|
Editoriale
Auguri de pace, ma quala?
Quela de Nadale, che dura on giorno e po’ la se sfanta come neve al sole? Quela de chi ne rapresenta in Parlamento, ch’i xe là che i se rósega la testa fra de lori, come tanti conte Ugolino? Quela de i militanti de Al Qaeda o de l’Isis che i continua a copare nel nome de Allah?
El primo giorno de l’ano tuti se sbròdola te ’l farse i auguri de pace e serenità, che in sostanza vorìa dire “ano novo, vita nova”, ma me sa che xe oncora come nare a aqua col crivelo. Co la situazion che gavemo in casa nostra e nel mondo, no basta augurarse la pace, bisogna volerla con tute le nostre forze che, se inparemo a métarle insieme, le xe tante: na nosa te on saco no fa rumore, ma tante nose te on saco, le se fa sentire. E, volere la pace, vol dire fare tute robe de pace, canbiando la nostra mentalità, canbiando el pensiero che ’l xe quelo che guida le nostre azion.
Se volemo canbiare drento, se volemo jutare el nostro pensiero, proprio st’ano 2015 ghemo la possibilità de ricordare on secolo de storia veneta e italiana, prima che “mondiale”: on secolo che ga visto la Prima e la Seconda Guera mondiale, ma anca le “batalie” de la nostra epoca moderna che no xe ’ncora storia.
Provemo a lèzare na létera dal fronte de qualche nostro nono, opure el raconto de chi ga vudo la fortuna de portare casa la pèle da la “campagna” de Russia o da i canpi de concentramento… Tute robe dramàtiche che, però, no ga da scorajare, ma emozionare, par tornare a crédare ne la “Memoria” che mete a disposizion nostra e de i zóvani le esperienze, i falimenti e i sucessi de le generazion de i noni e de i popà.
Forte ga da levarse l’augurio parché i nostri zóvani pieni de energìe i possa coltivare la speranza de un futuro miliore, magari inventàndose na vita carga de altruismo, de corajo, de silenzio e de preghiera, parché i sia proprio lori a capire che “la pace è un dono di Dio”.
E dopo… no’ parché volemo che ritorna el passato… ma dove le metemo le vece usanze de Capodano? Usanze in tenpi che anca alora tanti genitori pianzéa làgreme amare par i so fiòi senza fortuna, senza laoro, senza avenire.
Ghe jera poareti, ma soratuto i toseti, che a la matina presto de Capodano naséa de casa in casa, cantilenando: “Bonin, bonano, / capèo de pano, / capèo d’argento, / deme un franco, / che vago via contento”, conpletando el canto co’: “Bonin, bonano, / na pèssa de pano, / na pèssa de osso, / deme un scheo, / senò ve pisso ’dosso!”
E questa, jèrela poco bela?: “A son vegnù a ’gurarve el bon ano, / bon Capodano / e bone feste: / bone menestre, / boni formenti. / Deme na bona man / e sarì contenti. / A vegno col saco: / deme on tòco de grasso. / Vegno co la sacheta: / deme na panzeta. / Vegno co la cariola: / deme na brasola. / Son vegnù qua in sto dì: / deme quel che volì. / V’ò dito ste parole in cortesia, / adesso ve saludo e vago via. / Se volì savere chi che son, / verzì la porta o vegnì al balcon.” Quanta modestia, umiltà, educazion conpagnava sti auguri che no pagava el dazio e no i dava fastidio a nissun. I jera auguri par on futuro manco inpestà de brespe, e on invito a la solidarietà fata in casa.
Eco ’lora che i nostri auguri de pace i vole “portare guera” a i scàndali, a la coruzion, a le barufe inutili, al menefreghismo, a l’ocio che no varda pi in là de na spana e no conbate contro le ingiustizie, la fabricazion de armi, la mancanza de lavoro e la fame nel mondo.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Auguri de pace, ma quala?
Quela de Nadale, che dura on giorno e po’ la se sfanta come neve al sole? Quela de chi ne rapresenta in Parlamento, ch’i xe là che i se rósega la testa fra de lori, come tanti conte Ugolino? Quela de i militanti de Al Qaeda o de l’Isis che i continua a copare nel nome de Allah?
de Mario Sileno Klein
|
