|
Desiderio venessian
’Na fórcoea par nialtri
 | | Na fórcoea intajà e dorà. (da Dora et Labora) |
In un momento par mi difìssie e de na stanchessa massa pesante, me xe vegnùo in mente un fato beìssimo capità poco tenpo fà.
St’altra “metà de ’a Luna”, na sera a casa mia, vardando ancora na volta i me tanti libri su Venessia, co el so soriso beìssimo e ’a so vose che ’a me ga stregà da senpre, ’a me ga ciapà na man e ’a me ga dito se savevo el parché a casa nostra, insieme a i tanti libri che parla de ’a Serenissima, a i cavài magici de ’e góndoe, al Leon, a i véri de Muran, a i merleti de Buran, no ghe fusse anca na fórcoea che tanto ’a ricorda el vogar a eà veneta, e ’e barche de ’a laguna che tanto ne piase.
Gera vero, no gavevo mai voesto na fórcoea parché no gavevo mai pensà de trovàrghene una de usada e no una de nova che ’e xe tanto frede, quanto insignificanti sensa i segni del remo e èssar inpregnàe de salso.
Cussì gavemo deciso de ’ndar a eà ricerca de na fórcoea de na góndoea o de un barchin venessian parché ’a “metà de ’a Luna”, anca se ’a xe foresta, ’a gaveva capìo che dentro casa mancava ’na fórcoea.
Gavemo girà par tuta Venessia, da ’e boteghe a i squeri ma, sarà perché i sentiva el so acento foresto, sarà che i ghe ne ga fato un comercio reditissio de ste fórcoe usàe che a presso ragionevole no se ghe ne trovava.
Comunque voevo contentar sta “Luna romana” a tuti i costi, perché a’ saveva èssar, e ’a capiva el venessian mèjo de tante venessiane, oltre che ’ver capìo ’a musicaità de ’a nostra lingua come poche persone.
In qualche ano ’a gaveva studià co passion e in maniera aprofondìa lingua, cultura e tradission venete da no ’ver più quasi gnente da insegnarghe.
Pensè che ’a sa far i spriss più boni che se possa trovar in tuto el Veneto, come i bìgoi in salsa, ’e moeche frite, e tanti pessi de laguna. ’A ga visità tuti i musei de ’a cità, ’a se ga fato ’a tèssera de ’a Marciana, ’a conosse i teatri a cominciar da ’a Fenice, ’a ga messo pìe su tute ’e ìsoe e ’a ga fato tuti i 421 ponti del centro storico de Venessia.
A eà fine semo riussìi a trovar na fórcoea usada, bea, funzionante e a métarla dentro casa nostra dove ’a par messa dentro na barca e ’a par che ’a speta el marinaio che el ghe mete el remo par ’ndar su ’a laguna più bea del mondo de giorno e de note, vardando ’a luna che ’desso ’a se specia su l’aqua e dentro casa nostra.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Auguri de pace, ma quala?
Quela de Nadale, che dura on giorno e po’ la se sfanta come neve al sole? Quela de chi ne rapresenta in Parlamento, ch’i xe là che i se rósega la testa fra de lori, come tanti conte Ugolino? Quela de i militanti de Al Qaeda o de l’Isis che i continua a copare nel nome de Allah?
de Mario Sileno Klein
|
