|
Da i Coli Euganei
Quando l’aria sa de mosto
 | Anca st’ano i graspi i xe lì de picolon, drio la piantà, inbriaghi de sole. (foto G. Bellotto)
|
La sigala no ga gnancora finìo de cantare e za se sente in te l’aria odor de mosto che ne anunsia l’autuno. De tuti i profumi che se sente in te l’arco de le varie stajon, penso che questo sia l’odore pi inportante, pi bon. In primavera ghe xe l’odor de i fiuri, che xe tuta na promessa. E eco qua l’autuno, quando tuti i àlbari ga maturà el so fruto. La xe questa la vera stajon de la racolta. Serto che bisogna sfadigare on ano intiero, in modo speciàe drio le vegne che, dopo aver dormìo tuto on inverno, le se sveja, le se scorla l’ultima neve che ghe xe restà ’dosso e le scomissia a mòvarse.
In te sto momento me vien in mente chel’ano che ga fato na nevegada, vorìa dire, fora stajon. Difati ghe gera ancora tacà a i cai de i bei graspi de ua mora e gera proprio strano védarli carghi de neve. Come se qualcun gavesse vestìo de bianco ogni gran de ua che deventava na spece de gioielo. Tute le vegne co le so foje gera carghe de neve. Beh, na roba da védare, da amirare parché no xe serto fàssie da spiegare sta strana belessa.
Ma go canbià discorso, se ben me ricordo, se stava parlando de autuno, ma prima ancora de primavera, quando le vegne comissia a butare. Prima le pianze. Ogni cao piegà in basso, el buta fora la so giossa, segno che el pianze par la contentessa de èssare vivo dopo tanto fredo. Ma le vegne se sa che le ga de le raise tanto longhe e profonde, e cussì le soporta caldo e fredo e anca le vive tanti ani.
In tel nostro pìcolo vigneto se gavéa de le vegne che le gavéa quasi sento ani. Come qualità la gera la gargànega e la marzemina mora. Dó qualità bone e anca resistenti. Difati se toleva su i ròssi par métarla via par l’inverno. I ròssi i se faseva tajando on tocheto de cao co i so graspi tacà e anca le foje. Se ghe ne ciapava tri, quatro e i se ligava co na stropa, lassàndoghe insima na spece de àsola par tacarla via, tacà on ciodo in càneva, o drio na pèrtega tuti in fila. La pèrtega gera na spece de paleto de legno longo, tacà da ’e dó parte, e sicome la ua la ghe piaseva anca a i sorze, se ghe inpirava on piato da ’e dó parte, in modo che i sorze no i podeva ’ndar sù e magnare la ua, parché sbrissiando i petava zo. Cussì la ua par l’inverno la gera sicurà.
Ma ve go contà ste robe, saltando de corsa da i primi pànpani a i ultimi graspi. Chissà parché in te sto momento me vien in mente che a chel tenpo se ghe diseva pànpano a uno poco svejo, on pochetin indrio de inteligensa. Mah! No go dito invesse che i sarìa i primi buti de le vegne a ciamarse cussì, in italian pampini.
Tornemo al primo discorso, partendo da le giosse che vien zo e po’ a la fioritura e via via al graspo che deventava beo zalo come l’oro e dolze come el miele. Noantri pìcoi se gera i primi a sajarla de sera al ciaro de la luna, svejando i paejuni che scapava co on frrr… che ne faseva rìdare de gusto. Se svejava anche qualche gnareto de oseiti, scunti in mezo a l’ua e a le foje. Che bei mominti quei! Proprio da ricordare. E se sbecolava i grani pi grossi, par tòrsene on recio e portarlo in casa, disendo: “La ua xe fata!” Qualche dì pi tardi, se scumissiava el vendemare che gera na vera alegrìa. On graspo dopo l’altro i se ciapava in man, frischi de matina e pi tardi caldi de soe che ’l li gavéa caressà uno par uno. Che dolcessa, gente! Ogni tanto se ghe ne sajava on gran de quei pi grossi. A mi la me piaseva proprio tanto la ua e a dire el vero a ghin magnava anca tanta. Coreva drio le piantà, proprio come na galinèa. “No sta’ a magnare, o mèjo, a sbecolare, quea de i primi graspi drio la caessagna – me diseva el zio Gioanin – parché la pare strania tutà becà; va’ a sbecolare pi avanti. Pitosto senò tìraghene via on recio.” Penseve quanto ben che se ghe voléa a i nostri fruti de la tera!
Intanto rivava l’ora del vendemare e via tuti in tel canpo. Co la so brava fòrbese da bruscare e el so piloto, on sestèo de vimini intrecià come i sisti pi grandi, che se ciamava sisti da staro. Na volta pieni i se portava a casa, du a la volta, co ’l bigòlo in spala. E se caressava sti graspi, caldi de soe, uno a uno, come i fusse tanto oro. Vardàndolo da in parte, el vegneto el pareva proprio on mare de oro. Da lontan se sentìa i cori de chi vendemava in sti altri vigniti e no mancava qualche sigala che ghe rispondéa. Eco che a l’ora de l’Ave Maria, se spandéa in te l’aria el primo odor de mosto che daséa el so messajo: “El vin xe fato…” E noantri pìcoi se vardava i òmeni che vegneva fora dal tinasso co le braghe rodolà fin al zenocio, dopo aver folà co i piè, saltando alegramente.
No vojo pensare a come sia canbià i tenpi, quasi no vorìa vardare la grossa machina (vendemmiatrice) che va avanti in posto de l’omo, batendo forte i graspi de qua e de là… Me par come sia finio l’amore che la gente de i canpi gavéa par la so tera e i so fruti… “Cara la me ua… caro el me vin!” Mi continuo a scrìvare, quasi volendo tornare indrìo co ’l tenpo e intanto el core me dà le so rime:
Viva el vin de i nostri coli / che va zo par el gargato / come on dono del creato. / El vien sù da le raise / dentro el core de la tera / có xe ancora primavera / e pian pian deventa graspo / mosto drento in te la bota / che inprofuma l’aria de la note. / Viva el vin de i nostri coli / che ’l te fa tanta alegrìa / manda via la malinconia / regalàndote on soriso / che fa sognare el Paradiso.
E me par che proprio dal Paradiso, la me gente de on tenpo fassa on soriso a i graspi che anca st’ano i xe lì de picolon, drio la piantà, inbriaghi de sole.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Jutarli o no jutarli?
Oramai no ghe xe dubi, se trata de on fenòmeno umano e storico destinà a durare ani e ani. Xe inùtile domandarse se i xe pròfughi o migranti: i xe de i disperà che par tanti e tanti motivi i xe disposti a pagare co la vita la speranza de on futuro miliore.
de Mario Sileno Klein
Ciàcole visentine
Bacini contro le aluvion, i sindaci vole garansìe
I Comuni vissin l’Àstego dise sì a l’invaso, basta che la Region ghe daga na fideiussion de vinti milioni par trent’ani
de Giordano Dellai
Da Verona
I parenti nobili
de Giacinta Dall’Ora
|
