Da Lendinara (RO)

Maestri de vita

La leterata e poetessa Cristina Roccati.

La Regia Scuola Normale (colezion Mario Andriotto).

A la fine de la primavera, tuti i studenti i speta co΄ansia la fine de le lezion par ritenprarse da le fatighe de un ano de studio, senza savere quanto (visto che inte la vita i esami no΄ i finisse mai) ca jera belo poderse dedicare solo a quéli e coltivare la speranza de na atività futura adeguà a l΄inpegno e a le personali aspirazion.
La me voja de vacanze la se faseva sentire soratuto intel periodo de le superiori, prima de tuto par via de i orari de la coriera, anca s΄à jero tanto più fortunà de quei ca stava a Castelmassa. Difati, par ’ndare a Rovigo a dovevo partire almanco un΄ora prima; anca se i chilometri i xe solo disdoto bisognava tegner conto del percorso a piè da la vècia stazion davanti a le tori Donà e Grimani, fin in fondo al Corso del Popolo, in via Carducci, sede de l’Istituto Magistrale "C. Roccati", l΄atuale Liceo Statale "Celio Roccati".
Quanti ricordi ligà a i professori, esigenti e severi, a le conpagne (quasi tute fémine al tenpo) e a i anbienti seriosi e inpregnà de malinconia. E quanta storia intorno a l΄edificio e a la dòna da la quale el ga ciapà el nome, una de le prime (la terza) laureà. In origine l΄Istituto el jera "Scuola Normale" un tipo de istruzion nata in Francia intel secolo XIX par la formazion de i maestri elementari, sostituìa più tardi da l’istituto magistrale. Intel 1910 vien istituìa a Rovigo la Scuola Normale intitolà a Cristina Roccati co΄ sede in via Carducci. La cesa de San Michele, vizin al conplesso architetònico e i spazi del "conventin" i testimonia la presenza de i Frati Minori Cappuccini i quali i gaveva edificà a Rovigo, intel 1564, el so convento trasferìo definitivamente intel 1888 inte la sede atuale, in via de i Cappuccini.* Durante la prima guera mondiale, l΄istituto, afidà a la Croce Rossa, xe stà ospedale militare de riserva. Inte l΄atrio de la scuola, ΄na lapide del 1940 la ricorda el sacrificio de un grupo de studenti, morti inte i ultimi ani de la guera.
Qualche notizia intorno a la leterata e poetessa Cristina Roccati. Nata a Rovigo el 24 otobre 1732, la xe ’na figura de grande inportanza intel panorama culturale italian, fin da la so zóvane età, dato che a 15 ani la vien acolta e onorà come poetessa inte na seduta de la rodigina Accademia dei Concordi. A Bologna, prima studentessa universitaria non bolognese, la frequenta corsi de logica, metafisica e morale, indirizzando però i so studi soratuto a la fisica e a le sienze naturali. Iscrita in varie Accademie (Concordi, Apatisti de Firenze, Arcadia co ΄l nome de Aganice Aretusiana, Ardenti de Bologna e Ricoverati a Padova), a 19 ani e precisamente el 5 magio del 1751 la se laurea in filosofia, diventando la terza dòna al mondo a conseguire sto titolo, dopo la veneziana Elena Corner Piscopia (Padova 1678) e Laura Bassi Verati (Bologna 1732). Dopo aver perfezionà a Padova el so percorso sientìfico, Cristina Roccati la torna a Rovigo intel 1852 e la se dèdica a lezion e corsi a l΄Accademia de la quale, intel 1854 la deventa Principe, vale a dire Presidente. Inte la stessa cità natale la morirà intel 1797.
El nome de Cristina Roccati el se afianca a quelo del noto umanista Celio, Ludovico Ricchieri dal 1995, ano in cui se ga fuso i dó istituti de antica tradizion: Liceo Classico "Celio" e Istituto Magistrale "Cristina Roccati" in quelo che ’desso xe el Liceo Statale "Celio-Roccati" co΄ i indirìzi Classico, Linguistico, Artistico, Scienze Umane e Musicale. Tornando a la me esperienza, posso dire che queli de le superiori i xe stà ani inpegnativi, par el studio e par na serie de motivi che forse, par tuti quanti, i ga a che fare co΄ i processi de maturazion personali, co ΄l fato de trovarse in realtà difarenti da quele familiari e co΄ persone che gaveva el cònpito de giudicare conportamenti par i quali jera previsto un rigoroso protocolo e risultati senpre rispondenti a le aspetative (salvo rare ecezion de qualche, peraltro odià, "6 politico"). Però go nostalgia de chel tenpo e de i me professori, qualcuno in particolare; anca queli più difizili, tanto par doparare un "eufemismo", i xe stà maestri de vita.

*Ringrazio Mario Andriotto, colezionista de fotografie d’epoca e studioso de la storia de Rovigo.

[torna sopra]