Da la Bassa Padovana

La cusina economica
La jera presente, fin dal dopoguera, in tute le case contadine e non. On bel progresso par scaldarse e far da magnare, però par la polenta a ghe voléa el fogo del fogolaro. E che spuza el late nà par sora!

A se brustolava anca la polenta, ma me paréa che la spuzesse senpre da late brusà!

Par la polenta a ghe voléa el fogo del fogolaro.

Coando, a la matina, a vegnéa zo da le scale par pareciarme par nare a l’asilo o a scola elementare, e rivava in cusina, a sentìa ’na spuza che la me faséa rabaltare el stómego. El jera el late nà par sora dal pegnato e che ’l saltava e el balava so la piastra calda de la cusina economica, fin che el evaporava tuto, inpinando la cusina de spuza.
A me nona, che la pareciava la marenda par tuti, a ghe sucedéa ogni giorno e ogni giorno a me se rabaltava el stómego, cossì a non faséa marenda co ’l late, ma co on poco de cafè de orzo e pan vecio. Par coesto a non go mai tastà el late e oncora ’desso a non sò che gusto che ’l gabia!
E con la cusina economica a non semo mai nà d’acordo par sta roba e anca parché el fogo a me piaséa védarlo in te ’l fogolaro par zercare de capire come che le faséa ste lengoe de fogo a canbiare forma de continuo. A non ghe jera mia la television, cossì le lengoe de fogo le ne imagava, come i cartoni animati par i toseti de ’desso.
E me mama la continuava a fare la polenta so ’l fogolaro, parché cossì la cotrolava el fogo a ocio e anca parché el parolo el jera massa grande par la cucina economica.
Però la xe stà ’na invenzion inportante par le fameje, dato che dal secondo dopoguera la xe entrà in tute le case e oncora a ghe xe dite che le costruisse, anca de coele costose. La consumava manco legna del fogolaro, la scaldava pegnati, tece e bronzini a ’na alteza che non se se cuciava par smissiare e tastare la roba dentro par capire se la jera cota o indrìo de sale; a destra a ghe jera la vascheta con l’acoa senpre calda ca se tirava sù con la cazza par inpinare la borsa de l’acoa par scaldarse in leto, e dopo se ghe zontava de coela freda; so ’l maon tuto ’torno a se ghe tacava le sugaman moje; so ’l canon, a on metro de sora la stua, a ghe jera arcoanti feri a ragera par métarghe a sugare toajòi, calze, fazoleti, ma no mudande parché le paréa stranie e se jera in cusina, semai podéa èssarghe solo coele de i toseti.
’Na storia a parte el merita el forno de la stua: so ’l fogolaro le torte bisognava cusinarle soto el testo, ’na spece de tecia roersà e coerta con bronze smissià con la zenare calda, e no la se vedéa créssare, inveze so ’l forno de la stua la se podéa controlare e védare se la jera cota, inpiràndoghe ’na paja del scoato, in pi a se cusinava rosti par la doménega e anca i biscoti fati in casa inpastà con l’amoniaca parché i se ingrossesse tanto e dopo i vegnéa missi a strati co ’l budin fato rafredare so la pegnata fora de la porta de casa de inverno e in te ’l pozzo, tacà a la cadena, de istà.
De belo la gavéa anca la possibilità de regolarghe l’aria, co on manegheto soto la portèla del fogo, e on casseto, soto el forno, par tegnere in calda patate americane e altra roba ca se magnava tièpida, e in pi la faséa on bel caldo e on poche de bronze par scaldarse in leto. La gavéa tuto, anca el cafè senpre pronto so on pegnato messo in parte e indove ca se ghe zontava senpre orzo brustolà, missela Leone e Olandese. A se brustolava anca la polenta e anca i retaji de tajadele a la doménega matina, ma non se vedéa el fogo e me paréa che la spuzesse senpre da late brusà!

[torna sopra]