Da la Bassa Padovana

Spèndare par sparagnare!
Sconti e Saldi, Black Friday, Oferte Speciali, Svuoto Tutto!, Mercatini senpre e so tute le piazze: tuto ne invita a spèndare le coatro palanche de la paga o de la pension!

I ne costrinze, par imitazion, a fare coelo che che altri i dise e che i fa.

Tacàndose al testo Dal barato a i schèi, ca go messo zo so la pagina de Q.C. che el diretore benevolmente el me pùblica, e vedendo par television le interviste de coéi che (i dise lori) va a far la spesa de scarpe e vestiti solo durante i Sconti, a go fato ’na riflession. I ne costrinze, par imitazion, a fare coelo che che altri i dise e che i fa. A semo deventà de i copioni, par non dire de pèzo. E po’ i te dise anca coanto che spende i italiani a testa par sti sconti, e ti, ca non te voi èssare da manco a te vè a conprarte robe ca non te serve, parché i te fa el sconto. A te spendi par sparagnare! A non bastava mia i Sconti e Saldi che le nostre boteghete de stofe o de scarpe del paese le tacava fora de la pora vetrina ’na volta a l’ano, e magari le ghe zontava ogni tanto ’na Svendita totale per Fallimento, che non jera gnente vero, anca se a non sò come che le fesse ’nare avanti ’ste boteghete co i pochi schèi che girava in canpagna.
Adesso a te si tormentà da i giornài, da la television, da i volantini, dal telefono, dal computer, da brava gente che te vole vegnere incontro par farte sparagnare, faséndote spèndare schèi!
Po’, par telefono, a pare che i te i regala schèi dato che te si stà sortegià tra tanti, sentendo i discorsi de “speaker” che magari i te telefona da la Romania o da l’India, indove che ste organisazion comerciali le se rivolge in coéi “Call-Center” par spèndare poco. Par forza, se i ga da darte la roba par gnente a ti! E a te despiase a rispóndarghe male, parché a te sè che la xe gente, anca laureà, che a la xe pagà poco e magari solo se la conbina l’afare. Alora a ghe rispondo ca son iscrito al “Registro delle Opposizioni”, e coasi tuti i desmete la telefonata senza insìstare.
Bisognarìa ’vere el portafolio senpre gonfio par contentare tuti coéi che te ofre on afare, ma i schèi che gira i xe senpre coéi, o senpre manco, anca se i dise par television che a xe aumentà el risparmio de i italiani, sì ma coài italiani, coéi che staséa ben anca prima, dato che i ga el corajo de dirne che la richezza la xe concentrà so poche persone, senpre pi siore, senpre coele. A xe propio vero che “schèi fa schèi e pioci fa pioci!” Ma intanto a se contentemo de fare l’afare, anca se savemo che l’afare lo fa coéi che vende, ma bisogna far girare l’economia senpre pi in crisi!
’Na volta sì che se staséa atenti a spèndare, anca parché schèi a no ghin girava mia tanti in te le fameje, e a noantri toseti i ne passava la roba da vestire da on fradelo a l’altro e se i ne conprava calcossa de novo dal marzaro i ne la conprava in cressire in maniera che la ne nesse ben par altri du o tri ani. A me ricordo chela volta che a coatòrdase ani i me ga conprà on soprabito inpermeabile fodrà de stofa scozzese, parché el dovéa servirme anca da paletò, de arcoanti nùmari pi grande de la me misura, come ca ghesse da créssare altri trenta schèi. A non volèa mai métarlo sto soprabito che i me ga conprà co i schèi del late portà in laterìa da Gelain, parché a me vergognavo dato che a faséa on giro e mezzo in cintura e el me rivava coasi a i calcagni, e po’ a me naséa le ale de sto soprabito dentro a i razi de la bicicleta. Có naséa a messa, cossì cunzà, a me scondéa de drio de on pilastro e po’ a scapava a casa subito par paura che i me amizzi i me cojonesse, e apena ca go podesto a me son liberà de sto soprabito-paletò con la fodra scozzese, ma lo go oncora in mente parché forsi adesso el me narìa ben de cintura, ma el me rivarìa oncora piassè a i calcagni!

[torna sopra]