Da Adria (RO)

I pioci

So mare, l’Alda, la s’incorze, la tole in man la petenina e la prinsìpia a remenarghe i cavì.

Pensa a la tua fiola e no sta’ intrigarte int’i afari d’i altri. Ato capìo?

Anca alora, sensa docia, sensa bagno co vasca furnì de aqua calda e freda, se se lavava, se se canbiava, se se tegneva neti e governà come Dio comanda. Naturalmente secondo le possibilità ch’a se gaveva; ninte aqua in casa, bagno, cussì come ch’a lo conossemo adesso co tuti i servissi, no gh’in jera, igiene come ch’a se podeva; comunque tuti i ghe tegneva a ne passare par rognosi.
Dirghe a uno “onto, piocioso” jera n’ofesa no da poco, anca parchè se meteva insieme l’idea del piocio co quela del sporchesso, de la trascuratessa, de l’onto e de la scarsa amicissia co aqua e saon. Però capitava, fassilmentre fra fiòi, ogni tanto na bota de quela che anquò se ciama “pediculosi”. Roba che a dirla pare chissà che malatìa e invesse altro no l’è che na bela invasion de pioci.
Un bocia scuminsiava a gratarse in testa, ’n antro ghe teneva drio e int’un fià per l’altro el gratamento de suca deventava generale. Càpita cussì in Borgo che la Marina un bel dì la scuminsia a gratarse in testa. So mare, l’Alda, la s’incorze, la la ciapa, la tole in man la petenina e la prinsìpia a remenarghe i cavì. Vien fora tuto un movimento de bestioline e na fioritura de risiti bianchi. La nona có la vede so nuora furegare in testa a so nevoda la fa:
“No i sarà mina pioci, ah!” E st’altra ghe rispode:
“Me despiase, ma l’è proprio cussì.”
La nona core drita a sercare inte la casseta d’i feri de so marì, che fin che ’l jera stà bon l’eva fato el barbiere de sabato e doménega, ma in tuto el resto de la setimana el jera sarto, la ciapa la machineta da tosare e la va verso la pìcola co l’intension de farla in pelata. La nuora la la ferma:
“Nò, nò, s’a se tratesse d’un mas-ceto andarìa anca ben, ma par na femenina, a fasso mi inte na nantra maniera.”
“Va ben, tanto la fiola l’è tua e mi, se sa, no posso méter lengua…”
Na bela untadina de petrolio, che in casa no mancava dato che ’l se doprava inte ’l canfin, n’infassà de testa a mo’ de Sandokan, du tri giorni in casa, e po’ lava e rilava i cavéi, fin che i pioci i è morti tuti e le géndene le se destacava e crolava inte ’l cadin come foje d’autuno. I cavì i è restà al so posto e la pulissia l’è stà conpleta. Ma la storia ga ’vù na coa.
N’amiga de la pìcola, che vegneva regolarmente par casa, la se gratava spesso e volentieri la suca. La mare de la Marina la se n’à incorto subito e sensa tanti ari né stari l’à spedì l’indesiderata ospite a casa sua, racomandàndoghe de farse vardar in testa da so mare. No è passà diese minuti che sta siora, la Gisela, la s’à pressipità in casa da l’Alda, sigàndoghe drio, come na vendrìgola da marcà:
“Cossa te crìdito? Che mi sia un ledamaro, ch’a manda in giro mi fiola sgionfa de pioci, sensa tegnerla da cunto come ch’a se convien? Varda che mi a lo sò quel ch’a go da fare sensa che ninsun me lo vègna a insegnare. Pensa a la tua fiola e no sta’ intrigarte int’i afari d’i altri. Ato capìo?”
L’Alda la stava par rispónderghe par le rime, tanto più che la Gisela la s’jera permessa de vegnere in casa sua inte chel modo, ma sicome la jera na dona co la caponara a posto, l’à sercà de tondarla par farla chietare, spiegàndoghe le so rason. In fondo ghe pareva de farghe un piassere e no gh’jera ninsuna intension de farghe qualche osservassion, che mai la se sarìa permessa co n’amiga, na vissina, la mare de na putina ch’a vegneva par casa. Insuma, tanto l’à fato e tanto l’à dito che squasi squasi la Gisela la ghe domandava perdono par èsserse presentà su la so porta inte chela maniera. E tuto è fenì lì.

[torna sopra]