Da la Marca

L’edilissia vernacolar

’Na costrussion de tipo rural tradissional… da restaurar.

Meridiana so ’na casa tradissional de la Marca.

L'omologassion cultural causada da la globalizassion de 'sti ultimi ani la ga portà de recente a stimolar ’na discussion critica nel canpo de l'architetura, spece la bioarchitetura, co ’na rivalutassion tardiva, ma inportante de la vecia edilissia vernacolar o architetura spontanea, che i nostri veci i portava ’vanti sensa bisogno de archistar o designer, seguendo i modèi consolidài da l'esperiensa e utilizando i materiali costrutivi del posto in streta economia e funsionalità.
La filosofia costrutiva la ricoreva a tipologie sènplici, essensiali, ma no prive de decoro estètico e che gavéa inoltre el gran pregio de assicurar el minimo inpato anbiental-ecologico e de inserirse a perfession nel contesto del paesagio.
Le costrussion de ’sto tipo, sia a uso civil che rural, le jera difuse dapartuto fin a la metà del Noveçento, ma nel secondo dopoguera, co l'abandono de le canpagne, el svilupo economico e l'arivo de novi materiali, la gran magioransa de le vece case la xe stada butada zo o ristruturada in maniera pesante e solo pochi esenplari xe restài. Da questi se vede che, oltre al legno, i materiali pi usài jera i laterissi in pianura, i sassi e altro material lapideo ne la Pedemontana e ne le zone intermedie ghe jera un uso misto co ’l ricorso al muro "a spin de pesse", cioè file de piere de fornase alternàe a file de sassi, co ’na possibilità incredibile de conbinassion sia cromatica che geometrica, tanto che ’sta forma muraria, par el so aspeto inconfondibile e la so elegansa la xe diventada squasi el marchio de le case tradissionali trevisane, sia a destra che a sinistra del Piave. La jera ’na solussion ingegnosa parché la permeteva de usar sensa alcuna spesa i sassi che ancora unquò se trova in abondansa su le rive del Piave e che ’na volta i podeva vegner recuperài anca da i canpi dopo ogni aradura, quando che i vegnéa cavài da la tera, solitamente da i putèi e imuciài ne le "masiere", pa’ èssar utilizài anca a tirar sù mureti a seco, spece drio i confini de i poderi de le zone de colina.
Altri elementi tipici jera la ritonda o valesana, un fogher sporgente dal muro perimetral, co un camin largo che se conpagnava tante volte a la giràndola, un segnavento special che, giràndose, el biocava l'entrata de i rèfoli, assicurando cussì un perfeto tiragio del camin, che podéa ciapar forme diverse, da quelo pi senplice a stolina, cioè quadrangolar co ’na lastra de piera come copertura, a queli pi ornamentali, come quelo a inpiria o quelo a forçela o coa de rondine, che rivela l'influensa lagunar, queli a dado e queli a capana co quatro falde spioventi.
L'interno de la casa el prevedéa le scale in legno, come anca i siòli e le travadure a vista; viçin al larin o fogher jera presenti anca le ojere, le nicie nel muro che un tenpo serviva a contegner le lucerne, i candelieri, le lanpade a petrolio, le torce e i fulminanti o l'esca par inpissar el fogo prima che rivasse el gas ne le abitassion.
La casa tradissional la podéa vegner personalizada anca co altri elementi, come le grate in fero batùo, un afresco sacro co ’l santo protetor de la fameja, ’na meridiana par indicar el mezogiorno, un inserto de piera ricavà da un edificio crolà o da qualche vila in abandono, parfin de i pinàcoli in teracota prodoti in forma industrial da le fornase Appiani e Gregorj fin a i ani Sessanta del secolo passà e che se ispirava de solito a motivi cinesi o indiani, ma comunque orientalizanti e che resiste ancora su vari querti de le case de periferia.

[torna sopra]