|
Robe de na volta (metà ani ’50)
A l’ostarìa
Gran fumarò, goti senpre pieni, bocaleti de passajo!
“Cossa ghe inpìrei, in ste nassionài!? Tuto, fora che tabaco! In guera, se adatàvino a far sigarete co’ tòchi de giornale e foje seche de pissacan. Ma, òstrega, queste le paghemo!”
“E ti, cùcali! Pipa e basta! Almanco te sè queo che te te fumi!”
“Ocio! Xe qua Toni, el grande pescador! Co’ tuto chel’anbaradan de cane che ’l se ga cronpà, no ’l ciapa mai gnente! Ciò! bestie da kilo, ah!”
“Tasi, che proprio ieri, sul Rònego, vedo ’na cana, che dà de i colpeti. Scàrdoe, go pensà. Po’, tuta de un trato: un scorlon che squasi la me cascava in canal. Tira e mola, mola e tira: jero riussìo, a portar la bestia soto riva, quando, la tra un salto, la stuca la bava e s-ciao bela! ’Na carpa o raina da almanco diese kili!”
“Varda ti, ah! Valà! Ciapa sto goto de màuco... che te te scaldi le rece!” Tuti taca a rìdare.
“Tosi, sentime mi, pitosto! Altro che raina. Có tre dì fà arava col tiro a sié, rivà de cao, a la voltada, sento el versuro che dà dentro a un afar de fero. Fermo i bo, raspo co’ le man, e no trovo ’na bonba de aereo, longa pi de un metro!”
“Te gavarè ’visà i carbonieri!”
“Brao! Par aver un saco de rogne! Invesse, tirà fora, mi e el boaro, la gavemo destirà, in un fosso suto, querta de paja, e dà fogo. Al scopio, jèrimo colgà, drio un mureto, a pi de sinquanta metri, e sta massà, no la ne ga sepelìo de tera!”
“Ringrassiè el Santo che, se el versuro intivava la spoleta, andavi in frégoe ti, el boaro co’ tuti i bo!!”
“Serto che i ghe n’à molà de nèspole, longo la ferovìa! E chissà quante ancora ghe n’è, somenà pa i canpi!”
“Creature, se parlemo de guera!... Noantri gavévimo in corte ’na conpagnìa de cruchi. Eh, brava zente! I capitava in stala, i se portava via un vedèo e i ne meteva in man un tòco de carta firmà: − Quando Reik vince guera, pagare voi, vedelo. − Finìo tuto, ghemo mandà in todeschìa el nostro muceto de carte... Dopo tre mesi, xe rivà la risposta: − Doic Republic, a sig. Castaldelo. Voi no speta nix, varum, colaborazionisten. − Fati i nostri passi, semo vegnù a saere el parché de sto pugno de mosche. Me pare, a l’epoca, jera podestà del paese. Inciapetà, driti e storti! Presto! Qua un goto, ca go da sorarme!”
“A proposito de todeschi. In casa nostra gaveva ciapà alogio un maressialo de lori: có ’l beveva, ghe saltava un fùter tremendo: − Italianen! Tuti partisanen! Io fucilazionen! − Imagineve el spavento. Me zio, ’pena dismesso da l’ospedale par ’na ferita avù in Africa, sercava de dirghe qualcossa. Ma lu, pezo! − Tu, inboscaten! Perché no in guera? − St'altro se tirava sù la braga e el ghe mostrava el buso ne la ganba. – Tu vigliaco! Io, grande feritoia e tornato al fronte per mio firrer! − El se verzeva la camisa: ’na cicatrice lo traversava da la spala al fianco. – Tu traditore!... Tu partisano! − E qua la sarìa stà còmica, se no la fusse tragica! I dó coreva intorno la tola: me zio ’na mota, ’na busa; st’altro, infogonà, lo menazava co’ na bonba a man. L’unica che riussiva a calmarlo jera la bonànima de me nona: − Maressialo, presto che se freda el cafè! − E la ghe portava la scudeleta fata co i stessi fondi da un mese. A sta parola magica lu se fermava de colpo, el posava la bonba fin che me zio se la mocava su in granaro. − Pono cafè italianen! − el barbotava, − Tu, brava frau! Tu, no partisana! − Un giorno, par strada, i ghe ga sparà. Subito xe scatà la rapresalia, casa par casa. Da noantri no. Forse, prima de tirar le lache, el se sarà ricordà del cafè....”
“Eh! I jera tenpi da turchi! Manco male che ’desso i todeschi no i vien più a copar la zente ma par fortuna a portarne schei!”
“A proposito de Germania: savìo che da la Mèrica xe rivà un scatolon, che se pol védarse i cinema a casa?”
“La sarà roba da siori. No ghe vedo strada!”
“Mi no i me cuca co’ sto scatolon! Me basta la radio. Se go voja de cinema, vago al Garibaldi! Tra l’altro, al scuro, se pol senpre conbinar qualcossa!” Tuti scopia a rìdare.
“Scometo che el primo a tòrselo sarà el prete!”
“Sicuro, par portarne via zente da la Casa del Popolo!”
“Se el me speta mi, el more de fame! No vojo ’ver a che fare co’ quei basapile! Me pare, bonànima, rivà a i ultimi, ga dito: − Prometime! Mai in zenocio davanti a un corvo nero! − Alora a se cantava: ‘Avanti popolo, che semo in sete! Copemo el prete, e ’l capelan!’”
“Mi ghe ne sò n’antra: ‘Avanti, popolo, che semo in oto: el prete in moto, noantri a piè!’”
“Beh! A don Luigi questa no la ghe toca: el ga un mosquito e el se lo paga a rate. E po’ lu: messa la matina, dopo i malà, catechismo e azion catolica la sera...”
“Eh, la savì longa voialtri! Ma... có sarà ora, ciamèlo che no vòi rostirme in eterno!”
“Per quanto, che sia preti e frati... ma, lasseme star le mùneghe! Chi xe che ne rancura i toseti? Chi xe che assiste in ospedale i malài? Chi ghe che ghe insegna el punto riso a le putèe?”
“Dài! Dài! Savemo che te ghè ciapà ’na scufia par suor Incoronata, quela bela mora, vegnù da Napoli o da uno de quei posti de là, da oltra! E, lu ghe porta un capon e − La tasta sti spàrasi! − che se se n'incorze to mujere, la te cava el snaro, come a i polastri!”
“Basta co’ sti discorsi! A proposito de done: sabo riva al ‘Farineli’ Macario co’ le so balarine. Pare che dopo disnà, prima del spetàcolo, le farà el giro de i pòrteghi par tirar zente a teatro!”
“Mi no mancarò de sicuro! Me ga senpre piasesto… le latarìe!”
“E a mi, bauco, la panseta!”
“Ciò! No podaressi forbirve un fiantin la boca?”
“Basta, tosi! Xe ora de alsar le strasse e andar a magnare quatro bigoli!”
“E te gavaressi el corajo de sbandonar sto mezo litro? Bevémoselo! Prima el piasere e po’... el dovere! Come diseva el me tenente, un omo, furbo pur assè!”
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Auguri de pace, ma quala?
Quela de Nadale, che dura on giorno e po’ la se sfanta come neve al sole? Quela de chi ne rapresenta in Parlamento, ch’i xe là che i se rósega la testa fra de lori, come tanti conte Ugolino? Quela de i militanti de Al Qaeda o de l’Isis che i continua a copare nel nome de Allah?
de Mario Sileno Klein
|
