|
Editoriale
Jutarli o no jutarli?
Oramai no ghe xe dubi, se trata de on fenòmeno umano e storico destinà a durare ani e ani. Xe inùtile domandarse se i xe pròfughi o migranti: i xe de i disperà che par tanti e tanti motivi i xe disposti a pagare co la vita la speranza de on futuro miliore.
 | Basta vardare ste man par farse ’n’idea del bisogno de ajuto.
|
Vien spese mejara de parole so ’l “funerale-show”, a Roma, del boss Casamonica, e no se afronta quelo che continua a sucédare ne le aque de l’ex Mare Nostrum, o ne i “centri di smistamento” de i migranti sul teritorio. Oramai domandarse se i xe da ajutare o no, no ga senso. Come cristiani, ma soratuto come èsseri umani, no se pole pi voltarse da st’altra parte. La domanda che dovemo farse la xe de: in che modo ajutarli.
El problema xe enorme e ogni giorno el se manifesta in misura e in forma diversa. Le pagine de i giornài, i telegiornài, i servizi televisi xe pieni de salvatagi, de morti e de sbarchi: el problema xe deventà “permanente” e el ghe restarà par on bel tòco, se no se cata na soluzion civile e umana.
Le proteste, le agitazion, el malcontento i nasse de continuo ne i nostri paesi e ne le nazion dove riva sta pora gente, quela che se ga salvà. No se parla pi solamente del Canale de Sicilia, de Lanpedusa, de Sardegna, de Malta…, se parla de Turchia, Grecia, Macedonia, Albania, Montenegro, Serbia, Bosnia, Croazia, Ungheria, Polonia, Slovacchia, Repùblica Ceca, Spagna, Algeria… Se parla de Germania, Francia, Inghiltera, Belgio, Svezia… dove sti “immigrati illegali” i spera de rivare e de vegnere considerà “rifugiati richiedenti asilo”.
L’Europa, el mondo, noantri italiani, noantri veneti no se jera preparà a afrontare na catastrofe umana del gènare che sconvolge la vita de tuti, parché sto tipo de imigrazion riguarda l’economia, l’istruzion, l’assistenza sanitaria, i servizi pùblici, i diriti umani, come anca la sicureza, la salute, la delinquenza, la prostituzion, la schiavitù… par no parlare del ris-cio terorismo.
Davanti a sto… flagelo, vegnemo al “concreto”, vegnemo al “sodo” come diséa me popà có jera ora de magnare on ovo coto. Dopo non una, ma diese, zento, mile considerazion, concludemo co ’l dire che dovemo ajutarli. Ma come? Mi cossa posso fare?
Intanto xe za on aiuto parlare del problema, pitosto che far finta de gnente. Se pole métarse in contato co la Croce Rossa che ga progeti de volontariato; xe inportante s-ciarirse le idée so ’l diverso significato de le parole “rifugiato” e “migrante”, parché confóndare el significato de ste dó parole pole avere de le conseguenze pericolose: el rifugiato xe uno che sta scapando da na situazion de guera o de persecuzion, el migrante xe quelo che decide de lassare el so Paese in zerca de condizion de vita e de lavoro miliori.
Ga dito ben papa Francesco come se ga da afrontare sto “esodo biblico”, invitando le parochie, le comunità religiose, i monasteri, i santuari a dare a i migranti “una speranza concreta”: no la val proprio gnente “la coppia chiusa, la famiglia chiusa, il gruppo chiuso, la parrocchia chiusa, la patria chiusa”. Pare che calcossa se staga movendo in Europa per l’acolienza de i migranti, ma ghe xe oncora tanta strada da fare.
La nostra storia veneta contadina ghe ne sa calcossa de emigrazion, imigrazion, profughi, carità e solidarietà: na volta on piato de minestra no ’l mancava mai pa ’l poareto che batéa a la porta. ’Desso che la crisi ne ga fato tuti piassè poareti, forse xe el momento de ricordàrselo e de no rifiutare, par quanto possibile, el nostro ajuto a chi ga bisogno, migranti conpresi.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Jutarli o no jutarli?
Oramai no ghe xe dubi, se trata de on fenòmeno umano e storico destinà a durare ani e ani. Xe inùtile domandarse se i xe pròfughi o migranti: i xe de i disperà che par tanti e tanti motivi i xe disposti a pagare co la vita la speranza de on futuro miliore.
de Mario Sileno Klein
Ciàcole visentine
Bacini contro le aluvion, i sindaci vole garansìe
I Comuni vissin l’Àstego dise sì a l’invaso, basta che la Region ghe daga na fideiussion de vinti milioni par trent’ani
de Giordano Dellai
Da Verona
I parenti nobili
de Giacinta Dall’Ora
|
