Da Adria (RO)

Canale vivo

El ramo el Canal Bianco che traversa Adria.

I ga messo anca d’i cigni…

Fin a i ani ’40 del secolo passà, el ramo del Canalbianco che traversa Adria el jera na meraveja. L’aqua la coreva senpre, più o manco gajarda, a seconda de le diverse stajon de l’ano, quando che gh’jera magra o quando che rivava la piena. Inte sto secondo caso la podeva intorbiarse, e anca tanto, e portar zo erbe, grata, rami, tòchi de legno e altro; ma tuto passava e tornava la bela aqua ciara de senpre. Le dó rive, qualche metro distante da i àrzeri, le jera contornà da altretatante file lunghe, continue, che no finiva mai, de grata de almanco tre difarenti spece: le tajadele, lunghe, strete, d’un bel verde conpagno de l’erba; le foje, rami più curti de le tajadele co foje conpagne de quele de l’oraro, più scurete, messe propio come l’oraro una de qua e una de là; da ultimo se catava quela che da ela sola meritava el nome de grata, parchè ’pena tocà la faseva vegnere subito spissa inte ’l punto de contato: tacà a un filo lungo gh’jera de i grumiti de aghi, cofà quei de pino, de na tinta verde slavà ch’a cadeva starghe ben atenti, parchè i faseva de chele tàvare che le durava quatro, sinque giorni.
Sti dó serpentoni, che se moveva ondesando propio come de le bisse, i jera el regno de le rane, che da la bona stajon fin al tardo autuno tegneva i so concerti ogni sera e qualche cra-cra el ghe scanpava anca de giorno a le rane più ciacolone. Senpre lì in tra meso regnava i ganbariti, quìi pìculi, boni p’r andare a pescare, ma mèjo ’ncora in fritatine co l’ovo, tocià co la polentina bianca ’pena rovessà.
Verso el centro el canale el se faseva bastansa fondo, tanto da permétere la navigassion a barche e barcuni de bon pescagio. Quelo jera dominio de diverse varietà de pessi. Re el rinato, regina la tenca, e po càifa, bisati, pessine, sbari ghe faseva contorno. E i pescaduri no mancava: più de qualcuno, a l’inbrunire, molà da lavorare, calava le cane e ciapava la sena. Feste nassionali, ferie, o altri tenpi liberi e i pascaduri, cane ligà a la bicicleta i faseva chilometri p’r andare int’i posti che luri conosseva. Ma se questa jera la pesca da tenpo perso, gh’jera i pescaduri de mestiere: quìi con batelo e balansin e sù e zo pa ’l canale; altri, senpre co batelo, tramacio e pèrtega par smarassare i pissi, ch’i feniva par intrigarse int’i busi de la rede, i calava qua, po’ i spostava più avanti, fin ch’i eva ciapà la so quantità; e po’ quìi da fermo co le cane; ma el mèjo jera el balanson, che ’l ciapava da na riva a st’altra e jera senpre un bel védare quando che co du arganèi i tirava sù sta gran rede e se vedeva i pessi saltare.
Ma el gran lavoro lo faseva le barche, quele normali lunghe na dosena de metri, e i barcun, che rivava da l’Istria carghi de legna. Jera un vàntene e vièntene, su d’i pontesèi larghi qualche spana, de fachini che cargava e scargava: e su le rive cari e cariti che portava o portava via roba de ogni tipo, da i fassi de bacalà a i sachi de fromento. E po’ se zuntava i bragossi ciosoti carghi de verdure, che scargava in piassa del Teatro e in stajon i jera senpre contornà da fiuri de articioco, parchè i barcari, ch’i jera anca ortolani, i preparava i fondi d’articioco diretamente in barca, butando in aqua el scarto. I ciosoti i jera quìi che no faseva mai el ritorno a barca voda ma, dopo el squero, int’un posto ch’a ghe ciamàvino “i lodamari” (un depòsito di ledame a fianco del canale artigianalmente alimentà da vari racolitori, fra i quali famoso l’è stà Pitàcaro co la so mussa) i cargava concime pa’ i orti.
