Da Vigodarzere (PD)

El legno xe più pressioso de l’oro

Sculture a Porto Caleri, òpere de artistoidi (nel senso bon), ne i pressi de Rosolina Mare.

Vojo parlare del legno: el legno parla, xe vivo, anca se no el ga più raise, rami, foje, linfa. Sti tronchi parte da ’e nostre montagne e, sbaeotà lungo i fiumi, forse par veciaja, o colpìi da fulmini, i ga perso i brassi, vojo dire i rami grossi e, dopo un lungo gaegiamento, el mare i abandona su ’e spiage de a nostra costa.
Sti tronchi inpregnà de salsedine, rosegà dal sbaeotamento de ’e onde, ’i ga utiizà, creando na architetura strana, sinpatica… primitiva, grassie a eà fantasia de serti artistoidi (nel senso bon), ocupando un trato de spiagia co ste sculture, degne de na bienàe venessiana.
Xe stà par mi na sorpresa, ’e go fotografà ste “abitassion”, unendo qua qualche scato.
Se poe védarle vissin a eà batigia, tra sabia e aqua, a Porto Caleri, ne i pressi de Rosolina Mare.
Ne i sècoi scorsi, ansi quando che l’omo ga inventà el fogo, el legno se ga doparà e el se dòpara anca ’desso. Chi che ga el camineto, na volta el fogoearo, i poe scaldarse o cusinare eà carne, eà poenta e altro, po' eà pizza xe più bona con el forno a legna.
Ne i sècoi scorsi el legname con ’e zàtere percoreva chiòmetri lungo i fiumi veneti, che el serviva par ’e fondamenta de paeassi, cese de Venessia, insoma squasi tuti i monumenti de ’a sità lagunare xe inpiantà sul legno.
L’arsenàe gera senpre provisto par barche, góndoe, navi, na flota famosa in tuta Europa, che pensando se resta sbalordìi anca oncò. E mòbii, careghe, porte, teari de finestre, panchine, zogàtoi e na infinità de ogeti par ristoranti, abitassion, ec.
Raconto un episodio: quando che gero in uficio gavevo na scrivania de legno massicio, co tanti casseti, comoda, bea, “calda”, e quando che el novo diretore voeva sostituirla con quea de metalo, moderna, freda, go lotà co tute ’e me fòrse par difènderla, e go vinto, finché non so’ ’ndà in pension.
Ani fà gera de moda eà fòrmica, po' el pressato fato de trùcioi, l’aluminio, eà plastica, ec. se ghe penso robe orìbii.
Go ancora ’e sènplici moete da biancheria de me mama, no ’e se ronpe mai; se salta eà moea se fa presto métarla al so posto, ma quée de plastica co ’l soe ’e se ronpe presto, no ’e dura gnente.
’Desso che ghe xe sto problema de eà plastica, bisogna scumissiare da i pìcoi ogeti, cioè goti, piati, borsetine, sachetine, ec.: semo ancora in tenpo.
Parlo ’desso de legni de un serto pregio: ebano, tek, mogano, palissandro e altri, duri, pesanti, dal coeore rossastro, nero, che provien da ’e foreste tropicài de l’America, Africa, Oriente.
I xe costosi e i se dòpara par mòbii de lusso. Non i vien mai intacà da i caroi (tarli) e i ga na durata…
Mi go i copritermo e na panchina che vien da l’Africa Centrae parecio costosi: non i se inbarca mai, né co ’l caeore, né con eà piova.
Anca el legno de seresaro, nogara, betula, piopo, salgaro, pin, larice, lecio e altri i xe senpre rissercà par na infinità de robe, come strumenti musicài, carta, mobilia, cornise, ec.
Par sarare sta careada de àlbari da i legni più svariài, me ricordo de un conossente, quando che so’ ’ndà a farghe visita nel Meridione, el gera orgolioso de farme védare el tavoin da zogo con ’e quatro sedie. El me dise:
“Varda, te poi soevar ’e sedie co ’l déo mìgnoeo da quanto che ’e xe lesiere; ’e xe de seresaro.”
Quanto xei bei i ponti de Bassan e de l’Academia de Venessia e tanti altri manco grandi: i xe na meraveja.
Par sostegnere ’e vigne i ga cavà via i paeti de legno e sostituìi con quei de cemento o plastica.
Anca i mastèi, bote, contenitori par l’ojo e altro, ancora plastica, plastica…
Ne ’e fàvoe el buratin-toseto più famoso del mondo, Pinochio, el xe de legno, e de legno xe, o gera, i cavaini a dóndoeo par i putèi, el caregon, i scagneti, ’e ciotoete.
Nessun ga mai pensà de fare un monumento al Legno? Intanto, mi digo: viva sto vegetàe che el xe più pressioso de l’oro!

[torna sopra]