| de Franca Isolan Ramazzotto |
|
Da Legnago (VR)
El Vespasiano
 | Drento ghèra du posti par orinare e el servéa solo par i òmeni.
|
Vespasiano l’èra on omo con ’na gran inteligenza anca so l’edilizia. L’è stà fato imperatore nel 69 d.C. Oltre ’ver programà el Colosseo, el Foro, el Tempio de la Pace e tante altre robe importanti a Roma, el ga inventà anca on “gabinetto” e l’è stà ciamà el “Vespasian”, propio come l’imperatore. L’era on casoto de cimento a forma retangolare con i cantoni rotondà, alto du metri o poco pi con dessora ’na tetoja lissa par èssare riparà da le intemperie. Drento ghèra du posti par orinare e el servéa solo par i òmeni. Però, l’era fato con furbizia, parché soto ghera on spazio, cossita, stando fora se vedéa le gambe de ci ghèra drento, cossì che i ‘pori òmeni’ i podéa fare i so còmodi senza èssare disturbà. A ’sto punto mi me domando: “Ma al tempo de l’imperatore ghèra solo òmeni? Galo mia pensà par le done? Par so mama?”
’Sti benedeti Vespasiani o pissatòi, qua in te i paesi de la Bassa Veronese, la magior parte i èra stà sistemà in parte a le cese, cossita i òmeni, solo lori, prima de nare a Messa i naséa drento al Vespasian a molàrghene on gozzeto. A Presina, so la frazion de Albaredo d’Adige indo’ go vivù mi, a ’na diesina de passi in parte a la cesa el ghèra e me ricordo che ghe naséa anca i buteleti de la me età, da 12-13 ani, e quando i vegnéa fora felici e contenti, i se daséa importanza e i ne sgognava, tirando fora ’na lengoa longa che ghe tocava parfin la sbèssola. Noantre butelete par chel’ingiustizia e umiliazion ghe tiràino incoste le giare e quando gavéino bisogno noantre ne tocava farla dedrìo el Vespasian. Nar drento? Guai al mondo! I te criava con la ozze grossa. I butini piassè picenini i ghe naséa ’compagnà da i bopà; proibìe nar drento anca le mame. Ma pensè che mentalità! A viene che ’na Domìnica, dopo le Funzion so’ nà a l’Adunanza de l’Azion Catòlica o mèjo de le Aspiranti e verso la fine no ghin podéa pi e me tegnéa la panza. A la signorina insegnante go alzà du déi: l’indice e el medio a coa de róndena, quela l’era la domanda che se usava ’na olta anca a scola elementare par nare al gabineto. L’insegnante la m’à dito: “Va’, Franca, ma fa presto che dopo go oncora da spiegare roba importante.” Son partìa de corsa zo da le scale e in fondo me go fermà de colpo, domandàndome indo’ podéa nare, po’ son corsa verso el Vespasian.
“Ferma lì!” ’na ozze la me dise. Me go oltà e l’era el prete, Don Marcelo Montemezzi. “Lì le butelete no le pol mia narghe, parché drento ghè el diàolo!” Mi ingenua e èbete, come tute in alora, no go reagìo e me la son fata adosso e son corsa a casa, ciapando ’na bela criada da me mama anca parché no gavéa robe da cambiarme. A la domìnica dopo ghe conto a le me compagne quelo che me gavéa dito el prete, ma no’ el resto. Saremo stà ’na trentina e mi go dito: “Che proemo védare se l’è vera che drento ghè el diàolo?”
“Nò, mi go paura!” la ga scomizià dire ’na buteleta. La Taresa Creston che l’è stà anca la me compagna de banco da la prima a la quinta elementare la m’à dito:
“A vegno mi con ti, e se ’l diàolo el ga de le greste ghe buto el sasso che go in man e lo copo!” Pianin pianin, ciapà par man, nemo drento al Vespasian quasi senza respirare. Se fermemo drento, se vardemo atomo con ’na tremarela da mati, ma no vedemo gnente e no sentemo gnente. De fora le butelete, on silenzio de tomba e curiose, e noantre dopo on tochetin semo vegnù fora rosse come le brase da l’udor de desinfetante che ne sbrusiava i oci e el naso. Chel desinfetante el se ciamava creolina. E lora tute le n’à domandà: “’Sa ghè drento?”
“A ghè ’na piera apena incavà alta pi o meno on metro, in tera ghè de i busi e anca dó altane a forma de scarpa par no bagnarse i piè e basta.” Da chela olta sia mi che la Taresa, quando gavéino bisogno, naséino in tel Vespasian, ma el diàolo no lo gavemo mai visto! Alora, quante ciàcole brute ghè stà molà fora in paese, e el prete el n’à parfin dito in cesa, parché zerte le n’à fato la spia e dopo ghe naséa tute!... Le veciote, pore cagne, se ghin scapava le la faséa so l’erba in parte la strada: con ’na man le se ciapava ’na sbrancà de cotolone davanti (che in alora le se usava longhe e larghe) e con chel’altra quele dedrìo e, stando in piè le faséa “la pipì” e con le cotolone le se sugava. Chissà dopo che profumo le savéa, ma dopo de mi e la Taresa le ghe naséa tute, anca quele che prima le n’avéa dito sù. E tuto parché ’na olta a le done i ghe daséa da intèndare quelo che i voléa (da gran che le jera importante!...) I sapientoni i voléa che le restesse indrìo! Pore done!...
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Jutarli o no jutarli?
Oramai no ghe xe dubi, se trata de on fenòmeno umano e storico destinà a durare ani e ani. Xe inùtile domandarse se i xe pròfughi o migranti: i xe de i disperà che par tanti e tanti motivi i xe disposti a pagare co la vita la speranza de on futuro miliore.
de Mario Sileno Klein
Ciàcole visentine
Bacini contro le aluvion, i sindaci vole garansìe
I Comuni vissin l’Àstego dise sì a l’invaso, basta che la Region ghe daga na fideiussion de vinti milioni par trent’ani
de Giordano Dellai
Da Verona
I parenti nobili
de Giacinta Dall’Ora
|
