I mesi de l’ano

Majo, el mese de le rose e de la Madona

La rosa el xe un fiore che tuti conossemo: el nasse spontaneo in Asia e in Europa, se trata de un albarèo da i fiori profumati assè, ’l riva alto anca pi de tri metri e, co ’l diametro de on paro de sentimetri la rosa ranpicante, ma che ’l pol rivare, a seconda de la rassa, anca su i 20 sentimetri de diametro: on vero albarèo. Davero, de rose ghi ne esiste na straje de varietà, le vien classificà a seconda de la forma del fiore sbocià, da la forma de le foje, da i tanti colori e dal profumo pi o manco forte. In verità, xe da dire che le rose ga ’vudo el so splendore ne i inesti fati da i botanici europei, in particolare italiani, dando la nàssita de le tante varietà de sto fiore da quando la rosa la xe rivà da la Cina.
La rosa la xe stà nominà la regina de tuti i fiori; da senpre el so profumo e la so beleza incanta e la fa èssare tra i fiori pi amài de tuti i tenpi, nonostante i spini che che la difende: “… non c’è rosa senza spine…” se dise. Alora, xe da ricordare anca che le rose, có le se tira sù, no le va scaessà, le va tajà co la forfe par via proprio de le spine che le ga drìo el ganbo e che senpre lassa el segno.
El fiore de la rosa resta senpre el fiore piassè amà de tuti i tenpi: la rosa xe senpre stà usà come dono pa’ i inamorài, ma anca come fiore ornamentale par i posti de acolienza, sora a la tola in tinelo e in ogni ricorenza. Po’, la vien doparà par fare profumi, creme de belessa, usà come estrati, decoti e oji essenziali. Adiritura, in Polonia, a go scoperto, che co’ i petali de le rose i fa anca la marmelata, dolse e profumata, che vèrze la giornada co’ el fiore in boca. E po’ come no ricordare la canta Rosabella del Molise che la faseva: Ci sposeremo a maggio, con tante rose, con tante rose, sull’altare quel dì noi diremo di sì…
Majo, el mese de le rose e de l’amore, el quinto mese de l’ano, el xe da senpre considerà el mese de sto fiore, el sìnbolo de la rinàssita spirituale e de l’amore. La rosa, da senpre ligà a la dona ancora da l’antichità quando, sia in Grecia che a Roma, el mese jera dedicà a Artemide e Flora, le dó dèe pagane che ricordava la fertilità e la primavera.
A Majo semo in piena primavera, el mese che rapresenta la nàssita, la vita e la maternità. Eco parcossa in te la prima doménega de majo se festeja tute le mame: Festa de la Mama, e le primule e le rose i xe i fiori che se regala a ogni mama par ricordare el dono de la vita. La rosa comunque xe da senpre ligà al mondo feminile e podemo indicare dó figure: la dèa Venere nel mondo pagan e, nel canpo religioso cristian, la Vergine Maria. Tante volte me so’ dimandà parcossa che ’l mese de majo el xe dedicà a la Madona e raquante xe stà le risposte, ma no senpre le me ga sodisfà. Ghe xe chi dise che sia par le varie aparission, e altri che pensa senplicemente a na usanza ligà a la natura e a la fioritura del mese, de le rose. La rosa, infati, la xe considerà da tuti la belessa senza tenpo, la puressa (la rosa bianca) e l’amore (la rosa rossa).
Par questo la devossion vede la figura de la Madona rapresentà da sto fiore meravilioso, tanto xe vero che ne i secoli, santi e filosofi ga parlà de Maria come la pi bela tra le rose.
Le prime devossion a Maria le se ricorda za dal XVI secolo, quando San Filippo Neri, durante el mese de majo, el insegnava a i tosati de l’oratorio a no far mancare davanti a la Madona fiori freschi e colorati, aconpagnài da qualche preghiera e qualche fioreto (rinuncia) in so onore.
In te sto mese, a i me tenpi, jera tradission la sera catarse al capitelo de la Madona, spece in canpagna, par dire el rosario tuti insieme; jera, par nialtri tosati, l’ocasion de incontrarse co le tosate del quartiere. Fin che ’l prete diseva le Ave Maria, i oci no stava fermi: incrosi de ociade e primi contati d’amore sbociava davanti a la statua de la Madona. Quando tuto jera finìo, e el prete gheva dà la benedission, se se catava tra tosati e, nel tragito del ritorno nasseva le prime conversassion: tuti savéa de tuti anca fra tosati e soto i oci vigili de le mame se formava le copiete che, ciàcolando, tornava verso casa. Saludi e soriseti a ogniun che rivava a destinassion co l’arivederci a la sera dopo. Chi jera pi ardito, senza farse védare massa, tentava, co la man “fonfa”, de ciapare la man de la toseta par farghe sentire de ’verla sielta e che la ghe piaseva su tute le altre.
Xe da ricordare anca el Calendimaggio o Cantar di Maggio, na festa stagionale par festegiar l’arivo de la primavera: la xe na tradission ancora viva in tanti posti, senpre par ricordare el ritorno de la vita e de la rinàssita de la natura. Xe proprio su sto rito de alegrìa e de abondanza che nasse le prime sagre, sia par l’ocasion de catarse e anca par vèndare le primissie de la stajon: i sparazi, i bisi, le sarese, le fràgole, ma anca come momento del ritorno de la vita sociale. Bon mese de Majo a tuti.

[torna sopra]