Robe de Ciósa

Le fiabe ciosòte

La fiaba del “Barba Sucon” vista da i fiòi.

Forse tanti, ciosòti o no, no i sa che Ciósa ga el privilegio de avere un patrimonio de fiabe del tuto ciosòte (e perciò “inedite”) e del tuto diferenti da quele più famose, nate da la fantasia de i nostri noni e de le nostre none (e podaréssimo dire adiritura de i nostri avi), tramandà de generassion in generassion, che incantava fiòi e fìe sentà, arente al foghero, ne le longhe sere d’inverno, in circolo a ’scoltare a boca vèrta le fiabe contà dal vecio o da la vecia de turno, sentà sul so caregon. Ve li imaginé ’sti fiòi e ’ste fìe che se beava a ’scoltare ’ste fiabe? Quasi tute aveva come protagonisti strighe e “òmeni cativi” e le gera ambientà a Ciósa o anche in posti indefinìi, altre invesse le riguardava el cosideto “macabro”, destinà a spaventare i “bambini” e che ghe fèva pèrdare el sòno… prucuràndoghe de i incubi... Per fortuna che quasi tute le gera fiabe a lieto fine, in armonia co ’l deto “E i à vivesto contenti e felissi”.
’Na caraterìstica de le fiabe ciosòte gera la classica tiritera de chiusura de tute, che fasèva cossì:

Da Vigo al Domo
déne un franco a peròmo
e da Vigo a Santa Maria
contéme la vostra
ché la mia xe finìa.

Per i non ciosòti disemo che Vigo e Domo (o Santa Maria) indicava i punti estremi de la sità, a nord e a sud, praticamente se intendeva dire la sità intiera.
Ma adesso ze ora de citare i titoli de ’ste fiabe. Ècoli: “El Barba Sucon”, “Quela de pessi”, “El maestro e Piero”, “Gentile”, “Pométo Rosséto”, “Gamba mèa”, “Bàrnaba”, “La serva Margherita”, “La vale dei sete morti” (questa la sarìa pi che altro ’na legenda o ’na storia pitosto che ’na fiaba e se riprometemo de presentarla nel prossimo nùmaro). Stavolta riportemo la fiaba del “Barba Sucon”, che ze presente anca ne la favolistica de altri loghi co qualche variante nel titolo e ne la trama. Per esempio, nel Polesine la ze cognossùa come “La storia del Barba Sucon Suchèla”; a Padova come “Le frìtole per la nona”; a Mira come “’A storia del Nono Cocon” e a Seren del Grapa come “El Barba Nason”.

LA FIABA DEL BARBA SUCON
Ghe gera ’na volta ’na mama, un papà e dó bambini. La mama la ghe dise:
- Sentì, bambini, ve fasso le frìtole.
Alora la bambina ghe dise:
- Sì, mama, però semo sensa fersura!
- Alora ti bisogna che ti vaghi a tiòre la fersura dal barba Sucon.
- Mi no vago! A ze un vecio bruto, el Barba Sucon!
- Se no ti va, no ti magnarà frìtole.
- Va ben, andarò.
- Però varda de fare a pian le scale, perché senò a se rabie!
- Va ben, mama.
La camine, la camine e la rive a la casa del Barba Sucon. La bate a la porta e pian pian pian la se méte a dire:
- Baaaarba Sucooooonnn! Imprestéme le fersura, el fersurin e ’l fersuron!
- ’Speta che me meta la camisa.
- Va ben! Baaaaaaaarba Sucoooooonn! Imprésteme la fersura, el fersurin e ’l fersuron.
- ’Speta che me meta le braghe.
- Baaaaaaarba Sucooooooon!
- ’Speta che me meta le patèle!

Intanto ’sta bambina rive de sóra, la vede ’st’omon grando! Brrrutttto! Spórrrrco!
- Cossa vòstu?
- M’à mandào mia mama che ti m’imprèsti la fersura, el fersurin e ’l fersuron.
- Senti, mi te la dago, però bià che ti me porti dièse frìtole, dièse pani e un botilion de vin!
- Va ben! Ghe dirò a mia mama.
- Dài che andémo da basso che te dago fersura, fersurin e fersuron.

Có i ze al secondo giorno, la bambina ghe porte indrìo al Barba Sucon fersura, fersurin, fersuron. Per la strada ghe vien fame e cossì, una dopo l’altra, la se magne tute le frìtole. Po’ghe vien sé e la se beve tuto el vin.
- E adesso come fasso? El vecio Barba Sucon no ne prestarà pi la fersura, el fersurin e ’l fersuron.

Proprio là vissin ghe gera un cavalo che fèva la caca. Co de le fòge la bambina impaste de le frìtole e quando el cavalo fa la pipì la impenisse la botilia. Camina, camina, l’arive a la casa del Barba Sucon.
- Baaaaarba Sucooooooon!
- Su qua! Cossa vuòstu?
- T’ò portào la fersura, el fersurin e ’l fersuron e la botilia de vin.

El Barba Sucon assage le frìtole e a dise:
- Che schifo! Questa la ze caca de cavalo! Me farò la boca bona co un puoco de vin. Che schifo! Questa ze la pipì del cavalo! Bruta imbrogiona, stanote te vegno a ciapare.

’Sta bambina scampe via, piena de paura! La pianzeva! La va a casa e la ghe dise a so mama:
- Sastu, mama, cossa che a m’à dito el Barba Sucon? Che stanote a me vien a ciapare!
- Noooo! A fa da posta!

La sera ’sta bambina va in leto. Có ze mezanote i sente per le scale: pim! pum! L’aveva molà tute le caéne sto Barba Sucon: Pim! Pum! Pim! Pum! Alora ’sta bambina lo sente e la sighe:
- Mama! Mama! Mama!

Intanto se alse el papà, a tiòle un legno in man e co ’sto legno a varde de mandare via ’sto omo, ma gnente da fare! Alora a ciape sù, a puoco a la volta a ghe dise:
- Senti, Barba Sucon, vai via da ’sta casa!

La seconda sera a ghe vien ancora ’sto Barba Sucon, e ghe dise el papà:
- Varda, Barba Sucon, n’ò gnanche schei da comprarte la roba! Aspeta, aspeta qua vissin, vardémo s’i m’impreste qualcossa.

E a ze ’ndà a ciamare ’n altro omo. Alora tuti dó col fusile e co ’l s-ciopo (i aveva un s-ciopo a peròmo) i à vardà de mandarlo via. El Barba Sucon finalmente a s’à deciso de scampare via.
Intanto la bambina ze vegnùa fora dal scondèlo dove la s’aveva sconto e so mama la ghe fa:
- Ti à imbrogià e disubidìo. Per stavolta te perdono, ma ti, frìtole, no ti ghe ne magni pi nianca una perché ti te l’à za magnàe!...

[torna sopra]