Nantra atività che faseva vivo el canale jera el squero de i Duò (anquò Cantieri Vittoria, n’ocupassion a svilupo internassionale par la costrussion de mèsi navali de tute le sorte: motovedete, patuliatori, intercetatori veloci, roba de alta tecnologia e potensa marina, traslocà su st’altra sponda, da la banda de l’Idrovia, ramo esterno del Canalbianco) dove qualche barca vecia o qualche vaporeto ciapava vita nova. Un fià più indrìo, verso la cità, nantro lavoro dava pan e polenta a parece fameje: la lavorassion de la cana e de le erbe palustri. Se faseva grisole co i fassi de cane, rancurà sù inte le maresane, int’i fossi, zo in vale, e stuore co careto e caresina, che i diversi posti ùmidi ofriva in abondansa, specialmente zo inte ’l Delta. E in canale se meteva in fila le barchete e i batei carghi inte na maniera impressionante, che se uno el le vedeva el pensava subito: adesso le se robalta! E lì i descarcava. Par ritirare el prodoto gh’jera barche pronte a vèrzere la pansa par sgionfarla de fassi de grisole e de stuore in canale, su la strada invesse se fermava i cariti. E jera tuto un gran da fare.
Da ultimo no vojo desmentegare el ciaveghin. ’Pena finì le case, che l’ultima portava in alto la scrita co le geme: ADRIA, prima del Borgo, gh’jera na gabina da la parte de canpagna; davanti, da st’altra banda, sul canale, na piataforma de cemento co dessora un casoto che rivava a paro de la strada, prima in legno col coverto a du spioventi, più tardi muri de piera intonacà e coverto piato de cemento; na porta de fero inciavà co tanto de lucheto sul davanti. Dentro gh’jera du tubi grossi che pescava int’un posseto, diviso dal canale da grossa gradela de fero parchè no passesse pessi, pantegane o altro. D’i motori inte la gabina i ciuciava aqua par inviarla diretamente inte la cisterna de la stassion, indove ch’a se riforniva le caldaje d’i treni a vapore, chi mostri che supiava, fis-ciava, infumegava aria e passegeri par portarli a spasso.
La piataforma sul canale jera el mèjo posto par pescare. Sentà comodi su na caregheta, portà da casa, al suto, se calava le cane fin a metà canale, le se posava su d’i pali de cemento – gh’in jera quatro, sinque – che sporzeva da l’aqua e se spetava el movimento de la nièbola. E i fiòi, dove li metemo i fiòi? Quando l’aqua scuminsiava a deventare tivia i se cavava zo, de scondon da so mare, e i scuminsiava a paciarare, fin che i se butava zo dove ch’a gh’jera fondo e po’ i faseva i strapussi da le montagnole. E più vegneva caldo, più fiòi gh’jera in canale, anca se qualchedun ris-ciava de negarse, o parchè i jera ’ndà in aqua prima d’aver fato la digestion o parchè ghe vegneva el granfo. Purtropo qualcun ghe lassava le strasse.
E no mancava ochi e ànare che spassesava da la matina a la sera. De prima matina le done molava le so bestiole, che, na volta fora de casa, tute le case le jera su le dó riviere, le passava la strada, le ’ndaseva zo da l’àrzere, le lassava le so peche inte la marzana e po’ le se molava in canale in serca de pesseti, ganbariti, pavarina o altri tocheti de grata, becolando in qua e in là, fasendo d’i lunghi giri par tornar sù a l’inbrunire, quando le so parone le se faseva su la strada e le scuminsiava a ciamarle parchè le tornesse sù indove gh’jera pronta na cadinela piena de sémola inmissià co le vèntrighe, par po’ andare a ponaro. ’Desso l’aqua l’è senpre turbia, ch’la fa schifo, dentro ghe nàvega siluri grossi da far paura e solo i sièvali i se vede bochesare dal ponte de Castelo. I ga messo anca d’i cigni, ma ogni tanto qualcuno sparisse. Nàvega anca qualche nutria ch’la s’à intanà inte le rive dove no gh’è piere e cemento. Barche e barchete i è sparì tute, al massimo se pol védare qualche canoa, quando che a qualche apassionà ghe vien in mente de organizzare na gara. No gh’è più i canaròi, i pescaduri, i fachini e tuti quìi ch’i se ciapava la palanca sfrutando el canale.

[torna sopra]