“La Sguaratà”- Ciàcole adriote

Sta casa l’è mia!...

No l’è un castelo, no l’è na regia e no l’è un palasso. L’è na casa per na fameia pìcola.

Quatro muri ca vole mantegnù, sistemà, piturà in te i ani…

No l’è un castelo, no l’è na regia e no l’è un palasso. L’è na casa per na fameia pìcola, de quele de ancuò ca se ferma a pochi fiòi e ca fa i conti co le strete de portafolio che el tenpo inpone.
Co sacrifici, e co na vita controlà, la fameiola à conprà casa e la respira perché no la pagarà più l’afito. Ma, a un fià a la volta, la se rende conto che proprio sua no l’è!
Riva le tasse e el Stato, da la ganassa bona, no ’l fa serto tante considerassion:
“Abonemo la prima casa, scontémoghe in diese ani serti lavori de sistemassion, ma no molemo l’osso c’l’è senpre bon da rosegare e, ogni tanto, con na scusa o co st’altra,batemo cassa!”
Che po’, na casa l’è tua, se la va ben, fin a sento ani (per chi ghe riva) e po’, i to fiòi e eredi, se i la vole, al to tirar de laca, i ga na caterva de schei de succession da pagare, tanto da no mancare de indebitarse per portare avanti i beni de… fameia.
No parlemo, po’, de le spese de notaio. Na vera ciucià de portafolio ca podarìa, co tuta tranquilità, èssere sostituì da i Ufici de le Entrate co manco spèrpero e sensa ingrassare la vaca notarile in tute le forme.
Na casa tua per sento ani se la va ben. Quatro muri ca vole mantegnù, sistemà, piturà in te i ani e che, tuto somà, vien tegnù sù par el Stato ca resta, in fondo, unico paron.
Se chi ga casa no fasesse i lavori e no la sistemasse, cossa ghe restarìa de muri al Stato? Pian pianin tuto ’ndarìa a ramengo e i beni beneficiarìa solo de i oci da piànzere.
Casa tua. Sento ani de sacrifici e de spese, bastonà da tasse e da pesi vari ca va a rinvigorire l’Erario e a dare sicuressa a i stipendi de Roma e de le so varie filiali regionali e locali.
Mal no sarìa rivisitare sta deprimente situassion e far respirare de più chi mantien, in fondo, i beni del Stato co inpegno e sacrificio, faséndoghe sparagnare a i governanti spese de manutension co spenelà de lavori e de colori ca dona un ritorno de bela imàgine anca al turismo.
No se parla de castèi, de rege o de palassi. Se parla de casa per la fameia, un dirito ca dura sento ani, forse, e ca no dovarìa subire, al trapasso, bastonà de notài e de tasse de succession quasi che la vita, in casa propria, sia na punission che i eredi deve pagare magari “benedendo el morto anca dopo la partensa…”

[torna sopra]