|
Editoriale
Vìvare el presente
Pensare senpre al “dopo”, vardare massa ’vanti ne pol far pèrdare de vista el presente e cussì no rivare a gustare gnente de quelo che ne càpita tra le man e soto i oci in chel preciso momento.
 | | A proposito de “vìvare el presente”, có ve riva la rivista, semo soto Pasqua e ve fazo i auguri. |
Metemo subito in ciaro na roba: “vìvare el presente” no ga da voler dire carpe diem, “cogli il giorno”, come sugerisse l’espression del poeta latino Orazio che (senpre ne le Odi) ghe zonta esatamente quam minimum credula postero, cioè “confidando il meno possibile nel domani”.
Nò, nò: qua parlemo de naltra roba, come ne sugerisse la “perla d’autore”, la riflession de la teologa Adriana Zarri, che ne ga mandà l’amico Benito Calonego (www.ilcrocevia.it), diretore didàtico in pension, con la passion de la cultura e de l’insegnamento.
Parlemo de la necessità de inparare a vìvare el presente: fermare “el susio del tenpo” ne ’juta a vìvare più pienamente e consapevolmente el nostro tenpo, ne la convinzion che el “massa passato” porta a la depression e el “massa futuro” a l’ansia.
Dovemo creare “armonia con le cose e tra i diversi tempi”, concentrarse su quelo che in chel momento ghemo tra le man, su quelo che semo drìo fare o drìo vardare: inparemo da le ave e da le brespe che le se ferma sul fiore a gustare la linfa e quando le riparte... le ghe someja a le màchine da corsa có le torna in pista dopo el pit stop.
L’armonia del “presente” tra le raise (i ricordi) del passato e le gème (progetti) del futuro, la inpiza el nostro benèssare spirituale.
De solito, quelo che femo lo femo de pressa, pensando a la fine del lavoro che semo drio fare, pensando pi al “dopo” che al “’desso”. E có rivemo al “dopo”, coremo ancora de pi, pensando al “dopo” che vien dopo, scapando de corsa dal presente verso calcossa che no conossemo.
El risultato xe che el presente no lo vivemo, no lo gustemo o no lo conbatemo con la giusta forza: lo soportemo a malapena, ne la speranza che ’l passa in pressia, senpre projetà verso el “dopo che verrà”.
Xe senpre bela “l’erba del vicino”, xe senpre mèjo el lavoro, el vestito, la morosa o la mojere de st’altro, quando inveze xe vèro el contrario: xe belo, xe bon, xe mèjo quelo che ghemo al presente e che xe nostro, xe mio de mi, adesso, non “dopo”.
La roba pi inportante xe propio quela “mia de mi”, in chel preciso momento: da gustare fin in fondo, se la xe bela; da conbàtare par canbiarla, se la xe bruta; in tuti du i casi, no se pole distrarse, passarghe sora, scapare in avanti: bisogna conportarse come se quelo che se sta fasendo la fusse l’unica roba che se pol fare.
Dovemo dunque ridure la velocità, fermare i “vagabondagi” de la mente nel tenpo e “stare nel presente”, anca col corpo, faséndose operare le catarate che ne inturbia la vista co i fantasmi del passato e co le nebie del futuro.
Ne costarà fadiga, ma co l’alenamento rivaremo a métare órdine tra i nostri pensieri e le nostre emozion, concentràndose so ’l presente e ridando dignità a la propia esistenza.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Vìvare el presente
Pensare senpre al “dopo”, vardare massa ’vanti ne pol far pèrdare de vista el presente e cussì no rivare a gustare gnente de quelo che ne càpita tra le man e soto i oci in chel preciso momento.
de Mario Klein
Le storie de Dinerio
Antichi ràdeghi e stramusoni
Na rùsane secolare nata par via d’un siro pasquale da inpissare el Sabo Santo
de Vittorio Ingegneri Dinerio
Da Rovigo
I fiòi de Rico
La guera de liberazion la xe stà anca guera civile
de Gianni Sparapan
|
