| de Franca Isolan Ramazzotto |
|
Robe de na ’olta a confronto, in basso veronese
Le Messe de ’na ’olta e de ’desso
 | | ’Na ’olta i preti i diséa Messa, giràndoghe le spale al popolo… |
’Na ’olta, in tute le cese, i preti i diséa Messa girà verso l’altare majore, giràndoghe le spale al popolo, lezendo el messale in latin, e ’l popolo el rispondéa in latin. Coanti stramboti se sentéa da i grandi, là a Presina. Figurémose... on paesin de campagna con gente coasi analfabeta! E noantri buteleti imparàino convinti de pregar giusto. Me vien oncora da rìdare coando ghe penso che al momento che se cantava o se pregava con “Osanna in excelsis” on vecioto el cantava o ’l pregava “rosana in cessi”; el belo l’èra, che ’l cantava forte e cossì anca casa.
Le Messe del dì de laoro e de la festa le scumiziava sempre a le siè de la matina. La Messa del dì de laoro la durava coasi on’ora, coela de la doménica, invezze... anca pi de on’ora e meza parché el prete el gavéa da spiegare el Vangelo e in pi la prèdica che no finéa mai. No ghèra microfoni, cossita el prete ghe tocava sbraiare e coalche colpo el pestava forte i piè in te ’l solaro del pùlpito che ’l lo faséa tremare, ris-ciando de spacarlo e croar zo, e tuto par racomandarne de comportarse ben e convìnzarne che coel che ’l diséa l’èra giusto. E anca, se a l’istà ’l te vedéa par la strada senza màneghe o dessóra del gumbio o le còtole fin soto el zenocio o se te naséi in Sarèga (Serega) farte el bagno co de le altre amiche, ghèra le spie che naséa contàrghelo e... te jeri sicuro che ’l te diséa in cesa con nome e cognome. S’an che le Messe le jèra longhe, nessuni se stufava e gnanca brontolava e ci gavéa da far la Comunion, bisognava star digiuni da la mezanote, proprio come coando se va farse i prelievi a l’ospedale. Par fare la Comunion, se se presentava inzenocià tuti ’torno le balaustre e el prete, stando da chel’altra parte, el ne metéa la partìcola in boca e noantri, guai tocarla, l’era pecato! Guai mastegarla: se faséa male al corpo del Signore! Siché par destacarla dal palà, che la se tacava come ’l ves-cio, se vedéa on rotolamento de lengoe, cari méi! E... gnente rosseto in te i làvari, velo in testa e... goài mostrare el gumbio e gnanca i zenoci; el te saltava ’ia con bruto ocio da far paura. Se cantava ’compagnà co ’l sono de l’organo: el daséa ANIMA a la Messa e serenità a i còri.
Da tanti ani ghè tuto cambià. Da l’alto, i ga pensà de slargar le màneghe... ghè stà dà órdene a i preti de dir Messa in italian e girà verso el popolo, cossita in te le cese ghè stà messo in te l’altar majore ’na tola de piera e in zzerte cese, compresa coela de Presina, ghè stà tirà ’ia le balaustre e el prete el vien zo da chei du-tri scalini e a la gente pronta in prucession a du a du, el ghe dà la partìcola anca in man e... se pol far la Comunion anca ’pena magnà, e al Signore... ghe piase el rosseto!
A l’istà, se va in cesa ben scolacià, con le minigone che l’è assè che no se mostra le “vergogne” e co le braghe che se mostra el bìgolo. I preti dise la Messa co ’l microfono, la prèdica istesso, senza bàtare i piè, tanto... femo coel che volemo! La Messa la dura solo tri coarti d’ora; ghè stà scurzà la prèdica ma... supiemo, par no dire... che ’l prete no ’l fa gnanca ora finire el segno de la Benedizion che semo za fora da la porta.
’Nantra roba... Da coalche tempo, l’organo i l’à fato tasère; se canta ’compagnà da chitare e ’na tastiera, e po’ a ritmo se bate le man; a noantri vecioti no ne piase propio gnente, l’è na Messa freda, e... basta el “Pata nostro”, anzi, el Padre nostro con le man in cortesia (mani giunte), ma con le man verte (invocanti) e... vedarì che tra qualche ano, invezze de farne fare: la pace sia con te, i ne farà fare on baleto, magari, obligàndone de balare con le persone che in tel corso de la vita ghemo crià, la pace sarà fata! De coésto no sarìa gnente male!!!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Vìvare el presente
Pensare senpre al “dopo”, vardare massa ’vanti ne pol far pèrdare de vista el presente e cussì no rivare a gustare gnente de quelo che ne càpita tra le man e soto i oci in chel preciso momento.
de Mario Klein
Le storie de Dinerio
Antichi ràdeghi e stramusoni
Na rùsane secolare nata par via d’un siro pasquale da inpissare el Sabo Santo
de Vittorio Ingegneri Dinerio
Da Rovigo
I fiòi de Rico
La guera de liberazion la xe stà anca guera civile
de Gianni Sparapan
|
