Da Verona

On nono speciale

El 7 volte dotor Gilberto Antonioli.

El poeta Gilberto Antonioli con l’editore Mauro Bonato.

El mese passà, par la “Festa de i Noni”, ò incontrà on nono particolare, on personagio tuto speciale che ’l ga propio del straordenario, come sentarì pi ’vanti. Ve anticipo solo che ne la so vita el s’à ciapà ben sete lauree in: Giurisprudenza, a l’Università de Bologna; in Filologia, dó olte, a Verona; Létere a Bologna; Teologia a Milan; Storia e Geografia de l’Europa e Filosofia a Verona.
L’à fato tanti laori diversi e, dopo na cariera in banca, el s’à guadagnà on fraco de diplomi al punto che l’è sete olte dotor.
Sto nono grando el se ciama Gilberto Antonioli, de ben 82 ani, pluridotor par passion e anca poeta. Curioso da mati come che l’è, el resta comunque on sognador incalìo.
Pensè che in te la so casa a Verona, i muri iè tapezè par ogni centimetro de tuti i diplomi de laurea che l’à ciapà a partire dal 1992, dopo che l’è nà in pension.
L’è senpre stà on gran studioso fin da studente; l’à frequentà el liceo classico pi alto de Verona, el “Scipione Maffei”.
Tra le dissipline inparà, el so primo amor, l’è stà Giurisprudenza.
“De savere – el dise lu – go senpre se’; no me straco mai de studiare.”
Ve zonto anca che lu l’è nato a Verona; l’è stà de casa tra San Stefano e Veroneta, po’ l’è nà a Sanguineto, el paese de i sui.
Dopo l’è vegnù de olta ancora in cità par sposarse con Maria Teresa Cazzadori, so mojere; anca ela l’è n’artista: pitrice, scultrice, ceramista de valor.
I so fiói iè Chiara e Francesco, ma la pi gran sodisfazion ghe la dà so neodin Lorenzo: “Tuto so nono” el ne dise co tanto calor.
Insoma, ’verghe da fare co Antonioli l’è come voler fermare on torente in piena; lu l’è anca giornalista-publicista; el scrive su riviste e vari giornài, parlando de arte, sport, leteratura, costume, ma soratuto ghe piase scrìvare poesie che iè stè tradote anca in varie lingue.
L’à scrito finora na quarantina de libri in dialeto veronese e in lingua italiana, guadagnàndose in te i vari concorsi, anca internazionali, pi de vinti primi premi. La so prima poesia el l’à scrita a zincoe ani e el so poeta preferìo, tra tanti, l’è Clemente Rebora.
Parlando de la so poesia – no femo l’elenco de i so libri par mancanza de righe - el dise:
“Mi piace pensare come a una composizione ricca e complessa, ma anche semplice e diretta, che non è possibile inquadrare in rigidi schemi…”
Insoma Gilberto Antonioli l’è on entusiasta de la vita, anca se l’è on poco deluso parché el dise:
“La società di oggi guarda solo al profitto e si interessa sempre meno alla cultura.”
Lu el se augura de dare a la gente spunti e ocasion de riflession, parché la possa fermarse on poco a meditare, a riflètare e magari ralentare sta corsa senza lìmiti verso on futuro senpre pi incerto.
Par questo “nono Gilberto” l’è tanto tacà a Lorenzo, el so neodin.

[torna sopra]