Ciàcole visentine

El Premio Benetazzo va in Sicilia
La scritrice Maricla Di Dio, che abita vissin Enna, se xe agiudicà la tersa edission del concorso intitolà al pare de le Pro Loco de tuta Italia

El mai desmentegà Michele Benetazzo.

El primo premio, Maricla Di Dio.

Le autorità presenti a la cerimonia de premiassion: da sx, Fabbris, Carlotto, Ancetti, Stivan, Ciambetti, Pretto e Righi.

El caldo de un strucon forte oltra i stecati de la malatìa. Xe l’emossion catà fora dal raconto “Veniva dal mare” scrito da Maricla di Dio, de Calascibetta (Enna) che ga vinto la tersa edission del “Premio letterario Michele Benetazzo”, organisà dal Consorsio de Pro Loco “Astico-Brenta” e intitolà al mai bastansa crià presidente de la Pro Loco de Sandrigo e del Consorsio Astico-Brenta, presidente nassionale, regionale e provinciale de l’Unpli, fondà da lu stesso e anca inventore de la Venerabile Confraternita del Bacalà a la Visentina.
Maricla Di Dio, che ga un nome propio registrà a l’anàgrafe come Maria Cristina Clotilde, xe autrice teatrale, poetessa e scritrice afermà e xe vegnesta prima de Franca Monticello de Montecchio Precalcino, autrice de “Con la montagna nel cuore”, e de Grazia D’Altilia de Vico del Gargano (Foggia) che ga scrito “Nuove mappe”, ’nte la classìfica stilà da la giuria, comandà dal diretore de “Il Giornale di Vicenza”, Luca Ancetti, che ga leto e selessionà i mèjo de i 292 raconti insentrài sul tema “Le strade di casa”. Un tema piasùo no poco a i partessipanti al concorso provegnenti da tuta Italia, che ga prodoto de i scriti che ga aumentà l’autorevolessa de un Premio “zòvane” ma za conossùo e afermà a livelo nassionale.
I venti finalisti ga ’vùo la sodisfassion de védare la publicassion del so raconto rento a na antologia èdita da l’istesso Consorsio e publicà da Editrice Veneta, mentre i primi tre ga messo in scarsela anca un assegno rispetivamente de 1250, 1000 e 750 euro, consegnà a la cerimonia de premiassion svolta sabato 6 majo ’nte la sala consiliare de Sandrigo, ospità dal sìndaco Giuliano Stivan.
L’evento, cui no ga vossùo mancare el presidente del Consiglio regionale Roberto Ciambetti, el presidente de la Pro Sandrigo, Fausto Fabbris, e ’l presidente de la Venerabile Confraternita del Bacalà a la Visentina, Luciano Righi, xe stà utile par mensonare ’ncora na volta l’amore par la cultura e par el teritorio vèneto da parte de Michele Benetazzo, el mai desmentegà “Avvocato” sconparso ’ntel 2009, del quale la fiola Cinzia e ’l fradèo Antonio ga vossùo ricordare la gran passion par la scritura narativa, che za a diese ani ghe ga fato ciapare un premio de la Cassa de Risparmio.
La capacità de Benetazzo de trasmétere l’amore par el belo in tute le so forme e de valorisare le risorse locali xe stà ricordà dal presidente de le Pro Loco visentine, Bortolo Carlotto, che ga sotolineà che le linee guida de le Pro Loco xe ’ncora quele fate da Benetazzo. Da ùltimo el presidente del consorsio Pro Loco Astico-Brenta, Francesco Pretto, ga invesse parlà de la gran partecipassion dovùa anca a un tema propio indovinà.

[torna sopra]