| de Vittorio Ingegneri Dinerio
|
|
Le storie de Dinerio
A l’anguriara
 | Po’ el ghe piantava la ponta del cortelo ’nte la panza, faséndola s-ciochezare…
|
− Cossa disìo, ’Dolfo? Secondo vu quala canta mèjo de ste anguriote ca gavì ’pena dà na fragnòcola?
− Le xe gran bele tute tre! Par cunto mio, ca so’ de mestiere, l’una vale l’altra. A la batùa de ongia gavì sentìo, Onoria, le canta ben da fato tute tre, xe solo el péso ca fa la difarensa. S’a fusse in t’i vostri pagni, scoltème mi, a me torìa questa chì che la me pare na s-cianta manco venà de sbiavo ne la scorza. Volìo ca ve la pesa? Magari ’vanti ca ’ndè casa ghe fago un bel tasselo, cossì savì cossa ca gavì conprà.
− Va ben, pesèla pure e disìme cossa ca spendo.
− Ben, i sarìa sete chili gajardi, ’ndè là, dème nove euri instesso, ca vojo farve fare bela fegura a casa, soratuto co’ me conpare Orlando. Arè qua, la fa el sangue, ’desso dèghe un sgagnoto e sentirì che roba... La ga da èssare dolse cofà el miele.
− Gavì rason, l’è propio bona. Ciapè qua i vostri schei. No ocore ca me dèi el resto, i go anca destacà, però dème na man a cargarla in màchina.
− No ’l staga disturbarse, sior ’Dolfo, ghe la porto mi in màchina a la signora. Intanto el ghe ne ocia cancheduna de più pìcola. A noaltri ne basta una su i quatro chili o anche calcossa manco, no xe vero, barba? Inportante che ’l la tira sù bela fresca da l’aqua del barile.
− Ti va pure, fiosso, fin a l’otomòbile co’ la siora, che l’angurieta par noantri la serno mi. Tanto go capìo ca posso fidarme de i consegi del sior ’Dolfo; go visto che ’l se ne intende in fato de tajo rosso, el se move da sgajo e da galantomo.
− Ghe mancarìa altro! Xe da ani che in stajon tegno verta sta baraca, anche se romai semo restà in pochi de boni par sto mestiere.
− So’ tornà, gheto fato, barba?
− Sì, go tolto questa picoleta, per mi e ti la basta anca massa. Tola sù ca podemo nare parché go za pagà. Lassa ca montemo in màchina e po’ te spiego le me inpression.
− Eco, barba, dime pure. Cossa gheto da contarme?
− Cade ca te diga, Lalo, che al dì d’oncò xe senpre pi fadiga catare na anguriara ben fornìa e atressà come questa, ma na volta la zente, anca quela de sità, co ’l caldo la se incoconava de anguria fresca messa in moja nel seciaro almanco on paro d’orete prima. Par de pi noantri se jera còmodi a Vicenza, indó ca ghe jera el pi grando marcà de angurie ca ghe fusse stà in chei ani là. Siché ’nte i nostri paisi, là par volta, ghe jera on fraco de anguriare. Me ricordo che da i morti, có i somenava el fromento, ogni sete-oto morèi de tera somenà, i gh’in lassava indrìo on moreléto da somenare e lì i ghe rapossava le pozare co’ la sapa par strapiantarghe le piantine fate nàssare da le megolete de anguria somenàe d’inverno te na cassela de tera mojana ben loamà e tegnùa rancurà al caldin in stala fin in primavera. Sto laoro chì i lo faséa domè in chele corte grosse indó ch’i podéa starghe drento, toléndose on anguriaro praticon, da pagare a la parte. Ciò, no ’l jera miga on mestiero da marsari e gnanca da on pinpinela dindolon. “A vìvar co’ la testa nel saco xe bon ogni macaco.” Prima de tuto a stu ghe voléa na gran passion, bona pratica, gnissuna falansa e cadéa che ’l fusse on brassante co’ tanta voja de laorare da on sole a l’altro. Sto descórare m’à fato vegnere inamente