Da Arzergrande (PD)

Eà volpe so ’l ponaro

Quée che vedevo ’e pareva inpronte de un can.

A ste poche bestiòe ghe gavevo preparà un recinto.

Jèrimo in inverno e jera un pochi de dì che vedevo de ’e inpronte de drio de casa. So eà tera che deventa ténara dopo che, a na serta ora va via el giasso de eà note, xe fàssie ’assare na inpronta e quée che vedevo ’e pareva inpronte de un can. De drio de casa, so un tochetin de tera recintà, gavevo moeà quatro gaine e siè arne, de quée mute.
Jera spasso védarle a sbecoeare l’erba. A ste poche bestiòe ghe gavevo preparà, dentro el recinto, na pìcoea caseta fata de tòchi de legno.
Par uno che ga un tocheto de tera, xe inportante, in qualche modo, inpegnarla e, so sto caso go voesto inpegnare un poco de spazio co i animài da cortìe dentro. A vardàrli, lìbari, jera e xe spasso, parché i dà propio eà inpression de ’a contentessa totàe. I passa el tenpo a “rasare” l’erba, a córarse drio o, de istà, a scavarse de ’e buse a i piè del pomaro e a métarse dentro par ripararse dal caldo.
Nel fratenpo i regàea ovi co i quai se poe fare un saco de robe… da ’e torte a ’e tajadèe; da ’e fritaje a i ovi strapassà… Insoma, se poe vìvare, sercando, oviamente, de no abusare par via del coesteròeo.
Na sera de dicenbre, verso ’e diese, da dentro in casa sentimo un sigamento de gaine e arne. Noialtri, qua in canpagna, a tae ora, se no semo soto ’e coerte poco ghe manca e cossì xe stà anche quea sera là.
So’ stà el pi svelto a métarme qualcossa ’dosso e ’ndare fora, ma ora che me so’ vestìo xe passà del tenpo. Inpisso eà luce fora e me “armo” de un baston, che tegno senpre a portata de man e vago verso el recinto del ponaro.
Co eà pila fasso ciaro e vedo un animàe no subito identificà, vardarme, alsàndose co eà testa da na arna destirà par tera e oncora fumante dal contrasto fra el caeòre del corpo e el giasso de ’a note.
So un àtimo, visto che ghe ’ndavo vissin, el ga saltà un trato de rete che comunque el sarà stà un metro e vinti poco pi e el xe scanpà drio i canpi. Par tera ghe jera restà dó arne e na gaina, morte, oviamente.
Dopo, fora ghe jera anche i mii de casa, insieme gavemo podesto ipotizare che eà fusse na volpe e tuto corispondéa a partire da eà coa.
Ma come, mi pensavo che so sto tenpo de inverno eà volpe fusse in letargo o comunque rintanà da qualche parte. E invesse nò!
Questo eó ga puntuaizà eà guardia venatoria che, dopo averla ciamà eà xe vegnùa a fare un sopraluogo.
Vardando ben i ga podesto capire da ’e inpronte che proprio de volpe se tratava.
“Cari signori” i me ga ’ito, “se volete un risarcimento dovete avere la rete metallica alta un metro e ottanta fuori dal terreno e interrata di altri venti centimetri.”
Comunque qualcossa go tirà, dopo aver fato eà domanda e spetà siè mesi.
’Desso par bona norma, quando che xe sera, saro i pochi de animài che go, so un posto proteto par evitare de trovare, pi par el scuro che par el ciaro, eà volpe che passeja so ’l ponaro.

[torna sopra]