|
Editoriale
Quando ca jèrimo poareti…
Sentir parlare oncò de “povertà” fa male al cuore, spece par chi ga za conossùo quela de i ani nefandi del tenpo de guera e anca del dopoguera. Cossa bisognarà inventarse par métarghe on rimedio a sta piaga? Ghe pensarà chi comanda o dovaremo fare calcossa tuti?
Forse el problema el xe pi serio ’desso de na volta, parché da alora xe canbià tante robe: la vita che se ga slongà, la salute che xe pi malmessa, spece a na certa età (’desso ghemo a disposizion senpre pi medicine, ma senpre manco salute!), el costo de la vita, la confusion de la vita moderna, le esigenze, la mentalità, l’egoismo, l’indifarenza, el bruto esenpio de chi ne comanda, la circolazion sproposità de le brute notizie e del male che ghe xe in sto mondo…
Queste xe tute piere tirà contro la pora gente che, pi che lamentarse e domandare aiuto, no la sa sa fare.
E la dignità dove la metemo? Xe cussì che, a causa de la crisi economica, quelo che prima jera on paron, on datore de lavoro, on inpresario, on diretor o funzionario de banca el xe finìo su na strada, giorno e note, e el vive so na casa de cartoni, co la carità de na coerta, on pasto caldo, calcossa da métare soto i denti, e tante ociade de traverso de chi passa par la strada e mal soporta la presenza scomoda de sti pori disgrazià.
Solo nel nostro paese i dise che ghe xe milioni de persone a rischio povertà.
Par carità: ghe xe anca tanti aiuti da parte de associazion caritative, ma no i pole da soli sanare la piaga de sta “povertà” che na volta se ciamava “miseria che insànguana”.
Chi viene da chei ani tra ’l 35 e el ’45 del secolo passà e oncò ga la fortuna de avere la melona a posto, disemo mèjo la mente lucida, el se ricorda ben quante volte el ga dito: “Mama, go fame!” senza però avere riscontro concreto, se no quelo de on tòco de pan vecio da rosegare fin l’ultima frégola. Senò… lo savemo ben: bisognava rangiarse in coalche modo!
Par fortuna la tera la faséa quelo che fa oncò el volontariato. Erbe e raise de ogni tipo le podéa darte na man a ’leviare i struchi de stómego.
La generosità de la gente de i canpi la te parmetéa de nare a rancurarte quelo che restava so ’l canpo dopo el racolto. Cussì se naséa a spigare el formento, a rancurare le tegoline prima che vegnesse arà soto le piante; coalche zimo de ua desmentegà tacà le vegne jera rosolio; i croatèi de i pomari no vegnéa rancurà tuti par el mas-cio e cussì on pasto ghe jera anca par ti; prima ch’i tajesse la cana del formenton, te podevi rancurarte qualche panocia; i vizini de casa che gavéa copà el mas-cio i te regalava on par de ossi e anca lì a se podéa darghe gusto al broeton de verze…
Tuti ricordi de coando ca jèrimo veramente poareti, ma propio par bisogno ne restava la volontà e el corajo de reagire e de conbàtare la miseria.
Disemo anca che ghe jera piassè generosità e che i problemi de na fameja poareta che staséa ne la corte i deventava problemi de tuti.
No ghe jera tenpo de avere tante zimerie (pretese) e se se contentava del poco. Quanti vestiti usati, desfà, portà in tintoria e po’ rifati par no parere on zaltron có te nasevi a scola, che te paréa che tuti te vardesse ti…
Eco, ghemo rispolvarà sti ricordi par fare on confronto tra la povertà de ancò e la miseria de ieri, anca par védare se quela de oncò la ga calcossa da inparare da quela de ieri, propio par zercare de inventarse coalche rimedio.
Saralo possibile? Magari in parte sì. Propio a partire dal contributo de i protagonisti stessi de la povertà de i giorni nostri. Utopia? Ilusion? In parte sì, in parte nò, parché, da che mondo xe mondo, senpre gavaremo tra de noanri “i poareti”.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Quando ca jèrimo poareti…
Sentir parlare oncò de “povertà” fa male al cuore, spece par chi ga za conossùo quela de i ani nefandi del tenpo de guera e anca del dopoguera. Cossa bisognarà inventarse par métarghe on rimedio a sta piaga? Ghe pensarà chi comanda o dovaremo fare calcossa tuti?
de Mario Sileno Klein
Da Verona
El Castel de Montorio
de Mirco Castellani
|
