|
Ricorense
La tenpesta Vaia
Xe passà romai un ano dal disastro de vento e de aqua che ga butà par tera
mejari de àlbari e provocà dani par quasi tre miliardi de euro.
 | | Le conseguense del passajo de la tenpesta Vaia ’nte la piana de Marcèsina, ’nte l’Altopian de Asiago. |
St’istà ’ndar in montagna no xe stà cofà i altri ani, e no credo solo par mi. Dopo che poco pi de un ano fà, dal 26 al 30 de otobre, la tenpesta Vaia se xe scaraventà co piova e vento su le montagne del Triveneto, butando par tera mejari e mejari de àlbari spece in serte parte, no xe stà pi istesso ciapare un stroso e caminare ’ntel bosco.
Un disastro che, ironia de la sorte, ga ciapà el nome de na gentile signora todesca, la dotoressa Vaia Jacobs da Düsseldorf, che par conpleano ga ’vùo el nome de l’uragan come regalo da so fradèo che ga pagà dosento euro a l’istituto de meteorologia de l’Università de Berlin, che da sessant’ani mete a l’asta i nomi de sti eventi.
Serto el nome de na dona, che noaltri se imaginemo de sèsto, no ga gnente da spartire co serti panorami de montagna cavài fora da la nostra mente in poche ore. Questo par far vèdare come la tenpesta che de feminile gaveva solo el nome ga interessà, sì xe vero, soratuto el Veneto, ma no ga risparmià gnanca altre regioni come el Trentin, l’Alto Adige, el Friuli e la Lonbardia.
Le zone pi colpìe da oltra setesento mm de piova e de venti che ’ndava a dosento km a l’ora xe stà l’Agordin, el Cadore, el Feltrin, el Comèlico, la Carnia, la Val de Fassa, la Val de Fiemme e l’Altopian de Asiago. Le piove, forti e bele sostegnùe, ga fato straripare i fiumi Piave e Brenta; tanti i torenti che xe ’ndà par sora, come anca el lago de Alleghe.
In totale el disastro ga provocà oto persone morte e raquanti dani par i oto e passa milioni de metri cubi de legno schiantà par tera, che xe stà calcolà in poco manco de tre miliardi de euro. In particolare me ga fato vegner da piànzere st’istà passar par serte zone de l’Altopian de Asiago, l’Agordin e ’l Primiero, giusto par ciapar rento tre posti diversi a cui so’ profondamente ligà, ’nte le province de, rispetivamente, Vicensa, Belun e Trento. Tanto par fare un esenpio de una de le conseguense de la tenpesta Vaia, par mi e par tanti altri no xe stà pi possìbile ’ndar a funghi in Marcèsina, la piana pi colpìa dal vento con i so otosentomila metri cubi de legname cascà in tera par l’assion distrutiva del vento.
Dopo el disastro i montanari no se xe messi a criare, ma se xe tirà sù le màneghe e ga scomissià l’òpara de ricostrussion e de racolta de i àlbari roti. Anca altri Paesi europei e fora Europa, in particolare la Cina, sta cronpando el legname che na fila longa de camion sta portando via da le montagne. Naturalmente el laoro no xe gnancora finìo, ansi, se pensa che ghe vorà ’ncora diversi ani par portare via tuto el legno butà zo. Po’ sarà el momento de piantumare le piante nove, e ’lora, come che dise i bravi forestali, bisognerà pensare de non inpiantare àlbari magari beli ma che casca zo cussì fassilmente.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
El ricordo ’juta a vìvare
Guài desmentegare el passato, spece quelo propio, fato de tenpi, de date,
de fati, de traguardi co’ vitorie e sconfite, intarsià de incontri, de afeti e sentimenti,
de persone care, de fameja... Senza de tuto questo vol dire fare la fine del figaro
ch’i ghe ga tajà le raise parché no ’l dava pi fruti. Davero na bruta fine!
de Mario Sileno Klein
Da la Bassa Padovana
Spèndare par sparagnare!
Sconti e Saldi, Black Friday, Oferte Speciali, Svuoto Tutto!, Mercatini senpre e so tute
le piazze: tuto ne invita a spèndare le coatro palanche de la paga o de la pension!
de Roberto Soliman
Ricorense
La tenpesta Vaia
Xe passà romai un ano dal disastro de vento e de aqua che ga butà par tera
mejari de àlbari e provocà dani par quasi tre miliardi de euro.
de Giordano Dellai
Da Verona
On nono speciale
de Lucia Beltrame Menini
|
