra fraterna amicissia, (che dura da pi de trent’ani), se mantien traverso un direto raporto coloquial, telefonico e abondantemente epistoear. Tuti i so libri scriti a memoria e gloria su Papa Giovanni li ò leti e ritorno su çerti riferimenti: siché me fa piaçer tegner sul cuor ’e dó distinte Personalità.
El nostro raporto se inpronta su na comun parteçipassion de ati umanitari: sia a favor de sogeti protagonisti de liete ricorense, trasmetendo la so voçe in cesa, par el piaçer e la comossion de i fedèi e a favor de i pàroci de ’e parochie de Musil par Don Saverio Fassina; par ’e frazion: Don Armando Durighetto a Caposil, tanto afetuosamente ligà co Monsignor in virtù… de l’età, terminà co 100 ani de… beatitudine, e Don Primo Zanatta, a Croce de Musil. Un raporto speçial el nostro, trasmetendo anca soidarietà e conforto co benedicenti espression a benefiçio de sogeti colpìi da penosi eventi.
Dovunque pol rivar ’a so parola e i so scriti, a favor de i bisognosi, el me coinvolge co tanta generosità, come in te ’sta létera: “Caro Signore, Grazie, Lei è amabile suggeritore di carità.” Riconossimento tanto gratificante che me inbarassa. Mi, nel me pìcoeo, nel riferirghe i casi rapresentativi de benévoea atension. Lu, trasmetendo a persona o fameja interessada la so benediçente parola de fede e sostegno spiritual.
Ma come me sente pìcoeo e inbarassà dove, con letera del 20 giugno 2013 el me scrive: “Caro Fratello. Adesso leggo e meno scrivo. Però salgo l’altare ogni mattina presto e durante il giorno mi accosto al tavolo di lavoro. Prego, amo, benedico. Resto vicino a Lei e alla “sua Signora”: simbolo di fede, di bontà, di letizia. Aff.mo Loris Francesco Capovilla.”
“Fratello” a mi? Un onor inbarassante par “Guido da Musil”. Ma fortunà de ’ver trovà un cussì caro e stimà “precettore spirituale”.
E ancora pi comoventi e coinvolgenti ’e létere datàe:13 novenbre: “Caro Amico Guido. La sua lettera del 9-11 e il testamento di Elda, 20/22-IX, vorrebbero un canto celeste come adeguato riscontro. Mi perdoni. Ho difficoltà di leggere/scrivere. Vivo e contemplo tutto nel mio animo. Sono con Lei e con tutta la compagnia familiare così bella, così buona. Celebro la messa. Amo e benedico: Vi abbraccio tutti, chinato sulla tomba di Elda. Vostro fratello e amico – Loris Francesco Capovilla.” E questa scrita “a le ore 10,30 del 21 Otobre. Con profonda commozione, assieme a Papa Giovanni, vengo a baciare la mano di Elda, a rigraziarla di essere vissuta con noi e di averci edificati. Tutti conforto e tutti benedico. Una nuova stella si è accesa nel cielo. Aff.mo L.F. Capovilla.”
Me scuso se durante tanti passagi tenporai salta fora riferimenti familiari che çerco de limitar, par quanto me riguarda. Ma, ’a storia va soportada par quel che conporta el so vissùo. Dito come norma de giornalismo serio.
Adess, però concludo ’ndando in gloria…
Conprensibilmente comosso par ’a so nomina a Cardinale, ma me sento pi confidenzialmente in sintonia col caro Monsignor Arcivescovo L.F.Capovilla, in virtù de tanta strada percorsa insieme ne ’e so variàbii.
Ècome rivà al 22 Febraro, seguendo in Tv ’a cerimonia de l’ordinamento de 19 cardinài, (3 sora i 80 ani, non eletori). Gnente da far par un contato teefonico, subito tentà co monsignor. Ò ripiegà co na létera al caro “Fratello Cardinale”. No m’à maravejà ’a so assenza dal cerimonial in Vaticano, ben conossendo ’e so condission (come prima ò riferì).
Me son cussì espresso ne ’a létera subito spedìa al Fratello Carissimo Cardinale Loris Francesco Capovilla. “Ella rappresenta un esempio ammirevole di umiltà e di abnegazione per l’operosità pastorale, come ha sottolineato nell’intervista, laddove afferma che ? Il cardinalizio non è dovuto soltanto a me, ma per tutti coloro che operano nella periferia, proprio come FRANCESCO sta mettendo in circolazione.” E sabo, primo marzo, l’à riçevù l’inposission cardinalizia da parte del cardinale Sodano, come inviato de Papa Francesco ne la so Ca’ Maitino festosa.
E, par finir in gloria: contento anca Don Saverio, l’amigo Pàroco de Musil, che à ’vu el priviegio de stabiìr tanti contati co L.F.Capovilla, racomandando de rèndarme interprete de afeto de i so parochiani per l’evento sensassional. Ècolo servìo, Don Saverio!!!

[torna sopra]