|
Robe de Ciósa
Quei ani de le “medie”…
 | Classe mista de 1ª media del dopoguera: tanti mas-ci indossèva pantaloni curti anche d’inverno, altri pantaloni a la “zuava”…
|
Me scuso se stavolta parlo de mi. No l’ò mai fato, perché no ze mia abitudine, ma sicome se trata de recordi, che tanti de la mia età à vissùo, credo che no ghe despiazarà a nissun.
Me recordo benissimo sia l’ano, sia el zorno, sia el mese, siben che de ani ghe ne sia passà un bel tòco… Gera el primo de otobre del 1944: gèrimo in tempo de guera e le scuole funsionava a sengiósso in base a i alarmi aerei: le scomissièva el 1° de otobre e le finiva el 31 de magio. Quel giorno ò varcà per la prima volta la porta de la scuola media! Parlo de le scuole che alora se ciamèva “scuole medie governative”. La pagela la ghe gera anche alora e me ricordo co precision quela de quinta elementare, che conservo come ’na reliquia. La porta la data del 31 magio 1944 XXII E.F. (era fascista) e se lèze, de fianco, scrito co la pena col penin intinta ne l’inchiostro: “Si attesta che lo scolaro Padoan Angelo è stato promosso ed ha completato gli studi del ciclo della scuola del lavoro”(cossì gera ciamà alora le classi quarta e quinta elementari). L’ano scolastico gera diviso in dó quadrimestri, i voti gera ciamà “qualifiche” e i gera espressi in létare, trascriti in dó colone (1° e 2° quadrimestre), mentre la tersa e la quarta colona gera riservà al risultato finale: la prima per la session estiva (co scrutinio e esame) e la seconda per quela autunale (solo esame): questa gera riservà a i fiòi “rimandà” a setembre. Le materie gera superzó le stesse de ancùo, ma ciamà co nomi diferenti, mentre le ultime dó gera “lavoro” e “contegno” (l’atuale “condota”).
Completà la scuola elementare, se passava a la scuola media. Za dal 1926 gera in vigore la lege Gentile su l’obligatorietà scolastica fin a 14 ani, ma gera pochi quei che frequentava la media, perché, finìe le elementari (e sèrte volte gnanca fin a la quinta), i gera mandà da la famegia a lavorare.
Esisteva alora dó scuole medie dopo le elementari: la scuola media governativa e la scuola d’aviamento. Per entrare ne la prima gera necessario sostegnire un esame d’amission, ne la seconda no (la podeva èssare a indirisso comerciale, professionale, agrario, ecc.). La prima la frequentava soratuto quei che volèva continuare i studi o completare – dizemo cossì – la propria “cultura personale”.
Ma tornemo a chel lontan 1° otobre 1944. Recordo che m’à compagnà mio papà. A l’entrata el bidelo, montà sora i scalini, a ciamèva tuti per nome e cognome e a ne destinèva a le varie classi. A gera el bidelo-custode, perché l’abitava in scuola co la so famegia. Me recordo che le aule gera grande e spassiose, a malapena scaldà d’inverno da grandi stue a legna de teracota, che el premuroso bidelo impissèva ogni matina e che ogni tanto a entrava in classe per vardare se qualcheduna stava per destuarse: in ’sto caso a ghe metèva sora el fuogo de i robusti sóchi.
La fòrmica gera ancora de là da vegnire e i banchi gera de tòla come pure i sedili. Le pene biro no gera ancora rivà fin da nualtri: tanti usava le pene stilografiche co la pompéta per impenirle ogni tanto de inchiostro, altri usava la pena col canòto e penin, che se tociava ogni tanto sul calamaio de véro ficà dentro un buso rotondo del banco e impenìo ogni giorno dal solito bidelo co ’na pompéta. No ghe gera i moderni quadernoni, ma se usava i stessi quaderni de le elementari, a righe e a quadreti. I “compiti in classe” se scriveva nel solito fògio uso protocolo piegà in dó: in alto nome e cognome, pi soto la data, dopo “Tema”, el titolo e in mezo “Svolgimento”. Se scriveva ne la parte sinistra, perché la destra gera riservà a le coression del professore. I fògi gera dó: uno per la “bela” e ’n altro per la “bruta” copia.
Le classi gera divise in maschili e feminili. Tanti mas-ci indossèva pantaloni curti anche d’inverno, altri pantaloni a la “zuava”, qualchedun anche la giacheta; d’inverno capoti pesanti lònghi fin a i zenoci. La cartela no gera el moderno “zaineto”, ma la gera ciamà la “sacheta”: la gera de fibra maron, fata a mo’de valiseta col mànego per ciaparla. Qualchedun, oltre a i quaderni e a i libri, tegniva drento anche ’na spèssie de scàtola de legno pesante a forma de paralelepìpedo col covercio scorevole: drento a metèva “canoto, fereto, penin”, cioè cana, fereto e penin insieme a i colori a pastelo, la matita, la goma per cancelare, mentre drento i quaderni no manchèva la carta assorbente per sugare l’inchiostro. Ogni volta che entrava in classe un insegnante per el cambio de ora, tuti se alsèva in pìe e se sentèva a l’ordine “Seduti” impartìo dal stesso insegnante, fazendo un sèrto tramestìo co i segiolini de legno che strissèva sul pavimento. Oviamente ogniuno gera ciamà per cognome, mai per nome e se gera disposti su tre file de banchi.
Classica gera la foto de fine ano, disposti “a scala”: davanti sentài e dadrìo in pìe in base a la statura. Altretanto classica gera la merendina de le diese e meza: la pagnotèla che ne dava la mama. I professori alora aveva dó modi per ciamare l’interogato: o i passèva col déo i nomi sul registro vèrto ciamando uno a caso opure i ciamèva quei che no gera mai stà interogài o quei che in un’altra interogassion no i aveva ciapà la “suficiensa”. In quei momenti no se sentiva zolare ’na mosca. “A chi ghe tocarà?” – se se domandèva.
’Na grossa novità rispeto a la scuola de adesso gera el latin, che se scomissièva a studiare fin da la prima media, da le famose declinassion co i so vari casi fin a i verbi transitivi, intransitivi e deponenti…
Conservo le foto de quei tempi e, salvo qualcheduni che ò perso de vista, constato che purtropo pi de la metà ze za partìi per el mondo de là… Tuto somà, quei ze stà fra i pi bei ani de la mia vita, perché se viveva sensa pensieri, a la zornà, e soratuto sensa la malissia de ancùo. E se me fusse possibile revìvarli ancora, li revivaràve volentiera, col stesso spirto, co el stesso candore, co la stessa ingenuità e co i stessi compagni co i quali li ò vissùi tanti ani fà…
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
A la so ora… la xe rivà!
Xe stà inùtile preocuparse parché tel mese de majo no ’l la finìa pi de piòvare e parché giugno el faséa el mato. Dal dito al fato el tenpo el n’à tapà la boca, faséndone capire che xe mèjo risparmiare el fià, parché l’istà, có xe ora, la riva e magari la pol èssare la pi calda, afosa e tòrida de i ultimi trent’ani.
de Mario Sileno Klein
Da Vicenza
Poesia e... pecati de gola!
de Ines Scarparolo
|
