|
Da Ponzano Veneto (TV)
El me parlar
un zergo quasi muldaro
 | | El zergo de i giostrai xe quasi muldaro. Mi lo parlo co Mohito, el papagà de me nevoda che lo sborbota e co qualche parente. |
Jera legra: bacajar, bonador de franfagnìcola, gionda de onbrie e slusariole. Sinte e stròleghe lumava i sogni, snasava ’e voje, leseva ’e man e inboniva i pivèi. I tichani sul scoter o su la simì se strucava e se basava. I mucini sbignava ’vanti e ’ndrìo sminciando sigurissie, tiramòa e momoni da catahar.
Jera legra: piassa morta o legra de Santi. El pisto sonava ’a canpana a ciamar a l'orassion, ma solo ’e puri fruava i denoci a paternostrar... Drento a la me tini carovana, mi mucin de ’e giostre jero holi de i mucini de i fermi che stava ne ’e case de piera; ma i tichani de i racli se rosegava parché mi, mucin de i driti, come barorai podevo ogni dì badalucar sora el neslo bianco de la giostra che pirolava ne la so narvola corsa...1
Cussì, mi, fiol de giostrai, recordo la sagra, co el parlar che go sentìo e inparà da picenin.
I driti o giostrari o giostrai, che ’desso vien ciamài esercenti dello spettacolo viaggiante, parlava tra de lori usando parole che se podarìa ciamar neologismi, inventài par caso o robài da i vari dialeti de le nostre province e po’ canbiài o conbinài a piaser o a seconda del gusto e de l'insegno.
Sicuro xe, che no se trata de ’na lingua vera e propria, come invense xe considerada quela de i sigagni o sìngani che ’riva da i vari Paesi de l'Europa, ma de un zergo, ciamà de i giostrari che vien tramandà par boca o mèjo oralmente da pare a fiolo.
I giostrai de ’na volta e queli che in qualche caso ancora porta ’vanti el mestier, fa parte de fameje co ’na origine serta, che solo par cavarse da la miseria se ga inventà ’sto lavoro, ma prima i faseva i contadini, i mecànici, i pestafero e, canbiando lavoro, i ga dovesto far ’na vita ramenga, i ga portà senpre co lori le so usanse, tradission e anca el so parlar.
Le raise de i nostri primi giostrai xe italiane, solo in un secondo momento se ga zontà i Sinti o sìngani, anca lori co el so modo de esprìmarse; natural dapò che, movéndose insieme, le costumanse e anca el parlar se sia insenbrài. I veci veri giostrai, però, ghe tien a no èssar scanbiài par Sinti.
Xe da dir anca che i mucini o mèjo i cèi che ’ndava a scola ne i vari paesi a seconda de dove che i se catava par le fiere o sagre, ga sentìo oltre che l'italian parlà dal maestro o maestra, anca i dialeti de i conpagni de classe, ben se sa difarenti da logo a logo, inparando cussì altri modi de dir e fasendo un missioto de tuto.
Co la me fameja se usava ’ndar co el scòter –autoscontro– in giro par sagre, secondo el ragionar che ne portava ne i loghi dove se podeva ciapar più love –soldi–, cussì sul fenir de l'inverno se scumissiava a postarse nel Trevisan, po’, soratuto in primavera e de istà, ne i paesi del Venessian e del Belunese, par fenir danovo nel Trevisan, dove se fermàvimo có scumissiava el fredo, ne la nostra vera casa de piera a Vilorba. Qualche pontatina la se faseva anca nel Padovan e nel Friuli, infati mi so’ nato a Pordenon. El fato che la me residensa, da tanti e tanti ani stabile, sia stada prima a Treviso, ’desso a Ponsan, xe casual. Tuti ’sti loghi ne ga regalà qualche parola o espression particolari…
Mi considero el me parlar, ’na lengua del tuto special, piena de modi de dir estrosi, stranbi, balenghi, che solo chi gera o xe de l'anbiente pol capir, un zergo insoma che ga ’vuo l'intento de poder discórar cusistà tra de noaltri, o mèjo sensa farse capir da i racli –gente con fissa dimora–.
So’ convinto però, che ’sto zergo oramai el sia quasi muldaro –morto– e me despiase.
1 Era sagra: suoni alti di risa e di musica, profumo di zucchero filato, caloeidoscopio di luci e colori, Zingare e chiromanti scrutavano sogni, costruivano desideri, leggevano la mano ammaliavano i creduloni.
I ragazzi si baciavano sugli autoscontri, si abbracciavano stretti sulle montagne russe. I bambini correvano di qua e di là guardando i banchetti di liquirizie, tiramolla e dolciumi da mangiare. Era sagra, festa pagana o festa di Santi. Il prete suonava la campana per chiamare alla preghiera, ma solo le vecchie consumavano le ginocchia pregando. Dentro la mia piccola carovana, io bimbo delle giostre ero invidioso dei bambini che abitavano nelle case di pietra, ma i bambini degli abitanti del paese si rodevano perché io, bimbo di giostrai, come un ricco, potevo ogni giorno sognare sopra il cavallo bianco della giostra che girava nella sua corsa pazzerella, senza meta.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
El ricordo ’juta a vìvare
Guài desmentegare el passato, spece quelo propio, fato de tenpi, de date,
de fati, de traguardi co’ vitorie e sconfite, intarsià de incontri, de afeti e sentimenti,
de persone care, de fameja... Senza de tuto questo vol dire fare la fine del figaro
ch’i ghe ga tajà le raise parché no ’l dava pi fruti. Davero na bruta fine!
de Mario Sileno Klein
Da la Bassa Padovana
Spèndare par sparagnare!
Sconti e Saldi, Black Friday, Oferte Speciali, Svuoto Tutto!, Mercatini senpre e so tute
le piazze: tuto ne invita a spèndare le coatro palanche de la paga o de la pension!
de Roberto Soliman
Ricorense
La tenpesta Vaia
Xe passà romai un ano dal disastro de vento e de aqua che ga butà par tera
mejari de àlbari e provocà dani par quasi tre miliardi de euro.
de Giordano Dellai
Da Verona
On nono speciale
de Lucia Beltrame Menini
|
