|
Da la Bassa Padovana
Có nasìvino a slizzegare
 | | Urbana, ani ’50. Quatro “temerari” pronti a garegiare co i slitini ne la “Peschiera de Romìo”. |
Ne la pontara tra la via “Cararo” e la via “Vegnola”, a Urbana, a ghe jera la “Peschiera de Romìo”. La jera on tòco de tera bassa, con na gran fossona e altri zincoe fossi che morìa lì e àlbari de piopa drio le rive. A ghe jera senpre acoa ferma anca in istà, ma in inverno la Peschiera la jera oncora pi piena de acoa che la se giazava, come tuti i fossi.
A coei tenpi a jera on fredo che se faséa na spana de giazzo in te i fossi e che ’l portava parfin el peso de i òmani.
I òmani del cantiere comunale, d’inverno, i dovéa nare a spacare el giazzo de i fossi col pico, fare de i coadroti, métarli in te on saco e portarli in te la “Giazara comunale”, che la ghe jera in ogni paese. El giazzo i lo doparava de istà par curare male a i denti o a la testa o par conservare coalche tòco de carne, prima che i inventesse i frigoriferi.
I tosi de Urbana, de coalche ano pi de mi, i ga trasformà la Peschiera in tel stadio del giazzo, indove che i naséa a “slizzegare” con le “sgiàvare”, che le gavéa le broche so le sòle, ma i pi coragiosi i se faséa i slitini con dó tole tajà curve, inciodà con altre de traverso. So le dó tole curve se ghe metéa soto dó fili de fero grossi, fregà co la carta vetrata par slizzegare mèjo so ’l giazzo. Se se sentava so sta slita, co i piè puntilà so ’l davanti e se se spinzéa so ’l giazzo con dó bastoni che i gavéa el ciodo in ponta. Se faséa le gare a dó, a tre, a coatro slitini, con le eliminazion e le finali. Mi a me contentavo de vardarli, có naséa a casa da Dotrina, parché i mìi no i me lassava nare a slizzegare par paura che se ronpesse el giazzo.
Verso sera, coei de i slitini, i passava a spazzare el giazzo, e dopo i ghe butava de le sece de acoa par farlo deventare pi lissio, par riprèndare le gare el giorno dopo.
Durante una de ste gare, “Ciano”, fasendo na manovra sbalià co ’l slitin, el ga inforcà na piopa che vegnéa fora dal giazzo, restàndoghe abrazà come in te i cartoni animati. El ga ciapà na gran bòta in te i posti bassi parché a l’è stà cucià in tel giazzo par diese minuti, tegnéndose le man indo’ che non bate el sole, fin che ghe xe tornà el respiro e ghe xe passà el male.
A jèrino tuti preocupà, par Ciano, che non ghe fusse capità l’irimediabile e anca parché non lo vegnesse a savere le nostre fameje, conpresa coela del malcapità.
Dopo ga ripreso tuto come prima, ma par ani a semo stà tuti col segreto de chel giorno, sensa avere el corajo de domandarghe calcossa al Ciano, ma osservàndoghe el svilupo. Infati, pi tardi, no ’l ga mia fato la voze da galozzo come tuti e po’ a ghe cresséa poco i peli de la barba, che paréa che bisognesse concimarla col schito de oco. Có xe stà ora del militare el ghe n’à fato poco, e non se sa parché, e dopo pochi ani a sentimo dire che ’l se sposa! El se sposa? A se ghemo dito tuti, ma salo cossa che ’l fa?
I nostri dubi, finalmente, i xe stà desfà, come giazzo al sole, parché da chel matrimonio a xe nato zincoe bei fiòi!
’Desso, de la “Peschiera de Romìo”, a resta solo el ricordo a noantri “tosi de na volta”, e coalche vecia fotografia, parché a no giazza pi l’acoa de i fossi e, in te chel posto, a xe stà tajà le piope e stropà tuto, e xe stà costruìo na bela casa col giardin.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Auguri de pace, ma quala?
Quela de Nadale, che dura on giorno e po’ la se sfanta come neve al sole? Quela de chi ne rapresenta in Parlamento, ch’i xe là che i se rósega la testa fra de lori, come tanti conte Ugolino? Quela de i militanti de Al Qaeda o de l’Isis che i continua a copare nel nome de Allah?
de Mario Sileno Klein
|
