Da Verona

I parenti nobili

Stessa solfa par el tè de le sinque, quando i dòpara latiera, tejera e sucariera de argento, che me vien i sgrisoloni a pensarghe.

Lu el passa el tenpo a des-centrar television, stereo e conpiuter…

“Ciao, bela!” L’è la me amiga che la me saluda sul ponte de Castelvecio. Mi son invià a nar al mercatin kilòmetri zero, ela l’à za fato. I sòliti tri basi col s-cioco e po’ la mete zo le sporte.
Staolta parto a l’ataco mi:
“L’è un bel tocheto che no ne vedemo. Me digo che l’è da prima de le ferie. ’Ndo sito stà de belo?” ghe domando.
“Son nà a un moto tour con el me omo e, a parte el mal de schena, de zenoci, del lato B, de tuta l’aqua che avemo ciapà, del fato che no ò podùo cronparme gnente parché inte le borse no ghe staséa gnan n’ucia, diréa che l’è nà ben. A casa invesse…” la me buta lì con n’aria misteriosa che me incuriosisse.
“’Sa è sucesso?” voi saver mi.
“’Desso te conto” la ritaca ela e la parte con n’altra de le so storie.
“Donca, quando nemo via un pochetini de giorni, par no lassar l’apartamento udo, le piante che pianze domandando da ber e la roba in frigo che va de mal, ciamemo na copia de vecioti, lontani cusini de me marì, parché i tegna verta la casa. Lori, che i vive isolè in mezo a la canpagna, i se gode da morir star un par de stimane in cità. E che vita che i fa!”
“Vai a spasso avanti e indrìo par el Liston?” ghe domando.
“Magari!” la me risponde ela. “I se intanbusa dentro e i zuga a le mame… nòbili. Intanto i ‘consuma’ i pasti in sala, su la me tola de vero che la se sfriza solo a vardarla; i parecia con el servissio piassè belo, la mèjo toaja, i biceri de cristal, regal de nosse che mi ò doparà solo quando è nato me fiol, le possade de argento che mi lustro e basta. Apena svéji i se bée el cafè inte le chìcare indorè del Setesento, che mi no toco mai par no massiparle. Stessa solfa par el tè de le sinque, quando i dòpara latiera, tejera e sucariera de argento, che me vien i sgrisoloni a pensarghe. I dorme ne la stansa de i ospiti, tra i nissói de lin, che ò ’redità da me nona, anca se i è stenchi e duri, che par stirarli me ghe vol na giornada. Ghè senpre la lavastovilie e el condissionator in funsion che riva de quele bolete che al me omo ghe se indrissa i cavéi in testa anca se el ghe n’à pocoti. Lu el passa el tenpo a des-centrar television, stereo e conpiuter che quando tornemo i è tuti da ‘riassetar’. Quando l’è s-gionfo de tenologìa el passa a la mecànica, cioè el ropeta tra i atressi de me marì che dopo, quando ghe serve un caciavide o na ranela, bison che el roersa el destriga come un calseto par catarli.”
“Marisi” salto fora mi “i me par un fià salveghi. Ma ti no ghe dìsito gnente?”
“Cara, no ghe digo gnente parché i è permalosi e go bisogno de lori, ma prima che i riva go un dafar che no te digo a scóndar roba: la piassè pìcola in cassaforte, quela che intriga soto ciave dentro qualche armaron, anca se lu el riesse a rumar dapartuto, parfin in cantina, tanto che me cato magnà conserva e melansane messe via par l’inverno. Sto agosto s’era oramai invià a partir, quando m’è vegnùo in mente che avéa lassà fora le teje nóe con l’interno de ceràmica che le m’era costè na cifra. Pensa che te pensa, a la fine i ò sistemè inte un posto più che sicuro e son partìa.”
“Cioè ’ndoe?” ghe domando mi, curiosa.
“Bela,” la me risponde ela de paca “i ò sconte in garage dentro el baul de la me màchina e me son portà drio la ciave!”

[torna sopra]