|
Da Verona
El Castel de Montorio
’Pena fòra de Verona verso Vicenza, su ’na colineta se vede da secoli el castel de Montorio. Se lo riconosse subito parché el ga ’na forma particolare: ’na tore alta in centro con dó tori più pìcole da le parte… Visto in distansa el par come un tridente de piera puntà verso ’l cèl.
La so storia l’è antica: za al tenpo de i Romani la colineta de Montorio l’èra stà fortificà con la costrussion de un “castrum”. Nel X secolo su le rovine del vecio “castrum” è stà costruì el primo castel: un mastio de piera con un giro de mura intorno. In epoca scaligera el castel l’è stà sgrandà zontàndoghe un secondo giro de mura, el mastio l’è stà rialsà a forsa de matoni rossi e da le parte ghè stà zontà le dó tori più basse che vedemo ancò. Ne l’800 è rivà i austriaci. Vista la posission strategica a l’inbocadura de la Val Squaranta i à pensà ben de costruirghe lì anca un forte. Par fortuna invesse de demolir o modificar el vecio castel (solussioni costose anca par lori) i à preferì costruir de sana pianta el forte su n’altra colineta lì vissìn.
Da ’sto forte austriaco, come da tuti i altri su le toresele de Verona, no è mai stà sbarà gnanca un colpo. Passà l’800 el castel l’è ’ndà conpletamente in rovina: fora e dentro ghè cressù sese piene de spini e ormai i èra in pochi a ’verghe el corajo de ’ndarlo a esplorar. Cusì come al solito è fiorì le legende… e adesso ve ne conto qualcheduna.
La più famosa l’è de sicuro quela de la “Galerìa”. Da secoli se diséa che da soto el castel partisse ’na galerìa longa chilometri, e che passando soto l’Adese (e soto Verona) la rivasse fin a l’Arena. ’Sta galerìa la sarìa antichissima e piena de ramificassioni… e ci ne i secoli à proà a esplorarla no è mai tornà indrìo. ’Na “bufala”? Sì e no… parché se in tute le tradissioni popolari ghè un fondo de verità, el ghè anca par questa. Montorio l’è da senpre un posto da aque sorgive e za i antichi romani i avéa costruì ’n acquedoto che, corendo in parte sototera, dal lagheto Squarà el portava l’aqua fin a Verona. El tunel l’esiste ancora e l’è stà scoperto e esplorà proprio de recente, confermando a sorpresa ’na “memoria” vecia de domila ani.
Un castel medioeval no ’l sarìa gnanca DOC sensa un fantasma… e anca quel de Montorio oviamente el ga el suo: el “Castaldo”. Se conta come uno de i Scaligeri el s’avesse invaghì de la mojer del castaldo… e, par averghe el canpo libero, l’avesse fato eliminar el scomodo marì. Ma el castaldo l’è tornà durante la note a portarse via la mojer, e ancora ’desso ogni tanto te li vedi caminar su le mura del castel tegnéndose par man.
Par n’altra legenda à contribuì adiritura Boccaccio. Nel so romanso “Filocolo” i protagonisti Florio e Biancofiore (’na spece de Giulietta e Romeo con manco “phatos” ma più aventure) a la fine i vien sepelidi proprio nel castel de Montorio. Nel ’500 un leterato cremonese, Domenico Bordigallo, el scrivéa convinto: “Cinta da ogni parte da monti si eleva la rocca di Montorio e la sua valle amena verdeggia di frutti. Florio arse d’amore per Biancofiore: essi giacciono lì e in un’arca si trovano le ossa di questi due illustri personaggi.” Cusì da alora ogni tanto ghè ci parte, armà de sapa e bail, par çercar in mezo a le sese de spini la famosa “arca” de i dó amanti.
Dopo ghè el famoso “Posso de i cortèi”. Se conta che nel “mastio” ghe sia ’na porta segreta che la dà su un “posso”, fondo e scuro. El sfortunà che vegnesse fato passar da lì, dopo un volo de vinti metri, el finirìa a farghe conpagnìa a i tanti scheletri che sul fondo i sta infilà fra un cortel e l’altro. L’origine de ’sta legenda (che però ò sentì anca par altri castèi) l’è facile da capir: bisognava spaentar un poco i fiói par impedirghe de ’ndar a esplorar i ruderi… magari el posso co i cortèi no ’l ghè mia, ma tanti altri pericoli “veri”, quei sì.
Qualche ano fà è inissià el recupero: un bel giorno s’à visto el castel tuto incartà, con le gru che spuntava su in mezo a le tori. S’è ’ndà avanti cusì par un ano, o forsi anca par dó, ma quando el cantier l’è stà tolto i veronesi i à scoperto che el spiasso interno l’èra sta ripulì e atressà par feste e atività a l’aperto, che èra stà fato el posto par métar le màchine e sistemà la strada par rivar fin sù. Tirando fora le careghe se pol parfin far teatro... Ve l’imaginìo “Amleto” recità soto la luna piena tra le mura de un vero castel medioeval (con fantasma vero!)? Quando che i le fa, ve lo digo!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Quando ca jèrimo poareti…
Sentir parlare oncò de “povertà” fa male al cuore, spece par chi ga za conossùo quela de i ani nefandi del tenpo de guera e anca del dopoguera. Cossa bisognarà inventarse par métarghe on rimedio a sta piaga? Ghe pensarà chi comanda o dovaremo fare calcossa tuti?
de Mario Sileno Klein
Da Verona
El Castel de Montorio
de Mirco Castellani
|
