|
Editoriale
Có xe la nostra ora…
… no ghe xe né santi né Madone che possa canbiare el programa destinà par noantri fin dal momento che semo vegnù al mondo e che ne ga fato ’ndare ’vanti sul sentiero de la vita fin a quando xe finìa la càrica de la nostra susta.
 | | Tuti i colaboratori de Quatro Ciàcoe se unisse nel cordolio a i familiari del caro Guido. |
No xe che sia belo métarse a fare ragionamenti so la provisorietà de la nostra esistenza, ma de le volte se xe costreti da le circostanze, da l’ocasion pur senpre triste de dover saludare uno de fameja, na persona cara, on amico che ga finìo de vìvare, passà a milior vita o che xe volà “in cieli azzurri, sopra i monti e sopra il mare, andando per il mondo che confini non ha” come dise le parole de na canzon.
Eco, volemo propio saludare el nostro amico GUIDO DE NOBILI che la matina del 9 de Magio 2017 l’è partìo in volo par chel viajo senza ritorno, lassando qua in tera i tanti segni del so passajo, le pèche de la so longa caminada (95 ani fati el 10 genaro passà), l’amore par la so Elda, i so cari fiòi Laura e Emilio, i so mile inpegni, la so fame de conossenza e de fare esperienza, la so esuberanza, la generosità, la passion sportiva – conossudo come memoria storica de la scherma, nel ’98 el ga publicà la storia del Petrarca Scherma e del Trofeo Luxardo de siàbola –, el so inpegno par le tradizion e pa ’l nostro dialeto veneto.
Propio scrivendo regolarmente par trent’ani so le pagine de Quatro Ciàcoe, da bravo giornalista, el ga vudo modo de registrare storie de anbiente, descrìvare personagi, parlare de avenimenti, ricostruire storie par el recupero de na civiltà tramontà massa in pressia, al punto che le generazion de oncò le fa fadiga crédare a come se vivéa non tanti ani fà.
Guido el savéa ben quanto xe necessario ricordare e far savere come che i jera òmani e done che la pi parte ’desso riposa ne i silenziosi camposanti de i loghi natìi. E xe propio a lori che dovemo quelo che semo oncò e come oncò podemo vìvare: solo in sto modo sarà onorà el so passato e l’alto valore de le so fadighe.
La jera propio questa l’abilità del Guido da Musil: scalumare ne le vicende de ieri, scoprendo raise sconte e ricostruendo figure, vicende, identità de on mondo decisamente sbiadìo.
Co la so forza de volontà, a la bela età de 85 ani, ècolo tra le nùvole a zercare emozion par rinovare el “so” breveto de pilota civile, otegnù in chel lontano 1940 a l’aeroporto “Nicelli” al Lido de Venezia con Alfredo Perego, istrutore anca de Benito Mussolini. I so amici ironizava so sta passion pa ’l volo e i diséa: “Cossa voéo dir, da uno come Guido, se ’l dovesse socónbar par incidente aereo. L’à fat la so selta, a so parer pi oportuna.” E lu a rispóndare: “D’acordo su la selta, ma intanto preferisse voear sul me cel, pitost che in quel, pi alt, come insegna la Bibia, che par rivarghe bisogna prima… cascar zo.”
Sta volta inveze, chi lo zerca al telefono, el se sentirà propio rispóndare: “Guido, al momento, no l’è disponibile: el sta volando in cel!”
Metàfora de la vita: co la spontaneità del so linguagio preferìo, Guido el ne dise che jera rivà l’ora de partire par el viajo nel tenpo, on viajo senza nessun perìcolo de avarìe, né ris-cio de cascar zo, parché xe ben ciaro el piano de volo e anca la destinazion, garantìa da zerte assicurazion “fidate” che porta el nome del card. Loris Francesco Capovilla, za angelo custode de Papa Giovanni XXIII, o de don Armando Durighetto, custode del Tempio de i Caduti del Basso Piave a Caposile: tuti grandi amici de Guido, talmente amici, al punto de ’ndare a morire el stesso giorno (9 magio) che xe morto don Armando, ’pena conpìo i 100 ani.
Caro Guido, no desmentegarte de vardare verso basso, dove, no se sa fin quando, semo qua inpegnà a difèndare i to stessi valori, conpresa la lingua de la fameja e de i sentimenti pi profondi e sinceri.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Có xe la nostra ora…
… no ghe xe né santi né Madone che possa canbiare el programa destinà par noantri fin dal momento che semo vegnù al mondo e che ne ga fato ’ndare ’vanti sul sentiero de la vita fin a quando xe finìa la càrica de la nostra susta.
de Mario Sileno Klein
Ciàcole visentine
El Premio Benetazzo va in Sicilia
La scritrice Maricla Di Dio, che abita vissin Enna, se xe agiudicà la tersa edission del concorso intitolà al pare de le Pro Loco de tuta Italia
de de Giordano Dellai
|
