|
Editoriale
A la so ora… la xe rivà!
Xe stà inùtile preocuparse parché tel mese de majo no ’l la finìa pi de piòvare e parché giugno el faséa el mato. Dal dito al fato el tenpo el n’à tapà la boca, faséndone capire che xe mèjo risparmiare el fià, parché l’istà, có xe ora, la riva e magari la pol èssare la pi calda, afosa e tòrida de i ultimi trent’ani.
 | Ah! che fresco, che bontà, che delizia!…
|
Eco che oncora na volta cata conferma el proverbio che dise che: “el tenpo l’è restà da sposare par fare quelo che ’l vole.” El fato xe che la nostra modernità la ne ga canbià cultura, usanze, rajonamenti, modi de fare, de pensare… I proverbi no li scolta pi nissun: al so posto se consulta el meteo e cussì semo deventà tuti “meteo-dipendenti”, pronti a fare prevision che dopo magari le risulta sbalà.
Xe finìi i tenpi del “ciapemo quel che vien!” Oncò se va ’vanti co le prevision de tuto, cussì se anticipa anca de stare male parché se ris-cia de savere prima quel che cascarà da l’alto! Par fortuna che no’ senpre i ghe indovina, ma cussì va in balon tanti preparativi.
Ben, ormai ghe semo drento, in barba a tante prevision, e anca st’ano l’istà va via par conto soo, senza scoltare chi la vole calda e suta, chi la preferisse fresca e rilassante, chi cussì-cussì…
El tenpo no ’l scolta nissun, el tira ’vanti come che la ghe gira! Xe inutile che se sderenemo a dire, a patanostrare on giavasco de vorìa, speremo, chissà:
“Gheto sentìo come che la boje? oncò vien zo le róndene cote”; “mama mia, che stòfego! speremo che se ronpa el tenpo e se rinfresca na s-cianta, senò i xe afari seri”; “cossa dìsito, gheto sentìo le prevision? gài dito che ’l pol canbiare?”; “mi no me ricordo on’istà cussì balorda!”; “doman a gavarìssimo da partire par la montagna, ma i dise che anca là a no se respira mia: se la dura cussì, a ghemo butà via i schei par gnente”; “có se dise scarogna: proprio oncò a ga da piòvare! pensare ch’i ghea previsto sole!”; “a te sarè fortunà ti che te stè a casa toa col condizionatore a tuto alè!” “na volta a se faséa el triduo, ’desso no se fa pi gnanco quelo: no ghè pi relijon gnanca qua da noantri!”; “i dise che xe colpa de lo zono ma mi a ghe credo poco a chi coatro magnapan a tradimento!” “a go l’orto tuto brusà, la tera xe piena de crepi: se no la canbia stavolta a ghe lassemo le pene”; “par carità, no sta’ ciamar desgrazie”; “gheto visto che tenpestada? me despiase par chel canpo de angurie... me tocarà dàrghele a i mas-ci!”; “e mi, te vedessi che desperazion tel vegneto: a pare che sia passà on esercito de cavalete!”; “st’ano no ghe la fazo pi: me vedo le buele in man!, se la va tanto de longo, me convien fare testamento!”
Chissà quanti altri discorsi del gènare a sentiremo fare intorno a l’istà, al caldo, a la piova, a i progeti, a le rinunce, a le vacanze che no riva, parché no ghe xe i schei, o no ghe xe laoro o, se ’l ghe xe, bisogna tegnèrselo streto… e rinunciare a le ferie.
A mi me piasarìa na roba… senpre ligà a l’istà, a le vacanze e a quelo che ghe va drio. Me piasarìa che i nostri abonati podesse ricévare par posta, in on tenpo decente, sta benedeta rivista che la continua a vegnere consegnà con forti ritardi, quando no la ciapa nantra strada. In un Paese civile come el nostro, quando che uno ga pagà in anticipo el servizio, le Poste italiane dovarìa métarse in testa de rispetare el cliente. Ma no la xe cussì!
Spero tanto che l’augurio de “BONA ISTÀ” a letori, colaboratori e… postini, no ’l vègna leto quando l’istà xe za finìa!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
A la so ora… la xe rivà!
Xe stà inùtile preocuparse parché tel mese de majo no ’l la finìa pi de piòvare e parché giugno el faséa el mato. Dal dito al fato el tenpo el n’à tapà la boca, faséndone capire che xe mèjo risparmiare el fià, parché l’istà, có xe ora, la riva e magari la pol èssare la pi calda, afosa e tòrida de i ultimi trent’ani.
de Mario Sileno Klein
Da Vicenza
Poesia e... pecati de gola!
de Ines Scarparolo
|
