Robe de Ciósa

A Ciósa l’orologio da tóre più antico del mondo

La tóre-campanile de S. Andrea co ’l so orologio.

El mecanismo de l’antico orologio, che adesso a se pole amirare a l’interno del campanile, dove ze stà alestìo el “Museo de l’Orologio”.

Statua de Giovanni Dondi dall'Orologio (1330-1388), in Pra’ de la Vale, a Padova.

La Tóre de l’Orologio in Piazza dei Signori a Padova.

Se trova a Ciósa l’orologio da tóre più antico del mondo! No la ze ’na “boutade”, ma la pura verità. Sentensa confermà da esperti in materia a livelo mondiale, co tanto de ispession e de certificassion.
L’ano de nàssita de sto orologio risale al 1386 e pare che in ’sto stesso ano ghe ne sia stà costruìo solo uno anche a Salisbury (Gran Bretagna). Perciò i dó orologi ze “coetanei”. Tuti i altri ze vegnùi dopo. No risulta al mondo che ghe ne sia altri de più veci.
Un primato che pochi conosse perché la “scoverta” ciosota risale a ’na venténa d’ani fà, quando un maestro de scuola, apassionà de orologeria, à visto un mecanismo de orologio abandonà, andando sù verso la cela campanaria del campanile de Sant’Andrea in Corso a Ciósa.
’Sto campanile gera nato per verità come tóre militare de difesa de la sità nel sec. XII (come se leze in te ’na lapide infissa sul lato sud) e in seguito trasformà in tóre campanaria. E ze proprio in ’sto campanile che se trova l’orologio più antico del mondo. Oviamente adesso se vede solo i “resti” de i mecanismi de ’sto orologio, in quanto l’atuale, situà su la faciata, a funsiona co mecanismi moderni. Pare che la paternità de ’sto storico orologio sia da atribuire adiritura a la famosa famegia de i Dondi, deta apunto de l’Orologio, mondo conossùa a Padova, perché i Dondi gera ciosoti (pare e fio) e i se ga trasferìo dopo ne la sità del Santo (un lontanissimo dissendente de i Dondi dell’Orologio ze mancà qualche tempo fà proprio a Padova). Da notare che l’atuale orologio, incastonà, come za dito, ne la parete ovest de la tóre-campanile, a se trovava ’na volta ne l’antico palasso pretorio (= munissipio) demolìo e rifato ne l’800 come che a se vede adesso.
Fin tanto che ze andà avanti la ricostrussion del palazzo, la comunità ciosota aveva “afidà in custodia” l’orologio… al campanile de la cesa de Sant’Andrea, a pato, però, che quando i lavori sarìa stà finìi, el Comune avarìa preteso a la cesa de Sant’Andrea la restitussion. Senonché questa s’à rifiutà e cossì l’orologio a ze restà indove che ancora a ze…
L’antichità de l’orologio de Sant’Andrea ze comprovà da ricerche fate in Italia e a l’estero da i prinsipali esperti in materia, i quali ze arivà a la conclusion che ’sto orologio sarìa adiritura ancora più antico de quelo de Salisbury, perché esiste varie documentassion storiche in merito, che fa pensare che quelo de Ciósa sia el pi antico orologio da tóre costruìo al mondo.
Tuta ’sta storia ze nata in tempi abastansa recenti. Infati, nel 2001 el citato maestro, apassionato de mecànica de i orologi, durante i lavori per la ristruturassion de le scale in legno del campanile, l’à podesto esaminare co calma la mecànica de l’antico orologio deposità ne l’ultimo piano del campanile. Tanto che l’à deciso de contatare ilustri esperti in materia, i quali, come za dito, i à constatà la storicità del manufato.
El maestro alora à pensà de ricostruire el mecanismo de l’orologio, cossì che adesso a se pole amirare a l’interno del campanile, dove ze stà alestìo el “Museo de l’Orologio”, visitàbile secondo orari reperibili sul sito apòsito.
Se dizeva de la famegia Dondi, famegia de grandi costrutori de orologi de l’epoca e de sofisticati mecanismi, come l’Astrario, opera de Giovanni (fio de Jacopo). capostipite de la famegia, inventore e costrutore de l’orologio astronomico mecànico che se trova ne la splendida Piassa dei Signori, a Padova.
A proposito, ’na tradission popolare vòle che Giovanni èbia introdoto a Padova da la Polonia la “gallina col ciuffo”, nota ancùo come “galina padovana”, ’na tradission recentemente smentìa in quanto no ghe ze nessuna documentassion che atesta che Giovanni èbia mai avudo contati co la Polonia e gnanca che a ghe sia stà… Vero invesse che una de le statue che adorna el Pra’ de la Vale a Padova ze dedicà a lu…
Dó parole infine sul Museo “Torre dell’Orologio” de Ciósa. Inaugurà nel 2006, a se articola ne i 7 piani del campanile.
Al pianotera ze visionabili documenti che ilustra le caraterìstiche tecniche e artistiche de la Tóre.
Al primo e al secondo pian ze esposte diverse mape originali de la sità, de l’antico palasso pretorio, de la tóre e de la cesa.
Al terso pian se pole amirare molti ex voto (le famose “tolèle”) dedicà a la Madona Adolorata.
Al quarto pian ze presenti i quadri de la “Via Matris”, ’na sorta de “Via crucis” dove se rafigura i sete dolori de la Madona.
Al quinto pian tien campo la ricostrussion, come za dito, de l’orologio più antico del mondo, fata dal maestro-mecànico. Al sesto pian ghe ze un astrolabio e infine dal sètimo, che dà acesso, tramite ’na bòtola, a la cela campanaria, se pole amirare un panorama stupendo de la sita de Ciósa, de la laguna veneta e del mare Adriatico.
Per no farla massa longa, rinviemo a un prossimo articolo la ilustrassion de l’Astrario de Giovanni Dondi dall’Orologio.

[torna sopra]