El filò de i Wigwam

Gianni Sandon
El salvatore de i Coli Euganei

Gianni Sandon in te na presentassion de Wigwam.

Cava principale sul Monte Ricco, ne i ani ’70.

Come pomi rosegà i jera ridoti i Coli Euganei da ’e tante cave che i se i magnava un fià dapartuto. E alora i cavadori, bontà sua, par limitare sta distrussion, i gaveva proposto de concentrarse solo su el Monte Ricco tacà a Monselice che tanto, el jera za in parte conpromesso. Da la cava de le More a Ovest co vista su Arquà, a quée a Sud de Zancanella e Mardegan, e par conclùdare a Est co quée de ’a Cementeria e de Fiocco, i gaveva ridoto i frati in sima al monte come quei de i monasteri ortodossi che se vede in Grecia, picà par aria de sora a le Meteore. Se fusse ’ndà ’vanti sto proposito, inquò al posto del monte, ghe sarìa na gran spianada, de sicuro “valorizzà” co na zona industriale o un s’ciapo de centri comerciài.
Sinquant’ani fà, el 24 novenbre 1971 vegneva aprovà la lege 1097, anca ciamà “Romanato-Fracanzani”, che fazeva sarare le 70 cave più distrutive.
Quée de “trachite vile” pa intèdarse, sasso che xe stà doparà come sotofondo de strade, tanto che quando che se viaja su l’autostrada A 13 Padova-Bologna, par un bel trato xe come córare su un tòco de Monte Ricco.
Se concludeva na batalia, aspra, dura, che gaveva diviso el mondo politico e del lavoro in maniera trasversàe che, in Gianni Sandon de Battaglia Terme, ga avùo el so capo. Che me ricordo caparbio ne l’organizare, meticoloso nel documentare e argomentare, saldo de testa e de polso, bon de tegnere insieme la banda de tosi, variamente assortìa e anca un fià criticona, che costituiva la trupa de i Comitati par la Difesa dei Colli Euganei, de cui me onoro de aver fato parte come vicepresidente de queo de Padova che fazeva capo a Italia Nostra, co la conpianta so segretaria Lieta Papafava de i Carraresi.
Gavevo tocà co man sto disastro in su i Coli, ne l’istà del 1969, quando da capocantiere de la Forestale co i òmani, fazévimo òpare in calcestrusso in te i calti del Monte Ricco. Gavevo ciapà un tòco de casa de i fradèi Giora, in via Solana, gran brava zente, tuti dó operai de cava, e in cava ’ndavo a ordinare el sasso che vien dito “de anegamento”.
E me domandavo che logica la fusse quea che da na parte destruzeva el monte e da chel’altra se ghe tacava na peza parché non vegnesse zo tuto.
E po’ anca, dare laoro, ma conprométare par senpre l’anbiente e el paesagio dove che viveva i operai stessi, oltre che la salute sua de lori e de tuti i altri citadini. Par cossa?
E come fare par fermare sto disastro? Me domandavo.
La risposta la go trovà in Gianni Sandon, e Franco, e Alessandra, e Laura, e “Saresa” e tanti altri che no me ricordo più el nome. Na conpagnìa che me ga subito ciapà, ricordando insieme a na batalia vinta, anche un tòco de vita in grande amicissia. Grassie, Gianni!
Info: gianni.sandon@gmail.com

[torna sopra]