| de Vittorio Ingegneri Dinerio |
|
Le storie de Dinerio
Antichi ràdeghi e stramusoni
Na rùsane secolare nata par via d’un siro pasquale da inpissare el Sabo Santo
 | | On provedimeto de alto rango “eclesiastico” obligava el prevosto de la nova comunità de ofrire el siro pasquale del Sabo Santo a la cesa arsipretale de “Matrice”… |
− Tasi, smànfaro da la mariavèrgola, te m’à fato na testa ’fà un quaresemale co’ le to smòje saputone, sarà mèjo ca te smonti da chel pùlpito!
− Valà, spìsima inpastà de aguasso e paltan, no sta’ intavanarte, tanto de i basabanchi squaquaroni mi la penso come alora: “Marmi soto, bronzi sora, i pontesani cade ch’i mora!”e se no te ghe la moli te auguro la stessa smara.
− Barba, sto batibeco lo go sentìo che xe poco, forse in coa d’un discorso pitosto animà, na sera ’ndando a córare drio l’àrzare, quasi in fianco a la cesa de Tore, fra do pescadori co’ le cane calà te l’aqua torbia del Brenta. Ti seto a cossa se riferisse sta portada che tira in balo marmi e bronzi?
− Sacramen, fiosso, robe pi vece de le franfriche! Questa sì che la xe curiosa e anca on fià ridìcola pa’ i ani ca semo. Me maravejo ca se ghe ne parla ’ncora ’desso de sta storia, dopo squasi on secolo e tri quarti voltà via. Forse i do jera drio cagnarse, come ca sucede spesso fra cassadori quando uno cunta che ’l ga massà el lièvoro pi grosso o chi ca pesca co’ la cana che ’l dise d’aver ciapà el bisato pi longo. Sinò, capita spesso de tòrsela a pèto fra pescaùri, quando uno tirà sù na sportà de scardolete e st’altro invesse “se lo cata tel gobo” co’ l’amo incatejà te la rosta.
− Sì, imaginavo anche mi che fra i do ghe fusse de l’astio da borgada, ma cossa ghe centra i bronzi e i marmi co le tenche e i pessegati che no se taca a l’amo?
− Védito, Lalo, me fa piasére ca te gabi ficà el naso te na storia, tanto antica quanto vergognosa, par la Cesa padovana. Se trata de on fato che mi te spiegarò volentiera, ma par ti sarìa pi còmodo capire che dó se cagna par na partìa de balon, magari parché uno xe interista e st’altro tifa pa ’l Milan. Gnente da dire, dó gran squadre de la medesma sità, tute do a l’onbra de la Madonina, socetà sportive che ga vinto on fraco de scudeti e de cope, però fra pevarini tientinbon neroazuri e rossoneri no core bon sangue e basta on gnente par slenguassarse e anca, granfati, de métarse le man ’dosso. Ma vegnemo a la to domanda. Go vossùo partire da sto paragon ca xe menestron de i dì d’oncò par farte capire mèjo chel senso de rabiosa rivalità ca ghe jera na volta fra parochie in confina. Te parlo de na vecia rùsane ca xe nata fra crestiani che, pur ’dorando el stesso Cristo nostro, rispetando i so stissi comandaminti e ressitando le stesse orassion, da delà a dequà del canale, s’à tolto in gropa na smèmola ca fa senso cuntarla.
Caro fiosso, xe vero che “ogni canpanile sona le so canpane”, come diséa i nostri veci. Questo xe el caso de l’astioso canpanilismo nato fra i bigoti de l’antica pieve de San Michele a Tore che no ga mai visto de bonocio la nàssita de la parochia de San Marco a Ponte de Brenta. El pomo de la descordia che ga fato radegare par quasi do secoli i nostri avi xe stà el siro pasquale. Te ga da saére che la parochia de Ponte de Brenta, nata in setenbre del 1457, se la teresina no me fa scapussare su la data, da on provedimento de alto rango “eclesiastico” che scancelava da i registri parochiali de Tore sirca 1.200 àneme postàe soto el so portale pievan, obligava el prevosto de la nova comunità de ofrire el siro pasquale del Sabo Santo a la cesa arsipretale de “Matrice”, co ’l gravame penitensiale de sotométarse assieme a i so fedeli al rissevimento de l’ojo santo inposto da l’arsiprete del vecio tenpio. Te capissi che questo jera on grosso rospo ca ghe tocava parar basso i pontesani ogni ano, na osservansa rigorosa stabilìa da i comandi canonici prescriti par le “liturgie” pasquali. Sicome “no ghe xe pèso mincion de chi no vol intèndare rason” i parochiani de Ponte de Brenta ogni ano soto Pasqua, de baucon, faséa rece da mercante. Sta situassion se ga strassinà ’vanti “de ruson e brontolon” pa on bel tòco, ossia fin al 1598, se ricordo ben quel ca go leto pareci ani fà. Da sta data in ’vanti i vari paroci che ga direto la preposidura pontesana ga tacà tirare el culo indrìo, rognando pi o manco cruamente, contro sta disposission de suditansa, fasendo nàssare grosse criche fra le do comunità eclesiali confinanti. Sto fogo xe stà inpissà, credo, fin al 1790, ossia fin quando l’alora prevosto de la parochia de San Marco, me pare che ’l se ciamasse don Miotti, ga ciapà saldamente in man la question, pronunsiando tre spigolose predicoze, fate parfin stanpare, contro l’arsiprete de Tore. L’inissiativa garibaldina ga fato nàssare fra i dó na barufa da cortelo, na custion assè difìssile da domare e da tegnere querta par no dare scandalo, tanto xe vero che la curia padovana ga pensà de far anulare l’ordinansa de rispeto, cossì rigorosa, siché da chel momento i cesaròi de Ponte de Brenta ga podesto métarse in andare par cunto suo co’ le funsion pasquali del Sabo Santo. I basabanchi toresini, invelenài cofà le vìpare, no ga visto l’ora de vendicarse, rebelendo la so cesa, propio a despeto de i parochiani del ponte. I ga tacà a le colone de le navate de i basaminti in marmo de Carara e “par zonta a la ponta”, nel 1823 i ga cronpà quatro grosse canpane da la dita Colbacchini de Sacolongo. Có xe stà ora de montarle sul canpanile, i xe ’ndài torle co’ i cari, fasendo na longa stìrola de bigoti a mo’ de procission inbastìe pa ’l santo patrono. Passando par Ponte de Brenta, de ritorno dal viajo co’ le canpane cargà su i cari, i bacajava: “Marmi soto, bronzi sora, i pontesani cade ch’i mora!”
− Grassie, barba, no te bate serto la teresina a ti, no; xe senpre un spasso scoltarte.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Vìvare el presente
Pensare senpre al “dopo”, vardare massa ’vanti ne pol far pèrdare de vista el presente e cussì no rivare a gustare gnente de quelo che ne càpita tra le man e soto i oci in chel preciso momento.
de Mario Klein
Le storie de Dinerio
Antichi ràdeghi e stramusoni
Na rùsane secolare nata par via d’un siro pasquale da inpissare el Sabo Santo
de Vittorio Ingegneri Dinerio
Da Rovigo
I fiòi de Rico
La guera de liberazion la xe stà anca guera civile
de Gianni Sparapan
|
