Ciàcole visentine

Bacini contro le aluvion, i sindaci vole garansìe
I Comuni vissin l’Àstego dise sì a l’invaso, basta che la Region ghe daga na fideiussion de vinti milioni par trent’ani

El sindaco de Sandrigo, Giuliano Stivan.

L’atuale cava Mirabella, al confine tra i comuni de Breganze e de Sandrigo.

Otobre xe mese de piova e a i visentini che àbita vissin a ghebi e torenti ogni ano scomissia a strénzerse queo che se ghe dise. ’Nte l’area de le risorgive, le falde xe alte ben e serte volte basta un scaravasso par ’ndar soto aqua. Par questo la Region ga messo a disposission de i schei par costruire de le fosse de scolo de l’aqua, ma no senpre la zente xe d’acordo. In particolare quei che ga casa vissin el medio Àstego (Astico) ga paura de ’ndar istesso soto aqua, ansi de pi.
El sindaco de Sandrigo, Giuliano Stivan el se carga su le spale tute ste preocupassion e ’l domanda a la Region tute le garansìe, anca atraverso schei. Dopo che ’l governo ga finansià i progeti de sistemassion del teritorio za pronti, da qualche setimana su la tola de la so scrivanìa xe rivà na létera che dise che la Region vole realisare el primo stralcio del preliminare fato dal Studio Galli Ingegneria de Sarmeola de Ruban. Co sto piano confessionà da i tènici padovani, el novo bacino de laminassion insistarìa su un volume slargà de l’atuale cava Mirabella, al confine tra i comuni de Breganze e de Sandrigo, e garìa l’obietivo de contegnere le piene del torente Àstego e, conseguentemente, de limitare el perìcolo de dissesto idrogeològico. In tuto l’operassion costarìa setanta milioni e sento mila euro, de cui sirca trenta milioni co sto primo stralcio.
«No sò se vale la pena de ’ndar ’vanti co sto progeto – fa presente Giuliano Stivan – sia par l’inpato sia par le spese alte del preventivo. Ghemo pi de un dubio, e po’ sto benedeto bacino de laminassion gavarìa un inpato sul teritorio par gnente lesiero, parché par tor sù l’aqua i ga da scavar par un chilometro soto l’Àstego, quando co altri corsi de aqua servarìa parecio de manco. Po’ i tènici ga za sperimentà che l’Àstego soto pression soporta 650 metri cubi de aqua al secondo contro na media de 250 de altri torenti visentini. La domanda vien fora spontanea: parché prevedere propio qua un invaso?»
El sindaco de Sandrigo, che ga ciamà rento al dibàtito anca le aministrassion de Breganze, Montecchio Precalcino e Fara, ga paura che la realisassion de sto bacino fassa aumentare i casi de dissesto idràulico, co problemi serti de alagamenti de interati e càneve e problemi possìbili de contaminassion de le falde. «Prima de aprovare el progeto definitivo – conclude Stivan – domandemo a la Region de fare un studio geològico che diga a lètare ciare che no ghe xe nissun perìcolo par el nostro teritorio. No volemo conpensassion, ma la sicuressa de sta operassion e la conseguente concession de na fidejussion de vinti milioni par trent’ani come garansìa par eventuali disastri.»

[torna sopra]