Da la Bassa Veronese

Bonano, maestra Odina!

La zóena maestra Odina Signori Menini.

1937. Esercitazion davanti al Municipio.

Ano scolastico 1947-48. La maestra Odina co i so scolari.

La maestra Odina Signori Menini col so butin Giorgio.

Co el scominzio de l’ano novo, se usa farse i auguri, in fameja e tra quei che se conosse: “Bonano, auguri…” Queste i è le parole che piassè circola tra de noi, in sti giorni, in strada, in botega, in filovia, contenti de èssarghe ancora a sto mondo in carne e ossi, anca se, ben o mal, pensieri ghe n’emo tuti e l’è propio la mente che ne porta distante, a ricordar soratuto quei che n’à lassà. De solito, i ricordi pi bei i è quei lighè a i ani de l’infanzia.
Faséa el conto tra de mi de quanti maestri che emo conossùo a scola elementare al me paese, San Piero de Morubio; mi, par esenpio, go avù in prima e seconda elementare la maestra Itala Storari, (la pi vecia de età, che la vegnéa da Colognola ai Colli e la staséa a dozzena da la “comare Giulia” de San Piero); po’ da la terza fin a la quinta m’à insegnà la maestra Igea Bettili, che la vegnéa tute le matine co la coriera da Verona. Me sorela Luisa, inveze, la ga avù la maestra Carla Ceschi, anca ela da Verona; me fradèi i ga avù inveze el maestro Nadalin Giarola, Francesco Beghini e Guerrino Beltrame.
Altre me amiche iè stè a scola da la maestra Ida Murari Marconcin e da la maestra Odina Signori Menini che la vegnéa da Rosegaferro de Villafranca. Prima però de vegner a San Piero, sta maestra, ’pena diplomà nel 1923, l’à insegnà a Custoza, propio el paese de “La piccola vedetta lombarda” e del “Tamburino Sardo”, quelo del libro Cuore de Edmondo De Amicis, dove che la ghe andava in bicicleta, fasendo la strada in salita de la Cavalchina. Quando inveze l’è passà de ruolo la ga avù la nomina a San Piero de Morubio, ’ndo’ che l’à insegnà par 40 ani, fin al 1964: el Comune de San Piero de Morubio el ga dato la medaja d’oro el 4 marzo del ’65. Le so coleghe de alora jera: la maestra Emma Bissoli Zambonini, Irma De Paoli, Bice Magnani che à sposà el poeta Lionello Fiumi.
De bidela, alora, che netava le aule, inpizava le stue de coarèi e ghe badava a i buteleti ghera la Iseta Ferrari Beltrame, dita Marenga par via che so papà Marengo pare che l’avesse catà inmurà nel muro de casa na pignata piena de marenghi.
Tute ste persone, comunque, dedicà a la scola, le n’è restà nel core par via che le faséa el so laoro come na mission.
A chei tenpi, anca la maestra Odina l’era piena de vita, senpre pronta a jutare on calche buteleto, poro de fameja, ma inteligente, che ’l podesse ’ndar avanti co i studi.
Ghe sarìa tanti episodi da contare, in quarant’ani de insegnamento, che no bastarìa on libro intiero. Basta solo dire che la zercava che tuti i buteleti i capisse giorno par giorno quelo che la spiegava e no la desmetéa mai, fin che le robe no le restava inculchè ne la mente de i so scolari. Dopo de ela, quando l’è ’ndà in pension, è vegnù a sostituirla el maestro Enzo Saggioro.
Propio sto “primo genaro 2015” me porta a ricordare che i è 25 ani che la maestra Odina l’è mancà. Ne i ultimi so giorni de vita, ricordo che la pregava senpre co la corona in man. L’è mancà propio el giorno ’ndo’ che la Cesa la fa memoria de la Madre de Dio. Segno che la Madona la l’à premià, ciamàndola a insegnare a i angioleti in celo. E ’lora: “Bonano, maestra Odina!”

[torna sopra]