Remijo molonaro, on ometo de meza taca ma ’vanti co’ i fati sui e pitosto sgajo so ’l coltivare angurie e meloni. Lu jera on fitualeto su pochi canpi da destrigare, in confina da la sponda sanca del desturio Parissòlo ca scolava anca le tere de me nono. Mi, sto fureghin l’ò cognossùo puìto parché el me vecio par calche ano ghe ga dà anca lu a la parte on travesso de tere rote da destinare a angurie e moloni a tuto canpo da na terazada a l’altra. Siben che la nostra no jera na strada de gran passajo, el molonaro so ’l spiazo de fianco tra el zejo e la passada ga piantà on casotelo serajà tornovìa da grèle e querto de cane, gnonde noantri boce de doménega ’ndàvimo a sbrodolarse le bocariole co’ poche palanche in scarsela. Có se ordenàvimo n’anguria in quatro-sinque tosati, Remijo molonaro jera on spasso védarlo come che ’l se bordesava: el faséa on jiro ’torno al mucio, el ghe daséa na fragnocolà paromo a le tre-quatro pi bele. Quela ca ghe paréa a elo che la fusse mèjo de st’altre el se la metéa su i brassi, el se la postava al stómego e co ’l mànego de la rimiola el ghe daséa altre dó-tre pache. Po’ co’ on colpo seco el ghe tajava el pecólo, el la s-ciafesava, el ne vardava inte i oci par sinsierarse ca fùssimo ’tenti, po’ el ghe piantava la ponta de la brìtola ’nte la panza, faséndola s-ciochezare. “Eco, tusi, arè qua, l’è rossa sanguanosa co’ le megolete sute; ciapè e magnè!” Massimamente el laoro grosso de le angurie e de i meloni sunà co’ la cariola pa’ i canpi naséa vendù a quintài e in stajon i caretieri anca tre quatro volte la stimana vegnéa a cargare, montando prima vodi e dopo carghi su la pesa in corte. El belo nasséa có jera ora de fare cunti co’ me nono. No ghe jera verso ch’i fusse d’acordo na volta su la mesarìa da spartire sensa radegarse. Me nono co’ le so carte in man sbrodegàe de lapis copiativa jera on ciuìn largo cofà i corni in ponta e st’altro on peocela rebechin ca no ghe molava on ponto tanto fassilmente. Sicome “a chi sparte e no s’in tien, le robe no ghe va ben”, le beghe no mancava mai. Siché, dopo ’ver custionà e uchelà tuti du fora squara par de le meze jornade, i faséa zolare anca calche saraca. Al vecio sisoloso, inpuntà su la so ghigna de comando no ghe staséa in scarsela de tirarse indrìo na s-cianta e al pòro Remijo che ’l gavéa laorà a sangue e gola, come on can bastonà ghe tocava calar le rece e ficarse la coa fra le ganbe, magari sborbotando soto vosse: “sacramen, có la prepotensa ghe tien de terzo a l’injustissia del paron me toca paìre mi, parché la rason pende senpre da la parte del pi forte.”
− Anche se no go tanta esperiensa de come a quei tenpi funsionava le spartission ne i acordi de canpagna tra massaro e lavorante a mezadrìa, so’ convinto anche mi, barba, che el molonaro gavesse i so giusti motivi per lamentarse de come lo tratava to nono.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
A la so ora… la xe rivà!
Xe stà inùtile preocuparse parché tel mese de majo no ’l la finìa pi de piòvare e parché giugno el faséa el mato. Dal dito al fato el tenpo el n’à tapà la boca, faséndone capire che xe mèjo risparmiare el fià, parché l’istà, có xe ora, la riva e magari la pol èssare la pi calda, afosa e tòrida de i ultimi trent’ani.
de Mario Sileno Klein
Da Vicenza
Poesia e... pecati de gola!
de Ines Scarparolo
|
