Da Lendinara (RO)

Rik Battaglia

Sophia Loren con Rik Battaglia nel film "La donna del fiume" (1954).

Joan Collins e Rik Battaglia nel film "Ester e il re" (1960).

Pochi sa che el grande Rik Battaglia gera nato a Corbola de Rovigo. Atore cinematografico a tuto tondo, Rik ga godù inte la so vita grande sodisfazion, partecipando a 110 film come protagonista, vizzin a atori internazionài de grande considerazion.
Nasseva inte un pìcolo paese poesan el 18 febraro del 1927. So mama, Albana Bertaglia, al batezo del fiolo, la ghe meteva el nome de Caterino.
Dovì savere che so opà, un sioroto de canpagna, che gaveva la Albana al so servizio, el la meteva inzinta, senza dopo riconóssare el fiolo. Cussì Caterino cresseva in te un modesto anbiente e, par mantegnerse, el ga dovesto métarse al laoro in prestezza.
Da prinzipio se dava da fare, fasendo el barcarolo, trasportando formento e altri racolti dal Delta a Venezia, ma co ’l tenpo gaveva inparà anca a fare el scarparo, el marangon e el fatorin, inte na fàbrica de arzenterìa.
Capitava che el 14 novenbre del 1951, el Poésine l’andava soto aqua, cussì che tanti poesani restava senza casa e senza laoro, dovendo par forza emigrare e, in gran parte, qualcun xe andà in Piemonte qualche altro in Lonbardia. Stessa roba capitava anca a Caterino, che par vìvare, zerniva de andare in Lonbardia e, a Milan, se meteva a fare el barista inte un zìrcolo de l’Agip. Gera el 1954 quando Caterino ga avù la fortuna de incontrare un altro veneto che come lu gera un NN, deventàndoghe da subito el so grande amigo. Se tratava del famoso, sepur zóvane scritore, Goffredo Parise, el quale saveva che Mario Soldati el gera in zerca de un atore par el so novo film e, convinto che el so amigo Caterino el sarìa stà giusto par la parte principale del film, invitava el regista a cognóssarlo. Mario Soldati acetava e a la mensa SNAM, dove laorava el nostro poesan, trovàndoselo davanti, ga avù na folgorazion. No podeva che èssare lu el novo protagonista de La donna del fiume.
Pur savendo che el putelo no gaveva scola de recitazion, el so ocio de regista, capiva che ’l toso gera svejo e in ganba e decideva de darghe la parte più inportante. Cussì dopo dó dì, al Bertaglia ghe rivava na racomandata da la Ponti-De Laurentiis par un provin co la Sophia Loren. Lu, superava la prova e come inte na fòla o insogno, el deventava atore. El grande sucesso del film, faseva si che Mario Soldati, canbiasse a Caterino el nome, faséndolo deventare Rik Battaglia. Ma el belo vegneva dopo, parché tuti i produtori de film i lo voleva e Rik, su pression del Soldati, l’andava a Roma a fare un corso al Centro de Sperimentazione de Cinematografia, otegnendo el “Ciak d’oro” de chel’ano. Ormai la gera fata.
Par tuto el 1960 e 1970, Rik laorava a cinque film a l’ano, co grandi registi e protagonisti inportanti internazionài. Intel 1956 laorava a fianco de Elsa Martinelli, inte La risaia, film direto da Raffaelo Matarasso, girà in Cinemascope, dove Rik interpretava Gino, otegnendo un grande sucesso de spetatori. Nel 1959 rezitava intel film Caterina Sforza, la leonessa di Romagna, de Giorgio Walter Chili. Ormai la so facia e la so braura gera su le boche de tanta zente, parchè i film indove partezipava i inpiniva le sale del cinema. Film in costume, come protagonista o parti inportanti, “colossal”, film western, de spionajo e de aventura e, qua ricordemo tra i altri: Giù la testa, de Sergio Leone, fato intel 1971 o Un genio, due compari, un pollo, co Terence Hill fato nel 1975.
Nel 1982 gaveva girà Bomber de Michele Lupo a fianco de Bud Spencer. Altri grandi atori ga laorà con Rik, tra i quai Esther Williams, Liza Minnelli. Co Liza el girava intel 1976 el film Nina, ultimo film del grande Vincente Minnelli. Par el momento me fermo a scrivar su Rik e lasso a la prossima volta la fine de la storia de un grande atore del cinema, poesan anca lu come mi.

[torna sopra]