Da Vicenza

Poesia e... pecati de gola!

Zovencedo in fiore per l’Estemporanea di Poesia.

Da sin., Adriano De Angeli, Maurizia Cagnato, Maria Rosa Zampieri, Guidina Borella Lando, Claudia Valle (Presidente de la Biblioteca de Zovencedo) e Giuseppe Segalla.

E dopo la Poesia… se magna. (foto Natalino Carlan)

A no xe mìa passà pi de tanto da quando, in te la cesa de i Càrmini, se ga selebrà la Messa de fine ano acadèmico, ricordando i tanti poeti del Cenàcolo che xe “’ndà ’vanti” e che ’desso scrive i so versi so fòji de nùvoe bianche, prima fra tanti la nostra Lia Pinelli Pontello.
La selebrassion la xe stà on tochetin de celo regalà a tuti niantri, fra canti animà da la “Cappella Musicale Santa Maria in Araceli”, coro direto dal M° Antonio Maria Tessoni, e musiche d’organo che te lustrava ànema e core, fate spanire dal M° Cristiano Lancerotto.
On finàe che sarava in maniera degna on ano pien de sorprese una pi bèa de l’altra che, grassie a la Maurizia Cagnato, la nostra Presidente, e al so sposeto Nuccio Zanetti – super/inpaginètor-man −, ne xe stà dà modo de vìvare.
A i go tuti qua rento, che i rùmega, dàndome ’n fià de mainconìa, sti ricordi che sròdolo par rivìvare momenti ùnici...
L’Agape nataissia ne ga visto de novo insieme (come a i tenpi de la Lia) ’te la Sala de Vila Disconzi, a Monte Bèrico: on pranseto bon ca no sò e, fra on piatelo e chealtro, la letura de le poesie nataissie da parte de i autori: poesie che no ga serto desmentegà i problemi che ’ncò se vive, ma che, ’te ’l Banbinelo che nasse ’te la miseria pi granda, co na stala par casa, ricàta la Luse de la Speransa!
Ne ’a Giornata par el Diaèto, a metà zenaro, istituìa da le Pro-Loco d’Italia, el prof. Mario Bagnara, Presidente de “La Vigna”, ne ga incantà tuti, lesendo calcossa da “Monteci e Capuleti”, autore ’l poeta veronese Zeffirino Agazzi, poemeto che se pol catare a la Bertoliana de Vicensa. Altro intervento magnìfico, fra leture varie de poesie so la siviltà contadina o ’l ricordo de proverbi e modi de dire, quelo de Gianni Giolo so ’l valore etimològico de i vocàboli in diaèto.
In aprìe xe tornà la tradissionàe “Estemporanea di Poesia”, organizà da la presidente Maurissia Cagnato co la colaborassion de Janina Gaspari ’te la ridente Zovencedo; la fameja deventa ogni ano pi granda e sinpàtica. Difati xe rivà el Grupo Amissi de 'a poesia “Aque Slosse” de Bassan, Presidente Adriano de Angeli; “El Graspo” de Thiene, Presidente Beppe Segalla; la Maria Rosa Zampieri par el Grupo de “L’Airone” de Bovolone (VR) e la Flavia Merlin par el “Berto Barbarani” de Verona. E no podéa mancare (sìe ani driofila che i vien!) el Grupo de i “Poeti Città di Chioggia”, co la Presidente Guidina Borella Lando, e daromài amiga granda, co ’l so bel s’ciapo de “fìe”.
Tema sortejà par l’“agone”: “Le stagioni della vita”. E dopo? Órpo che magnada, tusi, da lecarse i bafi!
E ’desso... Passiensa, tusi, a go i sarvèi che va de onda; xela l’emossion o la canìcola che inturbia l’aria?
Mèjo ca ve conta calcossa de altro el mese che vien... Intanto mi ripenso a la poentina co ’l bacalà che ga fato sì che chel dì, a “Ca’ Martina” de Zovencedo, fasesse el me primo, grosso, pecato de gola...

[torna sopra]