|
Editoriale
Basta morti sul lavoro!
Tute ste tragedie e ste disgrazie nel mondo del lavoro le xe contro la vita. Le vien ciamà MORTI BIANCHE, come se no ghe fusse de mezo el sangue, parché l‘agetivo “bianco” vorìa dire che no ghe xe on responsàbile ma, in realtà, on responsàbile el ghe xe senpre. Dover morire… par vivare, la xe na gran vergogna.
Credemo anca noantri che el sia on problema da dover parlàrghene, parché chi va fora de casa a la matina par nare al laoro el ga da ’vere la sicuressa de poder tornare a la sera sano e salvo. Se trata de na question che ne riguarda tuti, quindi la socetà. Davanti a tuti sti morti, massa, ne i vari canpi de l’atività umana, tuti invoca regole piasse severe e pi inpegnative dal Governo, par fermare o almanco far calare sto fiume de sangue. Norme sora la sicuressa sul lavoro ghe ne sarìa anca massa. El disastro ghe xe parché no le vien osservà.
Dó xe le cause de tanti morti: la mancanza de prudenza e la disgrazia. Se laora massa – quando che ’l laoro ghe xe – anca fora orario, par necessità o parché se xe ingordi, profitando de la presenza de i imigrati, el pi de le volte con laoro nero, co orari inpossìbili e con gente poco preparà e poco proteta. Maledeto anca el laoro de le doméneghe e de i giorni festivi: dove manca la benedizion de Dio, manca anca la sicuressa.
E dopo ghe xe le disgrazie, i casi dove no se pensava che dovesse capitare l’inprevisto: se parla de casualità e fatalità. Ma no basta.
Nonostante sia stà fati de i passi in avanti anca in Italia, se ga l’inpression che semo oncora indrìo. No xe che i politici se daga tanto da fare, salvo ricordàrsene quando salta fora le tragedie che inpina le pagine de i giornài e de le TV. Anca el 28 aprile de l’ano passà xe stà celebrà la Giornata Mondiale de la salute e de la sicuressa sul lavoro. Na setimana dopo on’operaia de 22 ani de na pìcola azienda tessile de la provincia de Prato, la xe morta tra i ingranagi de na màchina, indo’ la jera drio lavorare, che no gavéa i sistemi de sicuressa parché cussì aumentava i risultati de produzion.
El bilancio de le vìtime sul lavoro del 2021 nel Veneto el xe de 105 morti, el 22% in più rispeto al 2020.
E dire che la nostra region la xe tra quele con manco ris-cio de morte sul lavoro: la xe al 6° posto ne la graduatoria nazionale.
In testa ghe xe Rovigo con na percentuale pari a 64,2 contro na media regionale de 36,9; segue Venezia (41,2), Verona (40,6), Treviso (35,9), Padova (35,4), Vicenza (27,4) e Belun (23).
Insoma oncò se more come quarant’ani fà: par la pi parte manca sènplici misure de sicuressa, manca ne le aziende la formazion de i lavoratori e i controli i xe scarsi assè.
Se interessemo tanto de la salute pa ’l Covid, ma tanto poco par la salute nel lavoro, dove la morte no la ga da èssare considerà “destin”, ma mancanza de sicuressa e anca de tanta fadiga fisica.
Un Paese come el nostro che vèrze la porta de casa, la so “Costituzione”, e se leze che: “L’Italia è una Repubblica democratica, fondata sul lavoro”, no ’l pole permétarse de avere 1.404 “caduti” a l’ano sul lavoro; no ’l pole acetare che ne le canpagne ghe sia oncora el “caporalato” che condana persone a lavorare da schiavi; no ’l pole avere oncora difarenze cussì alte de paghe tra òmani e done.
Par afrontare sto problema, no stemo spetare de dover fare comemorazion come quela de l’ano passà par i 65 ani da la tragedia de la miniera de carbon de Marcinelle, in Belgio, dove ga perso la vita 262 lavoratori, e de questi 136 imigrati italiani.
Pitosto de dover comemorare dopo, xe mèjo inpegnarse seriamente prima!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Basta morti sul lavoro!
Tute ste tragedie e ste disgrazie nel mondo del lavoro le xe contro la vita. Le vien ciamà MORTI BIANCHE, come se no ghe fusse de mezo el sangue, parché l‘agetivo “bianco” vorìa dire che no ghe xe on responsàbile ma, in realtà, on responsàbile el ghe xe senpre. Dover morire… par vivare, la xe na gran vergogna.
de Mario Sileno Klein
Da la Bassa Padovana
La cusina economica
La jera presente, fin dal dopoguera, in tute le case contadine e non. On bel progresso par scaldarse e far da magnare, però par la polenta a ghe voléa el fogo del fogolaro. E che spuza el late nà par sora!
de Roberto Soliman
Robe de Ciósa
A Ciósa l’orologio da tóre più antico del mondo
de de Angelo Padoan
|
